Titut 3
3
Ka̱cyet ba̱nyet tssup ka
1Yring ba̱nyet nwan ba mi ba tyong ba̱gwam ba a̱ ba̱ pfong, a̱ swat-swat yya kozan kyang a yet i. 2Ba̱ tyyei ba ryok ryat a̱yin a̱ka̱tuk ba̱ryat ba, ba swat lafiya a̱ bo yet ba̱rywai ba̱nyet, a̱ tyyei koyan a̱tsatsak hali. 3Njit ma zi ma̱ ka̱n sam wai a, i yya wipfong a, i ma̱n brik. I yya dikwwa nkyang ka̱sa ba̱ a̱nzitaka̱i, i yya na̱kpot bu swam. Ba̱nyet a̱ rak za ryi, zi ma̱n dak ba̱ ryi. 4Ma ka̱ram ka Ka̱za A̱ntyok zasan kan za tyyei ka hok dizot njit bu za cat nka ni 5a̱ za san. Ba wei di zi yya a̱tsatsak nkyang ba, ma rot dizot njit ti ka hok ni, Tswa nka ji za tssu i za ryi a̱hwai nbyin ba̱ a̱hwai nsso. 6Ka̱za a̱ wrak Tswa nka zi bu tyyi hywat ndya njit a rot Yesu Kristi A̱ntyok zasan. 7A̱liheri nu a̱ yin tyyi zi gi myim Ka̱za i gi shya sucet ka̱u di tyak a zin breng ndya di na̱won nka ni. 8Ba̱ryat bani a̱ yet ka̱ryong.
N bo n cat a ba̱ tyyei nkyang ani di cet, rot ba̱nyet ba a̱ yet ba̱nyet tssup Ka̱za ni a̱ ga tyyi ndya mba na i yya a̱tsatsak nkyang. Nkyang ani yet, i bu byyi kpungtun ka̱bvwa ba̱nyet sa̱rei. 9Ma a tyong a̱cecet sang diccu, bu tyong a̱yiyrek ba̱tyyi, i ryok hwwon zok ko zwang tazwa Truwang ji ba, rot nkyang ani byyi kpungtun ba. 10A̱yin nu a̱ kyyai ba̱nyet ni a ku kam bvat ka̱hwa; ki a̱ hok ba a tun nbvak i ku wwon. 11A bvwo taka̱i a̱yin iya rya nu na bu yet a̱tsatsak ba, nnu ma a̱ ka̱n ya rot.
A̱ngbom ba̱ryat bu ka̱nu-a̱tan
12Ki n bu tom Artimat ko Tikikut da̱ nwan, a kwan i ba da̱ nzuk ka̱nkrang Nikafolit, rot n ka̱n dop ni swrang dikwei ti ka̱ yemi. 13Yya koka̱ri i brang Zinat a̱ntyok bvwo shirya nu bu Apollot ka̱ram pyyem ryen mba ka, i bu ryi kozan kyang a ba cat i ku ba̱ maai. 14Ryok ba̱nyet njit ba a̱n myyam tyyi ka̱ssi bu yya nkyang a yet i a̱ gan brang ba̱nyet dizot a nkyang a ba cat kozan ka̱tuk ni, ho ba bu yet ba̱nyet sang kpungtun.
15Sa̱rei ba̱nyet ba a̱ shyi ba̱ nzuk ni a̱ na̱ byei. N cat a byei sa̱rei ba̱kpondang ba a̱ za cat i tssup a ni.
Za̱nang Ka̱za ji swrang ba̱ nyin sa̱rei.
Currently Selected:
Titut 3: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
