JESAYA Bindu 15
Bindu 15
Lumba-lumba Pasal Parseda ni Moab
1Pangungkabon pasal Moab: Tongon, ibagas saborngin do iparseda Ar-Moab anjaha iboiskon;
tongon, ibagas saborngin do iparseda Kir-Moab anjaha iboiskon! (Sep. 2:8-11)
2Tangkog do boru Dibon hu dolog panombahan, doruh-doruh;
itangisi Moab do huta Nebo ampa Medeba.
Palpalon do ganup ulu,
anjaha isuhur jambek ganup. (Hes. 7:18)
3Marhiou guni do sidea mardalani i alaman;
i atas tayub ampa i alaman,
tangis-tangis do sidea ganup,
marsuhap-suhap iluh. (bd. 22:1)
4Doruh-doruh do Hesbon ampa Eleale,
das hu Jahas tarbogei sora ni sidea;
halani ai mandoraki do bala ni Moab,
gobir tonduyni ibagas.
5Doruh-doruh do uhur-Hu halani Moab;
pangungsi ni sidea das do hu Soar, hu Eglat-Selisia;
tongon, bani tangkogan Luhit tangis-tangis do sidea manangkogi ai; tongon, bani dalan hu Horonaim
doruh-doruh do sidea mardingat hasedaon. (bd. 16:9-11; 1 Mus. 19:20; Jer. 48:34)
6Tongon, bah na hun Nimrim domma halong,
poyon-poyon melus, suan-suanan bois,
lowoh-lowoh seng dong be.
7Ai do ase iusung sidea pansarian na gok ai
ampa na pinahumpul-humpul ni sidea mandipari Bah Arabah.
8Tongon, sar do tangis-tangis ai hu sab tanoh Moab,
das do hu Eglaim doruh-doruh ai, das do hu Beerelim.
9Tongon, gok daroh do Bah Dimon, tongon,
lobih ni ai ope bahenon-Ku bani Dimon;
na maluah hun Moab panganon ni singa do,
ronsi teba-teba ni tanoh ai.
Currently Selected:
JESAYA Bindu 15: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.