2 Korinti 5

1Rot zi bvwo ka̱ram ka tenti na zin su-swat ani i ka̱sa ka ni kun cak i, tenti iya nkpa yet ndwam njit a, Ka̱za a̱ ni za jyi ka̱ryi Tazwa zin swrang. Ka̱ryi ka ka nok di bvak nka ni, ba di mbvak ba̱neywu kan nok ba, di ka̱ryi ka ka byyi hwwei ba har a̱ba̱da. 2Naanini zi shyi i gwat i kwot a̱ssi tot ka̱ram ka ba nin za kup di ka̱ryi Tazwa ka ni. 3Ki ba za kup di ba̱tro iya, zi bu shyi ka̱gbyang brak ba. 4Ka̱ram ka zin shyi i rwam ani ni zi gwat bu ka̱bvung ka zi sswa ni. Ba di zi cat i wwon ndwam ani ba, ma zi cat i shya nying Tazwa na ku za kup, rot kyang a yet nying dikwu ni sucet a i gi kpo nwrang. 5Ka̱za a̱mi a̱ za yya a̱ ga za shei. A̱ za ryi Tswa nka ji zi yet shaida nkyang ji ka ni za yya mi ni.

6Rot a̱mi kozan ka̱ram zi swat ba̱ kpa̱u. Zi bu bvwo ki zi swat i na̱sa nani a̱ yet ndwam njit a ni, zi ya gang bu A̱gwam Yesu. 7Rot ka̱cyet njit ka a̱ shyi ntyyi rya, ba cyang da̱ a̱ssi ba. 8Zi tssa i wwon ndwam ani i gi shya swrang ba̱ A̱gwam njit u Yesu; nkpa n nin hywa ndya njit a swat ba̱ kpa̱u. 9Rot a̱mi zi bu sook ka̱yat ndya njit ka, ko zi shyi i rwam, ko zi shyi zan, zi yya kyang a na̱ nin hok ansham njit i. 10Rot zi bvwo sa̱rei njit zi ni sseng a̱ta̱ssi a̱ntwam shirya Kristi nu, koyan a̱ san ba̱cicrak bu kyang a na̱ yya i ka̱sa ka ni. Ki a̱ yya a̱tsatsak a̱ ni san a̱tsatsak; ki a̱ ma̱n yya a̱ka̱tuk na̱ san a̱ka̱tuk.

Yesu a̱ za brak a̱n yya ba̱rywai Ka̱za

11Njit zi bvwo kyang a yet tyong A̱gwam Yesu ni, rot a̱mi zi kwan kwwat ba̱nyet ba ku bvwo. Ka̱za a̱ bvwo ka̱cyet njit ka ba̱zizrak, n nin byyi rya nyin ma yi za bvwo ba̱zizrak. 12Ba di zi cat gba a̱ccu njit a̱mi da̱ nyin brak ba, ma zi ya jyet diwat yi gi ya gba a njit rot yi gi maai i tyyei ba̱nyet iya a̱ ya gba a nkyang a ba cyang ni a̱ ra̱u nkyang a shyi a mpfwa mba na ni. 13Ka̱ a̱ccu njit a a̱ brak, to, a̱zihywak Ka̱za a̱mi. Ko zi ma̱n swat zizrak, to, a̱zihywak nyin a̱mi. 14Cat Yesu Kristi a̱mi gwwak ndya njit a, rot zi bvwo ba̱zizrak, ki a̱tuba a̱yring a̱ yin kwu a̱zihywak ba̱nyet ba̱sa̱rei, to sa̱rei ba̱nyet iya a̱ ma̱n kwi ba̱ nu. 15A̱ kwu a̱zihywak ba̱nyet ba̱sa̱rei; rot a̱mi ba̱nyet ba a̱ ri swat a̱cet u ni a̱ bo ryok swat-swat a̱ccu mba ba rot ba ka̱n kwi ba̱ nu, seko ba swat-swat a̱tuba na a̱ kwu ba bo ku shyek a̱zihywak mba na ni.

16Rot a̱mi, zi bu byyi cyang a̱yin di ba̱nyet ka̱sa ba ni ba. Ko di ka̱ram iyemi zi yi yen cyang Yesu taka̱i cyang iya, ma naani zi bu ku cyang a̱mi ba. 17Ka̱ram ka a̱yin na̱n mon bu Yesu Kristi ni, a̱ brak a̱ tyyi a̱hwai a̱yin. A̱kukwo a̱yin a̱ywu a̱ wruk, a̱hwai a̱yin nu a̱n nwa. 18Ka̱za a̱mi a̱ yya nkyang ani sa̱rei rot dikwu Kristi ti, ka za brak nyyai i yet ba̱ra̱ndwan a̱n yya ba̱rywai; a̱ bo za ryi pfong kwak ba̱yanyet ba nwa dirywai ti ba̱ nka. 19Pfong a zi tyyei ni nkpa yet: Ka̱za a̱mi a̱ yin tom Yesu na̱ bu tyyi ba̱nyet ba ba tyyi ba̱rywai nka; wato Ka̱za a̱ sook a̱ka̱tukyya mba nu a̱ weyang, a̱ za tom zi bu tyyei ka̱sak ka ba nwa dirywai ba̱ nka ni.

20Njit zi yet wakilai Yesu a̱mi, Ka̱za a̱ za tom zi bu ya naai. Di ba̱pfong Yesu ni zi ya naai yi ryok Ka̱za a̱ ya brak nyyai i dira̱ndwan ti, yi yet ba̱rywai nka. 21Yesu Kristi a̱ yin byyi a̱ka̱tukyya ba, ma a̱zihywak njit Ka̱za a̱ ku tyyi na̱ yet a̱ntyok a̱ka̱tukyya, zi gi tyyi kyang yring ba̱ nu i gi ma̱n shya dizizrak Ka̱za ti.

Currently Selected:

2 Korinti 5: kaj

Highlight

Copy

Compare