1 Korinti 3

Ba̱kwwa Ka̱za

1Ba̱wumbeyang, n yin dyat ba̱ nyin ka̱sak ka n si bu n dyat bu ba̱nyet ba a̱ byyi Tswa Ka̱za ni ba. N yin dyat ba̱ nyin di ba̱nyet ka̱sa bani ni, di ba̱nyet ba a̱ si yet na̱mawon i tssup a ni. 2N yin ya tyei kyangya ba, ba̱byyang a̱mi n yi ya tyei i, rot yi yin maai ya kyangya ba. Ko ba̱nyying ma yi ka̱n maai ba, 3rot yi swat di ba̱nyet ka̱sa ba ni. Yin byyi swam bu zok bu ba̱yaan ni; nkyang iya tyyei ka̱sak ka yin swat di ba̱nyet ka̱sa ba ni. 4Ba̱yanyet nyin a̱ hywa, “Zi shyi bu Bulut,” ba̱yanyet a̱ ma̱n hywa, “Zi shyi bu Apollot.” Ki yi yya a̱mi, yi shyak bu ba̱nyet ka̱sa baa?

5Ba̱ a̱nzan a̱ yin yet Apollot bu Bulut u? A̱nzan zi yet wwon ba̱kwwa Ka̱za ba? Zi yet bu ryen na yi sook n bvwo Ka̱za ni. Koyan ka̱yat njit a̱ yya pfong a Ka̱za kan ku tyyi ni. 6Nzuk n tup; Apollot a̱n tyei ba̱shekwot ba; ma Ka̱za nka a̱ tyei yak a kun dai. 7A̱ntyok tup u ba̱ a̱ntyok tyei ba̱shekwot u a̱ shyi an kyang ba. Ka̱za nka a̱ shyi a̱zanson, rot nka a̱mi a̱n byyi yak a kun dai. 8A̱ntyok tssup u ba̱ a̱ntyok tyei ba̱shekwot u, ba shyak kyang ba. Ka̱za a̱ ni wrak koyan zang nu ba̱cicrak bu kyang a na̱ yya ni. 9Njit zi yet ba̱kpondang mpfong Ka̱za a̱mi; a̱wwon nyin a̱mi yet ka̱byen mpfong ka.

Yi bu yet dinok Ka̱za. 10I za̱nang ji Ka̱za ka n nang i nying bvwo ka̱sham dinok, nkpa n nin tyyi ka̱tsan dinok ka, wwon a̱yanyet na̱ shyi i dinok ti. Seko koyan a̱ ta̱rwam bu ka̱sak ka na̱n nok i. 11Rot Ka̱za a̱ tssa Yesu Kristi ba̱diyin na̱ yet dityin dinok ti, ba bo maai tuk ka̱tsan dinok ka̱yaan ba. 12Shim ba̱yanyet a̱ ni nok di zinariya, ba̱yanyet da̱ a̱zurfa, ba̱yanyet di na̱sham nkpang, ba̱yanyet di nkon, ba̱yanyet di ba̱pyyi ko di ta̱nkwo. 13Sa̱rei ba ni mak pfong koyan ka̱tuk ba Yesu. Ka̱tuk iya a̱mi ba nin tyyang pfong koyan di rong. Rong a ni mak ba ryi kyang a pfong koyan ku yet i. 14Pfong a̱yin na rong ku hwwi ni ba a̱ ni san zang nu. 15Ma a̱yin nu pfong nu ku ya rong i, a̱ ya rot. Nnu diccu nu ti a̱ ni kaat, ma anye a̱yin nu a̱ shyi ka̱yat ndong i.

16Nyin yi bvwo ba̱zizrak ka̱sak ka ndwam nyin na nan yet ka̱ryi Ka̱za ni, Tswa Ka̱za ji swat ka̱yat nyin. 17A̱yin nu a̱ byyan ka̱ryi Ka̱za ni na̱ swat a̱ bvwo Ka̱za a̱ ma̱ ni ku byyan. Rot yi bvwo dolet ka̱ryi Ka̱za ka a̱ yet a̱zizrak nka, nyin a̱mi yet ka̱bvwa swat nu ka.

18Yi ryok ya raai ba. A̱yin nu a̱ hwa da̱ byyi a̱za̱ncyi i swat ka̱sa kani ni, goma na̱ wa ya brak a̱n yya a̱bvwon a̱ ga shya a̱za̱ncyi ka̱ryong a. 19Rot kyang a yet a̱za̱ncyi na i bvwo ka̱sa na ni, ka̱bvwa Ka̱za ku yet bvwon. Nkpa n byyi ba̱ryat Ka̱za ba ban hywa, “Ka̱za a̱ pyyem ba̱nyet a̱za̱ncyi ba i cat tyyei a̱za̱ncyi mba na.” 20Ka̱bvwa ka̱yaan a̱ bo hywa, “Ka̱za a̱ cyang a̱huhwa ba̱nyet a̱za̱ncyi ka̱nu nkyang ba.” 21Rot a̱mi ku myim a̱yin a̱ yya dingwak an kyang a ba̱nyet ba maai yya ni ba. Kozan kyang yet nyiin: 22di Bulut, di Apollot, di Bitut, nta̱mak bu ka̱sa ka, di sso di dikwu, nkyang ka̱ram ani bu nying ri bai, sa̱rei na yet nyiin, -- 23nyin yi yet ba̱nying Yesu, Yesu a̱ bo ma̱n yet a̱nying Ka̱za.

Currently Selected:

1 Korinti 3: kaj

Highlight

Copy

Compare