JESAYA Bindu 20
Bindu 20
Partalanjangon ni si Jesaya, Tuduh-tuduh dompak na Laho Masa bani Masir ampa Etiopia
1Bani tahun parroh ni Tartan hu Asdod, na sinuruh ni si Sargon, raja ni Assur, na mamorang huta Asdod anjaha na patundukkon ai, (2 Raj 18:17)
2bani panorang ai ma marsahap Jahowa marhitei si Jesaya, anak ni si Amos nini ma, “Laho ma ho, tanggali ma baju guni in humbani binongeimu ampa sipatumin humbani naheimu!” Jadi ibahen ma sonai, mardalan ma ia talanjang anjaha seng marsipatu. (Hes. 24:24)
3Nini Jahowa ma, “Songon juakjuak-Ku si Jesaya, mardalan talanjang anjaha seng marsipatu tolu tahun dokahni gabe tanda ampa tuduh-tuduh dompak Masir ampa Etiopia,
4sonai ma boanon ni Raja Assur halak na tartaban hun Masir ampa halak na tarbuang hun Etiopia, na maposo ampa na matua, talanjang anjaha seng marsipatu, sae-sae hundulanni, gabe habadoron bani halak Masir.
5Jadi tarsonggot ma sidea anjaha maila halani Etiopia hatengeran ni uhurni, ampa halani Masir na pinangunsagahkon ni sidea.
6Anjaha halak na marianan i topi laut, hatahononni ma bani ari ai, ʻTonggor ma, sonon do hape na masa bani jolma hatengeran ni uhurta ampa haporusanta, andohar iurupi anjaha ipaluah hita humbani raja ni Assur! Sonaha ma tarbahen hita maluah?ʼ ”
Currently Selected:
JESAYA Bindu 20: BTS
Highlight
Copy
Compare
Share
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.