JESAYA Bindu 6
Bindu 6
Pandiloon ni Jahowa bani si Jesaya
1Bani tahun parmatei ni Raja Usia, huidah do Tuhan hundul i atas hotak na gijang anjaha na marmulia; anjaha rambu ni pakeian-Ni do manggoki rumah panumbahan. (1 Raj 22:19; 2 Raj 15:1; Joh 12:41)
2Serapim do jongjong i babou-Ni, na marhabong onom bei; dua marrungkub bohini, dua marrungkub naheini anjaha dua mangkabangkonsi.
3Marsitauran ma sidea, nini,
“Na Pansing, Na Pansing, Na Pansing do Jahowa Zebaot,
gok do sab tanoh on bani hamuliaon-Ni.” (Hab. 3:3; Pangk. 4:8)
4Jadi dugur ma onjolan ni pasihon halani sora ni na dilo-dilo ai, anjaha gok timus ma rumah ai. (Hes. 10:4; Pangk. 15:8)
5Dob ai ningku ma,
“Bursik ma ahu! Magou ma ahu,
halani jolma parbibir na mabutak do ahu,
anjaha marianan do ahu i tongah-tongah ni halak parbibir na mabutak;
ai domma ididah matangku Raja in, Jahowa Zebaot. (1 Mus. 16:13; 32:30; 2 Mus. 33:20; Panguh. 13:22)
6Sada humbani Serapim ai habang ma dompak ahu, mamboan narnar ibagas tanganni, ai ma na binuatni marhitei gansip-gansip humbani anjapanjap. (Hes. 28:14)
7Ijamah ma marhitei ai bibirhu, anjaha nini,
ʻTonggor ma, on do na manjamah bibirmu,
sae ma salahmu, sasap ma dousamu.ʼ (Jer. 1:7; Dan. 10:16; Sak. 3:4)
8Dob ai hubogei ma sora ni Tuhan, na mangkatahon,
“Ise do sisuruhon-Ku:
Ise do utusannami?
Jadi ningku ma, ʻIjon do ahu, suruh Ham ma ahu!ʼ
9Jadi ihatahon ma,
ʻLaho ma ho, hatahon ma bani bangsa on:
Tangar, tangar hanima ma, tapi ulang artihon;
idah, idah hanima ma, tapi ulang arusi hanima! (Mat 13:11-15; Joh 12:40; Lah. 28:26, 27; Rom 11:8)
10Patendel ma uhur ni bangsa on, panengel pinggolni,
anjaha papitung matani,
ase ulang marpangidah ia marhitei matani,
anjaha ulang marpanangar marhitei pinggolni;
ase ulang mangarti uhurni,
anjaha ulang ipaubah uhurni gabe malum ia.ʼ (2 Mus. 29:3; Joh 12:40)
11Jadi ningku ma, ʻPiga dokah on, Tuhan?ʼ
Balos-Ni, ʻRonsi halong huta-huta,
seng dong na mangiankon;
rumah-rumah lang marisi jolma,
anjaha ladang salih gabe halimisan;
12ipadaoh Jahowa jolma,
anjaha lungun tumang tanoh in.ʼ
13Anjaha anggo adong ope na tading ijai saparsapuluh,
ai pe boiskononkon do,
usih songon hayu jajabi atap hayu baringin,
na jongjong ope martutuho,
sanggah hona roboh.
Bonih na ma pansing do tutuhoni ai.” (bd. 4:3)
Currently Selected:
JESAYA Bindu 6: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.