Oviungura 25

Paulus me riheke kombara yopondomba

1Kombunda yomayuva yetatu Festus tja za nokuya mehi, arire tja zu kOsesarea na i kOjerusalem. 2Nu koṋa ngo ovapristeri oviuru novanane vOvajuda va raisa omarondororero wawo nga tjamene na Paulus. Owo ve riheka ku Festus 3kutja e ve tjitire ondjingonekero yokueta Paulus kOjerusalem, owo tjinga ava tjita omerikutirokumwe wokuzepa Paulus mondjira. 4Nungwari Festus wa zirire a tja: “Paulus u ri mondjeverero mOsesarea, nami omuini me yaruka ngo kombunda yomayuva omasupi. 5Ovanane veṋu ngave ye tu yende pamwe kOsesarea ve karondore omurumendu ngwi ndoovazu eye u nouvi mbwa tjita.”

6Festus wa kara omayuva hambondatu nga komurongo puna wo, okuzambo a i kOsesarea. Mependukirwa eye wa kahaama motjombanguriro na rakiza kutja Paulus a hitisiwe. 7Nu Paulus tje ya, Ovajuda mba zire kOjerusalem va kuramene okumukondoroka nave utu okumukuminina oviṋa ovinene tjinene mbyaa ve ha yenene okuraisa. 8Nungwari Paulus we riyeura omuini a tja: “Ami hi na tji mba tataiza mOmatwako wOvajuda na kondjuwo ya Muhona na kombara ya Roma.”

9Nungwari Festus wa vangere okuritjatisa kOvajuda, nopa purira Paulus a tja: “Ove movanga okuyenda kOjerusalem okukapangurirwa omakuminino nga komurungu wandje?”

10Paulus wa zirire a tja: “Ami nai mba kurama mba mombanguriro yombara oini mu mba sokupangurirwa. Hiya tjita ouhasemba kOvajuda otja ove omuini punga amo tjiwa. 11Nu andakuzu mba tjita ouhasemba ku mesokupangurirwa konḓiro, ami hitje kondja okuupenga. Nungwari tji pe hi nouatjiri momarondororero ngu mave ndji rondora na wo, kape nomundu ngu ma sokundjiyandja ku wo. Ami opu me yarurire mo otjiposa tjandje kotjombanguriro tjombara.”

12Nu Festus tja za nokuhungira novayandjandunge ve, arire tja ziri nai: “Ove wa yarura mo otjiposa tjoye kotjombanguriro tjombara, okutja mo i kombara ndji.”

Paulus komurungu wa Agripa na Bernise

13Nomayuva tjiva tji ya kapita ombara Agripa na Bernise ve ere kOsesarea okuyekuvarura nokuminika Festus. 14Nowo tji va kara omayuva omengi mo, Festus arire tja handjaurire ombara otjiposa tja Paulus a tja: “Muno mu nomurumendu Feliks ngwa sya momapando. 15Nami tji mba ire kOjerusalem ovapristeri oviuru vOvajuda novanene otji ve mu rondora nave ndji ningire kutja mbi mu mune ondjo. 16Nungwari ami mbe ve raera kutja eṱe Ovaroma katu notjikaro tjokukutura omundu ngwa kumininwa ouvi, ngunda e hiya hakaena novemukuminine omurungu nomurungu ne hiya pewa oruveze rwokuriyeura omuini komakuminino nga. 17Nowo tji ve ya nguno, ami hi wombere ko, nungwari mependukirwa mba kahaama motjombanguriro ne ve rakiza kutja omurumendu ngo a hitisiwe. 18Ovemukuminine va sekamene, nungwari owo kave na pu ve mu kuminina ouvi auhe ami mbu mba tjangovasi mave mu kuminine. 19Nḓu va kara na zo na ye porwazo ozombata, nḓa tjama nongamburiro yawo oveni, na wina nḓa tjama nomurumendu wena Jesus ngwa ṱa, nungwari Paulus ngwa tja u nomuinyo. 20Ami tjinga ee ripura pevari kutja ondjakaha ndji me ṱunu vi, otjinga amba pura Paulus kutja mape ya a i kOjerusalem okukapangurirwa omarondororero nga koṋa ngo. 21Nungwari Paulus wa yarura mo otjiposa tje kotjombanguriro tjombara ya Roma, nokutja oyo i tye otjiposa tje. Ami opu mba rakizira kutja eye a tjeverwe nga ami tji mba yenene okumuhinda kombara yopondomba.”

22Nu Agripa wa tja ku Festus: “Ami omuini etje vanga okuzuva omurumendu ngwi.”

Festus a ziri a tja: “Ove mo mu zuu muhuka.”

23Mependukirwa Agripa na Bernise ve ya otja ovandu ovayozikwa tjinene nave hiti mondjuwo yombongarero puna ovanane wovita novanene votjihuro. Festus wa raya kutja Paulus a kaetwe neye arire tja hitisiwa. 24Festus wa tja: “Mbara Agripa na eṋe amuhe mbu mu ri puna eṱe mba: Eṋe mamu munu omurumendu ngwi Ovajuda avehe muno na mOjerusalem ngu ve mu etera otjiposa ku ami. Owo mave ravaere kutja nga ṱe. 25Nungwari ami hi mwine otjiṋa tja tjita puma pwire okupangurirwa onḓiro. Neye omuini tjinga a yarura mo otjiposa tje kombara yopondomba ami otjinga amba tya okumuhinda kOroma. 26Ami hi notjiṋa tjouatjiri tji tja tjama na ye tji mba sokutjanga kombara yopondomba. Opu mba zu okumueta mba komurungu woye, nu tjinene kove, mbara Agripa, kokutja otjiposa tje tji tja konḓononwa ami mbi sore okukara nomambo ngu me tjanga. 27Orondu me tjangovasi ouyova okuhinda omupandekwa kOroma nokuhinokuraisa noukahu imbi puma perwa ondjo.”

Currently Selected:

Oviungura 25: HRR-UNI

Highlight

Copy