Mateus 10

Ovahongewa omurongo na vevari

(Mk 3:13-19; Lk 6:12-16)

1Jesus wa isanene imba ovahongewa ve omurongo na vevari pamwe ne ve pe omasa okupitisa ozombepo ozohakohoke nokuverukisa omitjise nomihihamo omingi pekepeke. 2Nomana wovaapostele imba omurongo na vevari owo nga: Omutenga oSimon ngwaa ku zu oPetrus nomuangu we Andreas; na Jakobus nomuangu we Johanes, ovazandu va Sebedeus; 3na Filipus na Bartolomeus na Tomas na Mateus, omusutise wotjimariva tjouhona, na Jakobus, omuzandu wa Alfeus, na Tadeus; 4na Simon, Omuseloti, na Judas Iskariot, ingwi ngwa kahorora Jesus movineya.

Otjiungura tjaimba omurongo na vevari

(Mk 6:7-13; Lk 9:1-6)

5Jesus wa hindire ovarumendu omurongo na vevari mba ame ve raere omambo nga: “Ngaamu i kehi ngamwa mu mwa tura omihoko mbi he ri Ovajuda na kovirongo avihe vyOvasamaria wina. 6Moruveze rwanao twendeye kozonḓu nḓa nḓa pandjara, ihi otjiwaṋa tja Israel. 7Kazuvariseye mu tje: ‘Ouhona womayuru weya popezu!’ 8Kaverukiseye ovavere, mu kapendure ovakoke, mu kakohorore ovanamitjise vyongana, nu mu kapitise ozombepo ozohakohoke movandu. Eṋe mwa pewa uriri, nopu mwa sokuyandja uriri wina. 9Ngaamu twaerere otjimariva otjingoldo notjisilveri notjingoporo mozondjaṱu zeṋu. 10#1Kor 9:14; 1Tim 5:18Nu wina ngaamu toora onguta yondjira nangarire ozombanda mbari nozongaku nokati. Omuungure u sokupewa imbi mbi ma hepa.

11“Tji mwe ya motjihuro poo motjirongo tjorive hiteye mu tjo, mu pahe omundu ngu ma vanga okumusekirisa, nu mu kare mbo nga tji mamu zu po rukwao. 12Tji mwa kahita mondjuwo yorive katjeye: ‘Ohange ngai kare na eṋe.’ 13Novandu mondjuwo ndjo tji ve mu yakura, ombinika yeṋu yohange ngai kare na wo; nungwari owo tji ve he mu yakurire, ohange yeṋu ngai kotoke ku eṋe. 14#Oviu 13:51Nu tji pe nomundu ngu hi nokumusekirisa nu ngu hi nokupuratena ku eṋe, piteye mondjuwo ndjo na motjirongo ho, nu mu pume oruuma kozombaze zeṋu. 15#Mt 11:24 Gen 19:24-28#Lk 10:4-12Tjiri, me mu raere, mEyuva rOmbanguriro Ndjambi ma ṱotjari novature vovihuro oSodom na Gomora okukapita ovandu votjirongo ho!

Omatatumisiro ngu maye ya

(Mk 13:9-13; Lk 21:12-17)

16 # Lk 10:3 “Twendeye! Ami me mu hindi otja ozonḓu mokati korupanda rwozombungu. Rireye ozongengeze otja ozonyoka nozongozu otja ozonguti. 17#Mk 13:9-11; Lk 12:11, 12; 21:12-15Ṱakamiseye nawa, orondu mape kara ovandu mbu mave mu kambura ave mu twara kotjombanguriro, nu mbu mave mu tonene mozosinagoge. 18Eṋe mamu etwa kotjombanguriro komurungu wovanane wOtukondwa nozombara motjimbe tjandje, okuyekuhongonona Ombuze Ombwa ku wo na imba mbe he ri Ovajuda. 19Tji mave mu eta kotjombanguriro, amu rikende kutja mamu kahungira tjike nu mamu kahungira vi; oruveze tji rweya eṋe mamu raerwa imbi mbi mamu sokuhungira, 20omambo ngu mamu kahungira tjinga aye hi nokurira oweṋu oveni nu amaye zu kOmbepo ya Iho ndji mai hungire mu eṋe.

21 # Mk 13:12; Lk 21:16 “Erumbi ma yandja omuangu we kokuṱa, nu ihe otjinga ama tjiti tjingetjo komuatje we; ovanatje mave sekamene ovanene vawo nave ve zepa. 22#Mt 24:9; Mk 13:13; Lk 21:17 Mt 24:13; Mk 13:13Avehe mave mu tondo mena randje. Nungwari ingwi ngu ma panḓere po nga komaandero ma yamwa. 23Tji mave mu tatumisa motjirongo tjimwe taurireye ku tjarwe. Tjiri, me mu raere kutja kamaamu mana oviungura vyeṋu movirongo avihe vya Israel, Omuna wOmundu ngunda e hiye ya.

24 # Lk 6:40 Jhn 13:16; 15:20 “Omuhongewa kamunene pomumuhonge, nomukarere kamunene pomuhona we. 25#Mt 9:34; 12:24; Mk 3:22; Lk 11:15Omuhongewa opa sokukarera nohange kutja u ri otja omumuhonge, nomukarere kutja u ri otja omuhona we. Otjiuru tjonganda tji tja rukwa Beelsebul, okutja ouṋepo auhe wonganda mau rukwa omana omavi tjinene komeho!

Owaṋi ngwa pwa okutiriwa?

(Lk 12:2-7)

26 # Mk 4:22; Lk 8:17 “Otji mu ha sokutira ovandu. Kape notjiṋa nambano tji tja vandekwa tji tji hi nokuvandururwa, na tji tja undikwa tji tji hi nokutjiukisiwa. 27Imbi ami mbi me mu raerere monḓorera kevitjiviseye mondjerera, nu imbi eṋe mbi mwa zuu mongumumu mamu sokukevizuvarisira komitutu vyozondjuwo. 28Amu tira imba mbe zepa orutu, nungwari mbe ha sora okuzepa omuinyo; tjinene tireye Ndjambi ngu ma sora okunyonena orutu nomuinyo motjovasengwa. 29Ozondjandja mbari kaze randwa kosenta imwe are? Nungwari kape na imwe yazo ndji mai wire pehi, Iho e hi nokuvanga nao. 30Nu wina inḓa ozondjise zoviuru vyeṋu azehe za varwa. 31Otji mu ha sokutira; oweṋe ovananḓengu tjinene pozondjandja ozengi!

Okuhongonona nokupataṋa Kristus

(Lk 12:8-9)

32“Auhe ngu ma hongonona kutja owandje komurungu wovandu, ami wina otjinga ame mu hongonona komurungu wa Tate meyuru. 33#2Tim 2:12Nungwari ngu me ndji pataṋa komurungu wovandu, ami wina otjinga me mu pataṋa komurungu wa Tate meyuru.

Ka hange nungwari engaruvyo

(Lk 12:51-53; 14:26-27)

34“Amu tjangovasi ami mbe era okueta ohange mouye. Kako, ami hi ere okueta ohange, nungwari mbe era okueta engaruvyo. 35#Mika 7:6Ami mba yendera okutwa omuna kumwe na ihe, omukazona kumwe na ina, omusuko omukwe kumwe na ina omukwe; 36ii, ovanavita tjinene na ingwi omuini wonganda mave rire imba owondjuwo ye omuini.

37“Auhe ngwa suvera ihe na ina okukapita ami ka pwire okurira omuhongewa wandje; auhe ngwa suvera omuna we nomuatje we omukazona okukapita ami ka pwire okurira omuhongewa wandje. 38#Mt 16:24; Mk 8:34; Lk 9:23Ingwi ngu hi nokutoora otjikoroise tje ne ndji kongorere, ka pwire okurira omuhongewa wandje. 39#Mt 16:25; Mk 8:35; Lk 9:24; 17:33; Jhn 12:25Nu auhe ngu ma yama omuinyo we omuini me u pandjarisa; nungwari ngu ma pandjarisire ami omuinyo we me u yama.

Ondjambi

(Mk 9:41)

40 # Lk 10:16; Jhn 13:20 Mk 9:37; Lk 9:48 “Auhe ngu memu sekirisa me ndji sekirisa; nu auhe ngu me ndji yakura ma yakura ingwi ngwe ndji hinda. 41Ngu ma sekirisa omuprofete wa Ndjambi mena rokutja omuprofete wa Ndjambi ma munu ondjambi yomuprofete. Nu ngu ma yakura omusemba mena rokutja omusemba, eye ma munu ondjambi yomusemba. 42Ngu ma yandja otjinwino tjomeva omatarazu ku umwe wa imba ovahongewa vandje ovaṱiṱi mba mena rokutja eye omuhongewa wandje, tjiri, me mu raere, eye ma pewa ondjambi ye.”

Currently Selected:

Mateus 10: HRR-UNI

Highlight

Copy