2 Korinti 4

Cet na nyyai di Ka̱za, njit zi byyi cet ba

1Ka̱za a̱mi a̱ hok dizot njit a̱ za ryi pfong ani; rot a̱mi zi ni kpo yya bu ka̱wai ba. 2Zi ryok sa̱rei nkyang nsum a shyi i ka̱nrang ni; da̱ njit ba ya raai ba, da̱ njit ba tyyei ba̱ryat Ka̱za di diraa ba. Ma zi tyyei ka̱ryong ka ba̱zizrak i gi ya gba da̱ a̱huhwa ba̱nyet sa̱rei. 3Ma ki Ka̱sham Ba̱ryat ka zi tyyei ni a̱ shyi i ka̱nrang, ka shyi i ka̱nrang bu di ba̱nyet ba a̱ kwi ni. 4Ba rak san na rot a̱ka̱tuk a̱gwam ka̱sa nu a̱ tyyi ryin na a̱n hywat ndya mba na ni. A̱ ba̱ bvwo ryi ka̱bvwa sai ka ba yrang a̱ ba̱ wwon mi ni; nka a̱mi a̱ shyi i Ka̱sham Ba̱ryat ka zi tyyei tazwa shii Kristi ka ni, nu a̱mi zi ryi ka̱sak ka Ka̱za kan dyi ni da̱ nu ba̱zizrak. 5Wa'azi nu zi yya ni a̱ shyi tazwa a̱ccu njit ba. Zi yya wa'azi nu Yesu Kristi na̱n yet A̱gwam njit ni, njit zi ma̱n yet ba̱kwwa da̱ nyin rot kyang a Yesu na̱ za yya mi ni. 6Rot Ka̱za ka a̱ yin hywa, “Ryok ka̱bvwa sai a̱ nwa, ka̱bvwa ndyin ka a̱ brak sai,” nka a̱mi a̱ tyyi ka̱bvwa sai ka ka sai ka̱yat ndya njit ka a̱ ga za ba di bvwo Ka̱za na sai nyyai a a̱ssi Yesu Kristi na ni.

7Njit ba̱nyet ba a̱ shya taka̱i zwa iya ni zi ryi da̱ a̱kpam a̱ron ni, koyan a̱ ga bvwo a̱gba̱dang cet nu a̱ yet a̱nying Ka̱za, ku yet njiit ba. 8Ka̱ram ka̱yaan ba na za nyep ba̱t, ma ba nza gwwak ba. Ka̱ram ka̱yaan ba za tyyi a a̱ka̱tuk a̱huhwa, ma njit ba ntun ndya ba. 9Zi byyi ba̱ra̱ndwan ba̱gingang, ma zi ta̱ba ryin ba̱rywai ba. Ka̱ram ka̱yaan ba yya da̱ njit, ma ba za hywaai ba. 10Kozan ka̱ram zi swat-swat dikwu, taka̱i dikwu Yesu na, ba̱nyet a̱ ga bvwo swat Yesu na i taka̱i swat a zi swat i. 11Wato, i sucet njit a zi swat-swat dikwu zihywak Yesu, ba ga ryi sucet nu na i rwam dikwu njit a, ba̱nyet a̱ bvwo a̱yin nu Yesu na̱ yet i. 12Rot wa'azi njit ji zin shyi i dikwu, ma nkpa n byyi yin shyi bu sucet.

13Ba̱ryat Ka̱za a̱ hywa, “N san n sak i rya, nkpa n byyi n nin dyat.” Taka̱i tyyi rya iya a̱mi zi ma̱n byyi, njit zi ma̱n dyat rot zi san sak i rya. 14Zi bvwo Ka̱za ka a̱ yin yrek A̱gwam njit u Yesu bu sso ni a̱ ma̱ ni za yrek ba̱ nu Yesu, a̱ nat ba̱ njit bu sa̱rei nyin zi si sseng a̱ta̱ssi nka. 15Sa̱rei nkyang ani a̱zihywak nyin a̱mi, ba̱nyet ba̱gingang a̱ ga shya aliheri Ka̱za nu a̱ ka̱ dyep, a̱ bo tyyei shii Ka̱za na.

Ndya njit a shyi i ka̱ryi ka Ka̱za ka za nok i ni

16Nkpa n byyi zi ka̱n wi tun rya na. Ko di ndwam ani zi byyi ni nan sswa ka̱bvung i, tswa njit ji bvan yet swai kozan ka̱tuk. 17Ka̱babvung ka zi yen sswa ni a̱ ni seyak ba̱nyying zi nwa a̱gba̱dang gwai u a̱ byyi tyak ni ba, nying ji ran ka̱bvung ka zi sswa ni. 18Rot zi sak ka̱ssi njit ka a nkyang a ba wi cyang da̱ a̱ssi ni, ma ba a nkyang a ba cyang da̱ a̱ssi ni ba. Nkyang a ba cyang da̱ a̱ssi ni a̱ na da̱de ba, ma nkyang a ba wi cyang da̱ a̱ssi ni byyi tyak ba.

Currently Selected:

2 Korinti 4: kaj

Highlight

Copy

Compare