Rom 7

Zi shyi an bvak Truwang ji ba

1Ba̱wumbeyang, kyang a n cat hywa naani ni yi kpo bvwo, rot yi bvwo truwang nyreng ji. Truwang ji byyi cet a̱yin ki a̱ swat a̱cet. 2Da̱ni da̱ a̱mbyring nyreng ni, ka̱ a̱ntyok u a̱ ri shyi a̱cet, truwang ji ku shim i na̱ ku wwon a̱ nat nyreng a̱yanyet ba; ma ka̱ a̱ntyok u a̱ kwu, truwang ji bu ku rop sak a a̱ntyok u ba. 3Ka̱ a̱ nat da̱ a̱ntyok a̱yaan, a̱ntyok nu nu na̱ ri swat a̱cet, ba ni ku yei a̱kan-a̱naan. Ma ka̱ a̱ntyok u a̱ kwu, to, ka̱ yreng a̱yanyet a̱ bo byyi hywak a truwang ji ba. 4A̱mi kun dyi ba̱ nyin, ba̱wumbeyang nzuk, da̱ni di Truwang Musa ji ni yi yet nkom an nji, rot Yesu Kristi a̱ yi yen kwu. Naani ni yi yet ba̱nying Truwang ji ba, yi yet ba̱nying a̱ntyok u ba yin shyek ni nyyai yabyen yi gi byyi Ka̱za kpungtun. 5Rot ka̱ram ka zi yin pfong di ndwam njit a ni, Truwang ji i bvan ndwam njit a tyei ba̱ a̱ka̱tukyya nu mi, na̱ yin byyi dikwu ti kpungtun. 6Ba̱nyying Truwang ji byyi cet tazwa njit ba, rot zi ka̱n kwi a Truwang ji yin za zzap tyei ni. Zi bu shyi i dikwwa truwang ji ba yin jem ni ba, ma a̱hwai ryen nu a̱ yet a̱nying Tswa Ka̱za ni.

Truwang ji ba̱ a̱ka̱tukyya

7To, a̱nzan zi bu byyi ni hywa? Truwang ji yet a̱ka̱tuk o? Ko ba̱cincong! Ma Truwang ji a̱mi n tyyi bvwo a̱ka̱tukyya nu. Truwang ji zi na n dyok hywa, “Ryok kpa swam an kyang a yet nyyi a̱yin ni ba!” da n bvwo kpa swam yet a̱ka̱tuk ba. 8Rot bu Truwang ji, a̱ka̱tukyya a̱ shya diwat n kwwat tyyi n pfong swam kozan taka̱i nkyang. Ki truwang n shyi ba, a̱ka̱tukyya nu a̱ byyi sucet ba. 9Ka̱ram ka truwang zi yin srang ni nzuk ma n yin yet a̱cet. Ma ka̱ram ka truwang ji bun ba ni, a̱ka̱tukyya a̱ si ta na̱kum, 10nzuk n si n kwu. To, Truwang ji wu myim n dyi sucet i si wu bu tyyi n kwu. 11A̱ka̱tukyya a̱ shya diwat nyyai di Truwang ji a̱ n daai. Rot Truwang ji, a̱ka̱tukyya a̱ si n hywat n kwu.

12To, Truwang ji yet a̱zizrak kyang a zi hywa di zi yya ni bu yet a̱tsatsak ba̱ a̱zizrak. 13Ku ni yet a̱tsatsak nkyang u a̱mi a̱n ba di dikwu ti e? Ko ba̱cincong! Pfong a̱ka̱tukyya a̱mi. A̱ka̱tukyya a̱ yin nwa an Truwang ji yet a̱tsatsak ni a̱ ga n tyyi dikwu, Truwang ji gi ku tyyei na̱ yet a̱ka̱tukyya. Rot a̱mi i ba Truwang na ba tyyei ka̱sak ka a̱ka̱tukyya na̱n yet a̱ka̱tuk a̱ ra̱u ka̱son ka ni.

Kyang a shyi a mpfwa a̱yin

14Zi bvwo dei Truwang ji yet nying tswa, ma nzuk n byyi hali a̱neywu; n shyi an bvak a̱ka̱tukyya. 15N bvwo kyang a n yya ni ba, rot kyang a n cat yya na ni nkpa n na yya ba, seko n yya kyang a n dak ni. 16To, ki n dak kyang a n yya ni, nkpa a̱mi ni tyyei ka̱sak ka n nin shim Truwang ji yet a̱tsatsak ni. 17To, nzuk a̱mi n yya kyang a̱mi ba, seko a̱ka̱tuk u a̱ shyi ka̱yat mpfwa nzuk ka ni a̱mi a̱ yya. 18Rot a̱mi n bvwo a̱tsatsak nkyang a̱n shyi ka̱yat nzuk ba, wato, i rwam nzuk a. Ko n shyi bu rya yya a̱tsatsak nkyang a n nin maai n kpo yya ba. 19N yya a̱tsatsak nkyang u n cat yya na ni ba; se a̱ka̱tuk u n dak yya na ni, nu a̱mi n yya. 20To, ki n yya kyang a n cat yya ni ba, nzuk a̱mi n bo n yya ba; a̱ka̱tuk u a̱ shyi mpfwa nzuk a ni a̱mi a̱ yya.

21To, truwang ji n shya zi shyi an nzuk i jinji ni: Ka̱ram ka n nin cat yya kyang a yet i, se n si yya a̱ka̱tuk u n wi cat i. 22Pfwa nzuk a cat Truwang Ka̱za ji. 23Ma n bu shya truwang zaan zi ka̱n san pfwa nzuk a tyyi. Kozan ka̱ram zi kwan bu truwang mpfwa nzuk ji. Rot a̱mi n brak n tyyi a̱kwwa n tssup a̱ka̱tukyya, rot nu a̱mi a̱ byyi rwam nzuk a. 24N sswa ka̱bvung ba̱gingang! A̱nyan a̱ ni n san a̱ n tun a̱ wwon i rwam ani n kwak naat i i dikwu tini ni? 25Ka̱za a̱mi ba̱diyin a̱ ni n san rot Yesu Kristi A̱gwam njit. N ka̱ gwai i!

Wato nzuk naanini: ka̱yat mpfwa nzuk ka, ki n drok n yya truwang Ka̱za ji dikwwa; ma rwam nzuk a nkpa yya a̱ka̱tukyya nu dikwwa ti.

Currently Selected:

Rom 7: kaj

Highlight

Copy