1 Korinti 13
13
1Ko n hok n dyat di a̱riryem ba̱nyet ka̱sa na nta̱mak bu nying ba̱pfong Ka̱za, ki n cat ba̱nyet ba, sa̱rei kyang a n dyat i yet ba̱ a̱cwrya di rak i. 2Ko n byyi za̱nang ssang ba̱ryat Ka̱za ntyyei, n bo n bvwo kozan kyang a shyi i ka̱nrang ni bu kozan kyang a ba̱nyet ba bvwo ni, n bo n byyi tyyi rya maai yyit a̱huhwan nkwot, ma ki n cat ba̱nyet ba, n shi-shyi an kyang ba. 3Ko n si bu wrak sa̱rei nkyang a n byyi ni, n bo n wrak rwam nzuk a ba hwwi a̱nta̱mak, ma ki n cat ba̱nyet ba, ku ni n dyi kyang ba.
4Cat ba̱nyet byyi hakuri bu dizot, cat byyi swam ba, di ku ya cin ba, di ku yet diccu ba. 5Cat byyi sang kap ba, i byyi cat diccu ba, cat pfong diryen ahwa ba, ku na swat bu ka̱hwa a̱yin ba. 6Cat na pfong ansham cyang a̱ka̱tuk ba, ma i pfong ansham i ka̱ryong. 7Cat na rwan bu ntyyi rya ba, di ku na rwan bu tot kyang ba, di ku na rwan bu yya hakuri ba.
8Cat ba̱nyet di ka̱ryong tyyai ba. Ssang ba̱ryat Ka̱za tyyei ni tyak, ryat a a̱riryem ni tyak, bvwo ma ni tyak. 9Rot bvwo njit a yet a̱jyem ba, di ssang ba̱ryat Ka̱za ba tyyei ku yet a̱jyem ba. 10Ma ka̱ram ka a̱jyem u na̱n ba ni, a̱nuni a̱ wi yet a̱jyem u ni a̱ brik.
11Ka̱ram ka n yin yet ka̱bawon ni, ba̱ryat nzuk ba a̱ yin yet bu da̱won, a̱huhwa nzuk u bu nkyang nzaan na n yya ni i yet nying da̱won; ma ba̱nyying n tyyi a̱ra̱ntyok ni, n tun yya da̱won ji n jing. 12Ba̱nyying, nkyang a zi cyang ni anye zi cyang a gbyik ma̱dubi. Ma ka̱tuk iya a̱ bai zi ni cyang a̱ssi ba̱ a̱ssi. Ba̱nyying, bvwo nzuk a maai ba, ma ka̱tuk iya n ni bvwo kozan kyang ba̱zizrak, da̱ni di nu na̱ ni n bvwo ba̱zizrak i.
13Nkyang ntat ani ni tyak ba: tyyi rya, bu sak rya, bu cat ba̱nyet. Ma a̱kpok mba nu nu a̱ yet cat ba̱nyet.
Currently Selected:
1 Korinti 13: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
