2 Ovatesalonika 3
3
Tukumbireye
1Orupa orusenina me vanga okutja nai: Vakwetu, tu kumbireye, kutja embo ra Muhona ri handjauke tjimanga nu akuhe ri yakurwe otja tji ra yakurwa i eṋe. 2Wina kumbeye kutja Ndjambi e tu kuture kovandu ovavi novarunde; orondu kavandu avehe mbe ri ovakambure.
3Nungwari Muhona eye omuṱakame; eye me mu zeuparisa nu me mutjevere ku ingwi Omunauvi. 4Neṱe Muhona wa tjiti kutja tu kare nonḓakameno mu eṋe yokutja mamu tjiti nu mamu panḓere pokutjita imbi mbi matu mu raere.
5Muhona nga tjite kutja eṋe mu zuve nawa orusuvero rwa Ndjambi nonḓaro orure ya Kristus.
Tu sokuungura
6Vakwetu, mena ra Muhona wetu Jesus Kristus eṱe matu mu rakiza kutja mu humburuke kokure novakambure ovakweṋu avehe mbe nongarero yotjirweyo nu mbe ha kongorere omaraerero ngu twe ve pa. 7Eṋe oveni mamu tjiwa nawa kutja mu sokuhorera ku eṱe. Tji twa ri puna eṋe, katwa ri notjirweyo. 8Eṱe katu na pu twa ningirire ombatero komundu nokuhinokusuta. Nungwari twa ungura natu kondjo omutenya nouṱuku kutja atu ha yandja ouzeu ku ngamwa auhe weṋu. 9Kakutja eṱe katwa ri nousemba okuningira ombatero ku eṋe, nungwari twa vanga okurira otjihorera ku eṋe ku mwa sokuhorera. 10Nu tji twa ri puna eṋe, twe mu raera ongahukiro atu tja: “Ngu ha vanga okuungura wina a ha ri ko!”
11Eṱe matu tja nai tjinga amatu zuu kutja mokati keṋu mu novandu mbe nongarero yotjirweyo, nu mbe hi na tji ve ungura posi yaingwi okuritwa moviṋa vyovandu varwe. 12Novandu mbe ri nai matu ve rakiza nokuveronga mena ra Muhona Jesus Kristus kutja ve ungure oviungura vyawo nu komuhingo mbwi ve mune ovikurya vyawo oveni.
13Nungwari, vakwetu, amu isa okutjita ouwa. 14Nu tji pe nomundu ngu hi nonḓuviro komarakiza wetu, otja tji twe mu pa morutuu ndwi, amu wana nomundu ngo, kokutja eye a ṱohoṋi. 15Nungwari, vakwetu, amu mu zara otja omunavita na eṋe, posi yokutja mu rongeye otja omukweṋu.
Omambo omasenina
16Nu Muhona omuini ngu yandja ohange, nge mu pe ohange oruveze aruhe na momuhingo auhe. Muhona nga kare na eṋe amuhe!
17Me tjanga neke randje omuini. Ozombinika, owami Paulus. Nami otji me twa otjiraisiro tjeke randje komaandero worutuu aruhe. Ami otji mbi tjanga nai.
18Otjari tja Muhona wetu Jesus Kristus ngatji kare na eṋe omauhe!
Currently Selected:
2 Ovatesalonika 3: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
