1 Timoti 1
1
1Nzuk Bulut, a̱tuba nu Ka̱za a̱ntyok za san bu Yesu Kristi A̱gwam njit ba yei, a̱ tyyi na̱ yet a̱pfong Yesu Kristi ni, ka̱rek tyyi ndya njit, nzuk n jem wasika a̱ni.
2N na̱ jem mi, nwan Timoti, ka̱won mbyin nzuk ka̱yat ka̱ryong. A̱liheri bu kun dizot bu myyi rya nyyai di Ka̱za A̱tyyi njit bu Yesu A̱gwam njit i swrang ba̱ nwan.
Ba̱malam diraa
3A bvwo ka̱ram ka n yin swrap naat Makidoniya nu ni, n hywa di a swrang Afisa. N ri cat a yen swrang ka̱ yemi. Kyang a mbyyi ni, ba̱yanyet a̱n shyi ka̱ yemi a̱ nwa a̱ka̱tuk zzek. N cat a ba̱ kam ba ryok. 4Tyyi ba ryok ninyying nkhang a ba tsaai i, bu twang a̱yiyrek ba̱tyyi na, rot na tyei ba̱ a̱cecet. Na ni tyyi zi bvwo kyang a Ka̱za ka cat zi yya ni ba, se ta ka̱rek wrak Ka̱za ndya njit ka zi nin bvwo kyang a ka cat zi yya ni. 5N na̱ tyyei a̱mi a gi ba̱ tyyi ba gwai ba̱yaan di cat a nyyai di a̱zizrak ndya, bu a̱zizrak a̱huhwa, bu ntyyi rya yring i tssup Yesu ni. 6Ba̱yanyet a̱ ka̱n wwon nkyang ani a̱ sook ndya mba na a̱ tyyi a a̱kpam ba̱ryat. 7Ba cat zzek Truwang Musa ji, ma ba bvwo kyang a ba ryat i ba. Ba zzek ba̱set, ma di ba bvwo kyang a ba zzek i ba.
8Zi bvwo Truwang Musa ji yet, ki zi za̱ breng ka̱sak ka Ka̱za kan cat i. 9Nyin yi bvwo ba̱tsatsak ba̱nyet ba ba̱ yya Truwang ji ba, ba̱ka̱tuk ba̱nyet a̱mi, da̱ni di ba̱nyet swrap Truwang bani, bu ba̱nyet bvei a̱bvun, bu ba̱nyet wi pfong ka̱wun Ka̱za, bu ba̱nyet a̱ka̱tukyya bu ba̱nyet wi tssup Ka̱za, ba̱nyet hywaai ba̱tyyi bu ba̱naa, bu ba̱nyet hywaai ba̱nyet, 10ba̱kan-a̱naan bu ba̱ntyok kwai bu ba̱yaan, ba̱nyet zzing ba̱nyet zzap, ba̱nyet bvei diraa bu ba̱nyet ssing tai ko ba̱nyet ba a̱ yya nkyang wi myim ba̱ a̱tsatsak zzek u ni. 11Zzek ani nkpa yet Ka̱sham Ba̱ryat ka ba n dyi n tyyei ni. Zzek ani nyyai da̱ A̱gwam Ka̱za, A̱ntyok ka̱nu-a̱tan.
Zi dyep Ka̱za i pfong dizot ti ka za pfong i ni
12N gwai Yesu Kristi A̱gwam njit i, na̱ ni n dyi cet mpfong a n yya ni. N gwai na̱n dyi n maai na̱ n yei n ku yya dikwwa. 13Ko nnyyai ka anye nzuk a̱mi yin ku ryat a̱ka̱tuk ba̱ryat u, n sak dira̱ndwan ba̱ nu, n bo n ku pfwei o? Ma Ka̱za a̱ hok dizot nzuk, rot ka̱ram iya n ka̱n bvwo Yesu ba, da an yin bvwo kyang a n yya ni ba. 14Ka̱za a̱ hok dizot nzuk ba̱gingang a̱ tyyi n wrak Yesu rya nzuk a, a̱ bo n nang cat a shyi ka̱yat Yesu Kristi ni. 15Ba̱ryat bani a̱ yet ka̱ryong a̱ bo myim zi san ba̱sa̱rei di ndya njit a, mba a̱ za tyyei ka̱sak ka Yesu na̱n ba ka̱sa ka a̱ ga bu san ba̱nyet a̱ka̱tukyya ni, nzuk n si n yet a̱ngwak mba nu. 16Ma Ka̱za a̱ hok dizot nzuk, Yesu a̱ ga shya hywak tyyei hakuri nu na di ba̱nyet da̱ni da nzuk ni, a̱ngwak ba̱nyet a̱ka̱tukyya nu, ba̱nyet ba a̱ ri bai da̱ nu ni a̱ ga ryi a̱n tyyi kap a̱ ku san a̱ ga shya sucet wityak. 17A̱gwam Ka̱za nu a̱ byyi sucet wityak ni. Di ba nku ryi ba. Nu ba̱diyin a̱ yet Ka̱za. Zi ku yya sujada i ku ryi shii wi byyi ka̱hywat! Amin.
18N tyei ba̱ryat bani a mpfwa nwan Timoti, ka̱won nzuk. Mba a nin zzek ba̱nyet ba, ba tssup kyang a Ka̱za ka yin tyyi ba̱nyet a̱ ryat tazwa nwan ni nyyai gba̱gbang. Ba̱ breng ansham i gi maai kwan a̱tsatsak zwang u a̱ shyi a̱ta̱ssi nwan ni ansham. 19Wrak Yesu rya nwan na i bu yya kyang a myim i. Ba̱yanyet a̱ ka̱n dak yya nkyang a myim ni. Rot a̱mi ba wwon wwat Ka̱za ndya mba na. 20Ntaka̱i ba̱nyet Himanayat bu Alezanda n ka̱n ba̱ yrik n tyyi an bvak Ka̱ta̱nyrang ka yen ba̱ nyyek, ba ga tyong pfwei Ka̱za.
Currently Selected:
1 Timoti 1: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
