2 Korinti 1
1
1Nzuk Bulut, a̱tuba nu Ka̱za ka tssa n yet a̱pfong Yesu Kristi ni, bu Timoti, a̱wumba nzuk, zi jem ba̱nyet tssup ba a̱ shyi Korinti ni bu sa̱rei ba̱nyet Ka̱za ba a̱ shyi i ka̱byen Akaya ni.
2Ka̱za ka a̱ yet A̱tyyi njit ni bu A̱gwam njit Yesu Kristi a̱ ya ryi aliheri mba nu bu myyi rya.
Ta̱gbak Ka̱za ka̱ram ka̱bvung
3Zi dyep Ka̱za. Nka a̱ bo yet A̱tyyi A̱gwam njit u Yesu Kristi, A̱tyyi nu a̱ pfong dizot njit i, nu a̱mi a̱ bo za ta̱gbak. 4Nu a̱mi a̱ za ta̱gbak sa̱rei i ka̱bvung ka zi sswa ni, njit meyang zi gi ma̱n ta̱gbak ba̱nyet ba a̱ shyi i sswa na̱bvung ba̱zi taka̱i ni, zi ba̱ ta̱gbak ka̱sak ka Ka̱za kan za ta̱gbak ni. 5Ka̱sak ka zin byyi bvak a duniya ka̱bvung u Kristi na̱ sswa ni, a̱mi brak zi bun byyi bvak i ta̱gbak a na̱n ta̱gbak ba̱nyet ba ni. 6Ki zi sswa ka̱bvung, zi hywak nyin a̱mi zin sswa, zi gi ya ta̱gbak, yi gi shya sucet. Ki ba za ta̱gbak, zi hywak nyin a̱mi, ba ga ya ta̱gbak meyang, rot yi bvwo ta̱gbak a ni ya ryi cet sseng di hakuri ka̱ram ka yin sswa ka̱bvung bu ka̱yring bu kanka zin sswa ni. 7Rot a̱mi zin breng rya yi ni tyyi tintying ba, zi bvwo ka̱sak ka yin sswa ka̱bvung ka ba̱ njit ni, a̱mi brak yi bun byyi bvak i ta̱gbak njit a.
8Ba̱wumbeyang, zi cat yi bvwo ka̱bvung ka zi si nwa i ka̱byen Asiya ni, ka̱bvung ka ba yin za cot i ni a̱ yin sswa cet njit ba̱gingang, har ma zin tun rya bu yet ba̱cet. 9Zi ryi a ndya njit a anye ba za yya shirya dikwu, a̱ yemi dei zi gi bvwo njit a̱ccu njit zi maai i ya san ba se zi cyang Ka̱za ka a̱ wwat nkom sso ni. 10Ka̱yat ka̱bvung iya ka̱nu dikwu na̱ za san a̱ wwon; nu a̱mi a̱ bo ni za san. Nu a̱mi zi bun cyang ko a̱zanson na̱ bo ni za san, 11da̱ni di yin za brang ka̱yat a̱duwa nyin ka ni. A̱mi ba̱nyet ba̱gingang ba nin naai Ka̱za ka za ryi ka̱nu-a̱tan nka nu a̱ za cam ni, har na̱wan ba̱nyet ba̱gingang a̱ bo ka̱ dyep.
Kyang a tyyi Bulut a̱n trip nat Korinti ni
12Ba̱ngam njit bamba a̱ yet: zi byyi a̱zizrak a̱huhwa nu a̱ za tyyei di zi swat a̱tsatsak nswat i ka̱sa ka ni, a̱tsatsak bu a̱zizrak swat njit u ba̱ nyin a̱ nyyai di Ka̱za. Zi yya a̱mi ba di zi hyong a̱za̱ncyi yet ba̱neywu ba, ma za̱nang Ka̱za a̱mi za brang. 13-14Ba̱wasika ba njit zi ya jem mi ni a̱ byyi kyang yaan ba̱zan ba, se kyang a yi ni maai twang i bvwo ni. N nin byyi rya nom yaan yi ni bvwo kpikpit nkyang a yi ri swat bvwo na ni, ka̱tuk ba A̱gwam njit ka Yesu yi gi ya cin a̱za̱ njit ka̱sak ka zin ya cin a nyin ni.
15Zi wrak ka̱ryong an nyin, yi ma̱n wrak ka̱ryong an njit; nkpa yin byyi n nin sak nyyai ka̱tsitsrang ka n ni ba da̱ nyin, yi gi bu shya ka̱nu-a̱tan nkrang a̱hwa. 16Rot n sak n ni hyok da̱ nyin a̱mi ki n naat Makidoniya; ki n bo si brek n hyok da̱ nyin, yi n brang n seyak naat Yahudiya. 17To, ka̱ram ka n nin zzop ka̱cyet kani ni, n yin yya bu dira̱ntong o? Ki n yin ka̱ zzop rot cat diccu? Ki ni hywa “Ee” n bo brak n hywa “Kaai” bu i ka̱ram ka̱yring? 18Da̱ni di yin bvwo Ka̱za ka nan dop kyang a̱ bo byyik ni ba, a̱mi ba̱ryat ba zi yin ya tyyei ni, ba yin yet “Ee” bu “Kaai” ba. 19Rot nu Yesu nu a̱ yet Ka̱won Ka̱za ka ni, a̱tuba nu nzuk bu Sila bu Timoti zi yya wa'azi nu nu ni a̱ byyi na̱nu na̱hwa ba. Nu a̱ yet “Ee” ba “Kaai” ba, nu a̱mi a̱ yet shim Ka̱za na 20rot sa̱rei nkyang a Ka̱za ka yin dop a̱wwon a̱ ni yya ni yet “Ee” ka̱yat Yesu. Rot a̱mi ka̱yat nu a̱mi zin tyei “Amin” nu zi tyei ni i gin dyep Ka̱za. 21Ka̱za a̱mi a̱ ni za ryi maai a zi ni maai i sseng ansham a̱ta̱ssi Yesu ka ni, sa̱rei ba̱ nyin. Nka a̱mi a̱ za tssa a̱ tun 22a̱ za zzu lamba nying na ni tyyei ka̱sak ka zin yet ba̱nuu ba ni, a̱ bo za ryi Tswa nka ji zi yet shaida kyang a Ka̱za ka sak a̱ ni za ryi ni.
23Ka̱za a̱mi a̱ yet shaida nzuk. N cat yi sswa ka̱bvung ba, nkpa n byyi n nin dyok ba̱ryat bai da̱ nyin ba. 24Ba di zi ya tyyei cet an kyang a yi ni tssup i ba, rot zi bvwo ndya nyin na sseng di cet i tssup a; ma zi yya pfong ba̱ nyin yi gi byyi rya sai.
Currently Selected:
2 Korinti 1: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
