JESAYA Bindu 17
Bindu 17
Pasal Parseda ni Damaskus ampa Harajaon Israel
1Pangungkabon pasal Damaskus, “Tonggor ma, masabkononkon do Damaskus, ase ulang be kota ai,
gabe timbunan batu ma ai. (Jer. 49:23; Ams. 1:3)
2Tarulang ma huta-huta ni Aroer,
gabe ianan ni pinahan-pinahan ma ai,
panggompangan bani sidea anjaha ise pe lang be na mangkirjati sidea.
3Masab ma benteng-benteng hun Efraim
ampa harajaon hun Damaskus;
anjaha teba-teba ni Aram
gabe songon hamuliaon ni Israel ma,
nini Jahowa Zebaot. (bd. 7:1, 8)
4Bani ari ai sipaoruon do hamuliaon ni Jakob,
anjaha dagingni na mombur ai pamerungon do.
5Sonon ma parjadini, songon panabi na manjormak gandum sisabion
anjaha tanganni manabi buyurni,
songon halak na manjomputi
buyur i pamah Repaim.
6Tapi dong ope tading turiangni,
songon sanggah na mandugur hayu jetun,
dua atap tolu daoh i atas,
ompat atap lima bani dangkahni, sonai do nini Jahowa, Naibata, pasal Israel.
7Bani ari ai kawahkonon ni jolma in ma na manompasi, anjaha matani mangidah Na Pansing ni Israel.
8Seng be kawahkononni anjapanjap na tinukangan ni tanganni, anjaha na pinauli ni jari-jarini seng be tataponni, ai ma Asera atap gana-ganani mata ni ari.
9Bani ari ai huta na pinatoguhnima ai doskon ianan na tinadingkon ni halak Hefi pakon halak Amori ma ai, ai ma na tinadingkon ni sidea, sanggah maporus i lobei ni halak Israel, gabe tarulang.
10Ai ihalupahon ho do Naibata ni haluahonmu,
anjaha dolog batu ni hagogohonmu lang idingat ho.
Halani ai age ipungkah ho pohon na jenges
anjaha isuan ho hujai ranting ni hayu anggur humbani nagori na legan, (5 Mus 32:15, 18)
11bani ari isuan ho ai, boi tubuh ibahen ho,
anjaha sogod sanggah itidahkon ho ai,
marbunga ibahen ho — tapi magou do pariama ai bani panorang sitaronon
ampa pusok ni uhur na so tartambari.”
Partalu ni Assur Ibahen Jahowa
12Bursik ma! Hageoron ni bangsa-bangsa na buei in,
na geor songon pargeor ni laut,
pargilumbang ni hajolmaon,
na marhasak songon bah marbanggal.
13Songon pardorom ni bah marbanggal do pardorom ni bangsa-bangsa,
tapi mangonai hata do Ia bani sidea,
gabe maporus ma sidea daoh,
mapurpur songon lamlam i buntu-buntu niombus ni logou,
anjaha songon orbuk na habang binahen ni halisungsung. (Job 21:18; Ps. 1:4; 35:5)
14Bodari-bodari, tonggor ma, songgot-songgot!
Paima siang ari, seng ijin be!
Ai ma rupei ni halak na manaban hita
ampa parbagianan ni halak na manrampas hita. (bd. 37:36; 2 Raj 19:35)
Currently Selected:
JESAYA Bindu 17: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.