Pfong Ka̱za 3
3
Ba̱ryat naat di Sardisu
1“Bu jem a̱pfong Ka̱za ba̱nyet tssup u ka̱yaani Sardisu:
“Ba̱ryat bani a̱ nyyai da̱ a̱yin nu a̱ byyi na̱ta̱ngwat a̱tiyring a ni bu Tswa a̱tiyring Ka̱za ji ni. N bvwo kyang a a yya ni sa̱rei. N bvwo ba na̱ cin da a sso, ma a yet kom. 2Shyek ba̱nyying ka i tung ka̱bancet ka a̱ ri bvat ni, ho ka bu tyak ba̱nyying. Rot n dyi kyang a a yya ni ku ka̱n ba cicrak a̱ta̱ssi Ka̱za nzuk ka ba. 3Yring kyang a ba yi na̱ zzek ni bu kyang a a ka̱n hok ni, i na̱ tssup, i wwon a̱ka̱tukyya nwan nu. Ki a rak shyek a, n bai da̱ nwan da̱ a̱tang ni, da̱ nwan ba ni bvwo ka̱ram ba nzuk ka ba. 4Ma ba̱yanyet nyin ka̱ yemi Sardisu ka, ba shii ka̱tswa ba, ba ka̱n ywok ba̱tro mba ba ba. Ba ni cong ba̱ nzuk bu ba̱jijyat ba̱tro mba rot ba maai. 5Ba̱nyet ba a̱ ya nasara a̱ si tyak ni a̱ ni kup ba̱jijyat ba̱tro da̱ mba ni, da a ni shok a̱yiyrek mba na ka̱yat kpa ba̱nyet nsso ka ba. A̱ta̱ssi A̱tyyi nzuk bu ba̱pfong Ka̱za nu ba n ni tyyei a̱zikpai ka̱sak ka ban yet ba̱nyet nzuk ni.
6“A̱yin nu a̱ byyi a̱pfo ni na̱ hok kyang a Tswa Ka̱za ji zi tyyei ba̱nyet tssup ba ni!”
Ba̱ryat naat di Filadalfiya
7“Bu jem a̱pfong Ka̱za ba̱nyet tssup u ka̱yaani Filadalfiya:
“Ba̱ryat bani a̱ nyyai da̱ a̱yin nu a̱ yet A̱zizrak bu ka̱ryong ni, nu a̱ breng kyang yrang ka̱bvwa Dawuda ka. Ki a̱ yrang, a̱yin a̱ maai yyik ba, ki a̱ hweyak, a̱yin a̱ maai yrang ba. 8N bvwo sa̱rei kyang a a yya ni. N bvwo a byyi cet ba̱t ba. A tssup zzek nzuk a; nwan ka̱n ton diyrek nzuk ti ba. N ka̱n na̱ yrang ka̱bvwa ka, da̱ a̱yin na̱ ni maai yyik ba. 9Hok ansham! Ba̱yanyet a̱n shyi ka̱ yemi a̱ yet ba̱nying Ka̱ta̱nyrang, ba̱nyet bvei dira iya a̱ ya yei ba̱nyet Yahuda na ni, ma ba yet ba. N ni ba̱ tyyi ba ba a̱ bu ta̱gbok a̱ta̱ssi nwan. Ba ni bvwo sa̱rei ka̱sak ka n nin na̱ gwai ni. 10Rot a breng truwang nzuk ji i yya hakuri, nzuk meyang n ma̱ ni na̱ cam ka̱ram ka ka̱bvung kan ba sa̱rei ka̱sa ka ni a̱ bo me sa̱rei ba̱nyet ka̱sa ba ni. 11N bai ba̱nyying. Breng kyang a a ka̱n shya ni kpunkpam, ho a̱yanyet a̱ bu san zang nwan ji a̱ na̱ wwon. 12A̱yin nu a̱ yya nasara a̱ si tat a a̱ngbom u ni, n ni tyyi na̱ yet a̱ram i bat Ka̱za nzuk a. Kyang n shyi bu ni ku tun ka̱ yemi ba. N ni jem diyrek Ka̱za nzuk ti a̱za̱ nu, bu diyrek a̱gba̱dang ka̱nkrang Ka̱za nzuk ti, A̱hwai Urushalima, a̱nying nu a̱ ni kyrek nyyai Tazwa di Ka̱za nzuk ka ni. N bo ni jem a̱hwai diyrek nzuk u a̱za̱ nu.
13“A̱yin nu a̱ byyi a̱pfo ni na̱ hok kyang a Tswa Ka̱za ji zi tyyei ba̱nyet tssup ba ni!”
Ba̱ryat naat di Lawudikiya
14“Bu jem a̱pfong Ka̱za ba̱nyet tssup u ka̱yaani Lawudikiya:
“Ba̱ryat bani a̱ nyyai da̱ Amin. Nzuk n yet shaida ka̱ryong ji, n bo yet dityin kozan kyang a Ka̱za ka krok i. 15N bvwo kyang a a yet i. A tyyi ba̱ duduk swrang. A wum ba, da̱ nwan ba shrim ba. Nwan da wu yet a̱shrim ko a̱wum, se kun n dan. 16Ma rot a swat duduk, da̱ nwan wum ko shrim ba, n ni na̱ tun ka̱nu nzuk ka n weyang. 17A ryat yya, ‘N byyi zwa, n byyi sa̱rei kyang a n cat i.’ A ya raai! A bvwo da̱ a yet kyang dizot baa? A byyi zwa ba, i si bu shyi ka̱gbyang, i bu kpa a̱tutwan. 18N na̱ tyyei a san zinariya da̱ nzuk, a̱zizrak nu, i gi tyyi zwa, i bu kwei a̱jijyat ba̱tro kup n ya cii ka̱gbyang rwam nwan nu, ho a bu hok nsum. I bu san dikan kon a a̱ssi nwan na i gi cyang. 19N na breng ba̱nyet ba n cat i mbvak mpfwa n bo ba̱ nyep. Rot a̱mi se an tyyi ka̱ssi i wwon a̱ka̱tuk yya nwan nu. 20Cyang! Nzuk a̱nu n sseng ka̱nu ngyeng n tsot ka̱bvwa ka. A̱yin nu a̱ hok diwan nzuk ti a̱ yrang ka̱bvwa ka, se n nwa da̱ nu zi ya ndung. 21Ba̱nyet ba a̱n tyyi ka̱ssi a̱ yya nasara a̱ si tat a a̱ngbom u ni, n ni ba̱ yei ba swrang ba̱ nzuk ka̱bvwa dityok nzuk ka, da̱ni di n ka̱n yya nasara n si tyak i, an swat ba̱ A̱tyyi nzuk u ka̱bvwa dityok nu ka ni
22“A̱yin nu a̱ byyi a̱pfo hok ni na̱ hok kyang a Tswa Ka̱za ji zi tyyei ba̱nyet tssup ba ni!”
Currently Selected:
Pfong Ka̱za 3: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
