Ibraniyawa 2

A̱gba̱dang sucet u Ka̱za ka za ryi ni

1Rot a̱mi se zi breng di cet ka̱ryong ka zi ka̱n hok ni i ka̱ sak ka̱yat ndya njit ka, ho ba bu ka̱ sook a̱ za wwon. 2Zi bvwo ba̱ryat ba Ka̱za ka yin wwat ba̱pfong nka ba ssang a̱ tyyei ba̱nyet ni ba yin yet ka̱ryong, a̱yin nu a̱ kpo seyak ni a̱ ni seyak ka̱nu sso nu. 3Ka̱ a̱mi zi ni yya ni nshot ki zi rak san a̱gba̱dang sucet a̱ni ba za ryi ni? A̱gwam Yesu di bvak nu a̱ tason a̱ za tyyei ba̱ryat sucet bani. Ba̱nyet ba a̱ hok ba̱ryat ba ka̱nu nu ni ba shim ba yet ka̱ryong. 4Ka̱ram iya Ka̱za a̱ ma̱ yin yya nkyang ka̱wun bu nkyang ka̱hat ba̱gingang a̱ tyyei ba̱ryat ba ba yet ka̱ryong. A̱ bo ba̱ nang za̱nang ji Tswa Ka̱za zi ka ni, ka̱sak ka kan cat i.

A̱kwak ka̱son nu a̱ za ryi sucet ni

5Ka̱sa ka a̱ cong a̱ bai ni a̱mi zi ryat. Ba ba̱pfong Ka̱za a̱mi Ka̱za ka yin ba̱ tyyi ka̱sa iya mbvak ba. 6Ni da̱ a̱yanyet a̱ ka̱n dyat ka̱yat ba̱ryat Ka̱za ka a̱ hywa,

“Ka̱za, a̱neywu a̱ shyi a̱nzan har a nin yya a̱huhwa nu?

Ka̱ a̱nzan a̱yin na̱ yet a nin hok dizot nnu?

7A ku ywwai na̱ yen dat ba̱pfong nwan ba ka̱baram ba̱cincong;

a sin ku yrek i ku tyyi shii bu dityok.

8Kozan kyang a ra tyyi ka̱tak a̱tak nu.”

Da̱ni di hywa na kozan ba ra a̱ tyyi ka̱tak a̱tak nu ni, kyang n shyi ba wwon ba. Ma da̱ni di ryi iya ni, zi ka̱n dyi kozan kyang ku shyi mbvak nu ba. 9Ma zi cyang Yesu, nu a̱mi ba yen ywwai di ba̱pfong Ka̱za ba, ma nnani kan ku kup dityok bu shii rot dikwu ti na̱ kwu ni. Ka̱za a̱ ga tyyei za̱nang nka ji, nkpa n byyi kan tyyi Yesu a̱ kwu a̱zi hywak koyan. 10Ka̱za a̱ yin yya kozan kyang a n shyi ni na yet nkaa, a̱ yin dyi ku myim ka ku tyyi na̱ yet a̱zizrak a̱ ga maai kwak ka̱son ba̱nyet ba a̱ naat ssang sucet a ni, ba̱nyet ba̱gingang a̱ ga shya yet na̱won Ka̱za bu hok ansham nka na. Ka̱bvung ka na̱ yin sswa ni a̱mi a̱ yin ku tyyi maai a.

11Nu a̱yin nu a̱ cii ba̱nyet a̱ka̱tukyya ba ni da̱ a̱yin nu ba cii ni, A̱tyyi mba a̱yring. Nkpa n byyi Yesu na̱n pfong nsum ba̱ yei ba̱wumbeyang ba. 12A̱ yin hywa,

“N ni yei diyrek nwan ti a pfwo ba̱wumbeyang nzuk a.

N ni nwa i ba̱nyet ba a̱ tung ni n bvom n na̱ dyep.”

13A̱ si bo hywa, “N ni tyyi rya nzuk a an bvak Ka̱za.” A̱ bo hywa brak, “Nzuk nu ni bu na̱won na Ka̱za ka n dyi ni.”

14To da̱ni di na̱won na na byyi dinam bu ba̱sok ni, Yesu a̱ ma̱n tyyi diccu nu ka̱yat taka̱i swat mba ka di ba̱neywu ni. A̱ yin yya a̱mi, rot dikwu nu ti na̱ ga byyan a̱gwam a̱ka̱tuk tswa nu a̱ byyi cet dikwu na ni, 15a̱ ga san ba̱nyet ba a̱ shyi i dikwwa sa̱rei swat mba na ni rot ba pfong ka̱wun dikwu. 16Ka̱ryong ka a̱ yemi ba̱zizrak, ba ba̱pfong Ka̱za ba na̱ brang ba, na̱mbvon Ibrahim a̱mi. 17Nkpa yin byyi dolet ba ku brak na̱ tyyi ba̱cicrak bu ba̱wumbeyang ba, a̱ ga maai yya Ka̱za dikwwa di ka̱ryong da̱ a̱gba̱dang gado Ka̱za ni a̱ bo byin a̱ pfong dizot ba̱nyet ti, a̱ ga ba̱ cii a̱ka̱tukyya mba nu. 18Nnani a̱ maai a̱ brang ba̱nyet ba ba me ni, rot nu diccu nu ba yin ku me na̱ bo sswa ka̱bvung.

Currently Selected:

Ibraniyawa 2: kaj

Highlight

Copy

Compare