JESAYA Bindu 62
Bindu 62
Hamuliaon ni Sion na Sihol Roh in
1Halani Sion seng anjai sip Ahu,
anjaha halani Jerusalem seng soh Ahu,
paima poltak hapintoronni songon sondang ni mata ni ari,
anjaha hatuahonni songon rigapan na gara.
2Idahon ni bangsa sipajuh begu-begu ma hapintoronmu
anjaha sagala raja-raja mangidah hamuliaonmu;
anjaha goranon ma ho marhitei goran na baru,
ai ma sitontuhonon ni pamangan ni Jahowa. (bd. 65:15; Pangk. 2:17)
3Gabe sortali hamuliaon do ho ibagas tangan ni Jahowa,
anjaha sortali harajaon ibagas tangan ni Naibatamu.
4Lang be goranon ho na tinadingkon,
anjaha tanohmu seng be hatahonon na tarulang;
tapi goranon ma ho na hinarosuhkonni uhur-Hu, anjaha tanohmu goranon na dob laho;
ai marosuh do Jahowa mangidah ho,
anjaha tanohmu marhalahoan do. (bd. 54:6; 60:15; Hos. 2:21; 1 Ptr. 2:10)
5Ai songon garama mambuat anak boru,
sonai do ho buaton ni Sipauli ho;
songon malas ni uhur ni siparunjuk bani tunanganni,
sonai do malas ni uhur ni Naibatamu mangidah ho. (Sep. 3:17)
6Bani tembokmu, ale Jerusalem,
domma Husuruh parjaga.
Arian pakon borngin
seng anjai sip sidea.
Hanima, na padingatkon Sion bani Jahowa,
ulang ma marnasoh! (bd. 52:8)
7Ulang sip hanima i lobei-Ni,
paima itatap Jerusalem anjaha ibahen ai
gabe puji-pujian i tanoh on.
8Domma ibijahon Jahowa marhitei tangan-Ni siamun ampa marhitei tangan-Ni na gogoh in:
Seng be bereon-Ku omeimu gabe panganon ni munsuhmu,
anjaha seng be inumon ni halak na legan anggurmu,
na dob hinangalutkonmu, (bd. 65:21, 22)
9tapi na patumpu-tumpuhon, sidea ma na mangankon
anjaha mamuji-muji Jahowa;
anjaha na mambuat, sidea ma na manginum
bani alaman-Ku na ma pansing in. (5 Mus 12:17, 18)
10Luar ma, luar ma hanima hun horbangan in!
Pasirsir dalan bani bangsa in!
Palumbang, palumbang dalan in, padaoh batu-batu!
Pajongjong ma mandera partanda bani bangsa-bangsa! (bd. 40:3; 57:14)
11Tonggor ma, domma itingtingkon Jahowa
das hu ujung ni tanoh on:
Hatahon ma bani boru Sion,
“Tonggor ma, roh do haluahonmu! Mangihut do bani upahni, anjaha i lobei-Ni do na sinari-Ni.” (bd. 40:10; Sak. 9:9; Mat 21:5; Pangk. 22:12)
12Goranon do sidea: bangsa na pansing,
Na pinaluah ni Jahowa.
Anjaha ho goranon do na hinasiholan,
huta na seng be sitadingkononkon. (bd. 35:10)
Currently Selected:
JESAYA Bindu 62: BTS
Highlight
Copy
Compare
Share
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.