Ibraniyawa 1

Ba̱ryat Ka̱za ka̱nu Ka̱won nka

1Ka̱ram ka seyak ni Ka̱za ka ryat bu ba̱tyyi a̱kwop njit ba, nkrang ba̱ brika̱tei i na̱ta̱ryen ba̱gingang. Ba̱nyet ba a̱ tyyei ba̱ryat nka ba ni a̱mi a̱ yin ssang ba̱ryat ba a̱ tyyei. 2Ma a̱ngbom nom a̱ni Ka̱won nka ka a̱mi ka ka̱ tyyi ba̱ryat ba ka̱nu nka ka ka bu za tyyei. Ka̱za a̱ yin yya ka̱sa ka ba̱ nu. Nu a̱mi Ka̱za ka bo tssa a̱ ku wwon kozan kyang bvak. 3Nu a̱mi a̱ tyyei ka̱bvwa sai ka Ka̱za ka byyi ni. Ka ku ryi a ryi Ka̱za ba̱zizrak. Di cet diwan ba̱ryat nu na a̱mi na̱n breng ka̱sa ka. Na̱ bu tyak cii ba̱nyet ba a̱ka̱tukyya mba nu, a̱ brek a̱ si swrang Tazwa an bvak yak Ka̱za, A̱ntyok A̱gba̱dang Cet sa̱rei.

Ka̱won ka a̱ ra̱u ba̱pfong Ka̱za

4Da̱ni di Ka̱za kan wrak Ka̱won ka diyrek ti ra̱u tinyyi ba̱pfong Ka̱za ni, a̱mi Ka̱won ka ka bo ba̱ ra̱u ka̱yat kozan kyang. 5Rot Ka̱za a̱ ka̱n hywa di a̱yanyet ka̱yat ba̱pfong nka ka,

“A yet Ka̱won,

ka̱pfun n ni tyyi a̱tyyi nwan” ba,

di Ka̱za ka ka̱n hywa di a̱pfong nka,

“N ni yet A̱tyyi nwan,

a ma̱n yet Ka̱won nzuk” ba.

6Ka̱ram ka Ka̱za ka yin naat tom di Ka̱won ka̱tsitsrang nka i ka̱sa ka ni a̱ hywa,

“Dolet sa̱rei ba̱pfong Ka̱za ba a̱ ku kok ntong.”

7Tazwa ba̱pfong Ka̱za ba Ka̱za a̱ yin hywa,

“Ka̱za a̱ bvan ba̱pfong Ka̱za ba a̱n yya wun,

ba̱kwwa nka ba ka bvan a̱n yya a̱riryem ndong.”

8Ma tazwa Ka̱won ka Ka̱za a̱ hywa,

“Ka̱za, dityok nwan ti byyi ka̱hywat ba,

koke dityok nwan ti ti ya sin kpang ka̱ryong a̱mi a̱n shyi.

9A cat kyang a yet ka̱ryong ni, ma a̱ka̱tuk a ku rak.

Nkpa n byyi Ka̱za nwan ka ka na̱ tssa

a̱ na̱ tyyi shok a̱ bo na̱ ryi digba̱dang

ti ra̱u tinti ni ka wrak kpikpit ba̱kpondang nwan na ni.”

10Ka̱za a̱ bo hywa,

“A̱gwam, nyyai ndoson nwan a̱mi yya ka̱sa ka;

di bvak nwan a bu nyya tazwa ji.

11Sa̱rei nna na ni tyak, ma nwan a byyi tyak ba.

Ba ni cak di ba̱tro ni.

12A ni ba̱ gut da̱ a̱godo ni

i ba̱ shei da̱ a̱yin na̱ nan kup a̱tro a̱ bo shei ni.

Ma nwan a byyi kop ba,

di sucet nwan na ku byyi tyak ba.”

13Ka̱za a̱ yin ta̱ba hywa di ko a̱pfong Ka̱za a̱yring,

“Swrang kyi mbvak yak nzuk

se n tyyi ba̱ra̱ndwan nwan ba ka̱byen a ba̱ shai” o?

14To, a̱nzan ba̱pfong Ka̱za ba ba yet? Sa̱rei mba ba yet tswa Ka̱za, mba a̱ yya Ka̱za dikwwa, Ka̱za ka ba̱ tssop ba cong a̱ brang ba̱nyet ba a̱ ni san sucet ni.

Currently Selected:

Ibraniyawa 1: kaj

Highlight

Copy

Compare