2 Ekuruhungi 34
34
Josija ma rire ombara mOjuda
(2Ozo 22:1-2)
1 #
Jer 3:6
Josija wa ri nozombura hambondatu tja rira ombara mOjuda; neye wa honapara oure wozombura omirongo vitatu na imwe mOjerusalem. 2Eye wa tjita imbi mbyaa vi tjata ku Muhona, na horere kotjikaro tjaihe mukururume, ombara David, ama ṱakamisa omatwako aehe wa Ndjambi nokuhinokuivaiva.
Josija ma haṋa poṋa pomerikotameneno kovisenginina
3Mombura oitjahambondatu youhona wa Josija, eye ngunda e ri omutanda tjinene, otja uta okurikotamena ku Ndjambi wa ihe mukururume, ombara David. Kombunda yozombura ine eye otja uta okuhaṋa poṋa apehe pomerikotameneno kovisenginina kozondunda, ovihenḓe ovizere vyomukuru wotjisenginina oserekaze Asera, noviserekarera avihe vyoomukuru varwe vovisenginina. 4#2Ozo 21:3; 2Eku 33:3Josija ngunda ama tarere, ovandu va nyanyaura ovipunguhiro vya Baal kee rikotamenenwa, nave haṋa ovipunguhiro vyomatwimisiro wovyomoro omuwa mbya ri posi yavyo, nave ṱukuṱura oviserekarera vya Asera na imbi avihe vyoomukuru varwe vovisenginina, nga tji vya rira oruuma; tjazumba otji va rimba indwi oruuma komaendo wa imba mbaa ve punguha ku wo. 5#1Ozo 13:2Josija wa nyosira omaṱupa wovapristeri vovisenginina kovipunguhiro kaave rikotamenene; komuhingo mbwi otja kohorora Juda na Jerusalem rukwao. 6Eye wa tjita tjingetjo movihuro vyehi ra Manasse nora Efraim nora Simeon nga kokure kehi ra Naftali. 7Josija wa nyanyaura ovipunguhiro ovihenḓe ovizere, na ṱukuṱura oviserekarera vyovisenginina, nga tji vya rira oruuma, na nyainya ovipunguhiro avihe vyomatwimisiro wovyomoro omuwa, mehi arihe ra Israel. Tjazumba otja yaruka kOjerusalem.
Embo rOmatwako mari munika
(2Ozo 22:3-20)
8Mombura oitjamurongo na hambondatu youhona wombara Josija, eye tja za nokukohorora ehi nondjuwo ya Muhona Ndjambi komerikotameneno kovisenginina, otja hinda Safan, omuzandu wa Asalja, na Maaseja, ongooneya ya Jerusalem, na Joak, omuzandu wa Joahas, omunane wokombanda, kutja ve kaṱune ondjuwo ya Muhona i rire ohirona. 9Owo va ya ku Hilkija, Omupristeri Otjiuru, nave kemupa ovimariva mbya wongerwe i Ovalevi ovatjevere mondjuwo ya Ndjambi; ovimariva mbi vya wongerwe movandu va Efraim nOvamanasse na motjihuro atjihe tjOvaisrael, na movandu va Juda nOvabenjamin na movature va Jerusalem. 10Owo va yandja ovimariva mbi kovandu mba mba ri ovatjevere votjiungura tjokuṱuna ondjuwo ya Muhona; nowo va suta na vyo 11ovahonge vomiti novatunge, nave randa na vyo omawe nomiti vyokuṱuna omatungiro, nga haṋenwe i ozombara za Juda. 12Ovarumendu, mba ungura oviungura mbi, va ri ovaṱakame tjinene. Owo va ri kehi yondjeverero ya Jahat na Obadja, vonganda yOmulevi Merari, na Sakaria na Mesulam, vonganda yOmulevi Kehat. Ovalevi avehe va ri ozonongo tjinene mokunyanda ovihumba. 13Ovalevi tjiva va ri ovatjevere vovatjinde voviṋa, nu tjiva aave ṱakamisa ovaungure moviungura pekepeke, novakwao tjiva va ri ovatjange voviṋa novatjevere vopomivero.
14Ovimariva ngunda amavi isiwa mo mondjuwo yomapwikiro, Hilkija, Omupristeri Otjiuru, otja muna Embo rOmatwako wa Muhona nga yandjere ku Moses. 15Eye wa raera nai ku Safan, omutjangerepo wouhona: “Mba munu Embo rOmatwako imwi mondjuwo ya Muhona!” Nu Hilkija wa yandja Embo ndi ku Safan, 16nu Safan wa twara Embo ndi kombara. Neye wa kaserekarera nai kombara: “Eṱe twa tjita oviṋa avihe, mbi wa rakiza. 17Twa kambura ovimariva mbyaa vi ṱizirwa mondjuwo ya Muhona, natu vi yandja kovaungure na kovatjevere vawo.” 18Tjazumba Safan wa hungira komurungu ama tja: “Hilkija we ndji pa Embo ndi.” Nu Safan we ri resera ombara neraka enene.
19Ombara tji ya zuva Embo ndi amari resewa, otja nyondorora ozombanda ze moruhoze. 20Ombara Josija wa isana Hilkija, na Safan, omutjangerepo wouhona, na Ahikam, omazandu wa Safan, na Abdon, omuzandu wa Mika, na Asaja, omukarere omutjevere wombara, ne ve rakiza nai: 21“Twendeye mu kapure ku Muhona inga omahongero nge ri mEmbo ndi, mena randje norotjiwaṋa ingee tji tji ri mOjerusalem na mOjuda. Omazenge wa Muhona, tjiri, ya rira omanene ku eṱe, ootate mukururume tjinga ave ha karere nonḓuviro ku Muhona, nave ha tjitire imbi avihe mbi sokutjitwa otja tji pa tjangwa mEmbo ndi.”
22Otja komarakiza wombara, Hilkija novakwao va kapura omukazendu wena Hulda, omuprofete, ngwa turire momunda omupe wa Jerusalem. Omurumendu wa Hulda wena Salum, omuzandu wa Tokat, nondekurona ya Hasra, wa ri omutjevere wozombanda zondjuwo ya Muhona. Owo va serekarerera Hulda imbi mbya tjitwa, 23neye we ve raera kutja ve yaruke kombara nu ve keiraere ombuze ya Muhona ndji: 24“Ami me vere Jerusalem novature vatjo avehe otja komasengiro nga tjangwa mEmbo ndi nda reserwa ombara. 25Owo we ndji imbirahi nave punguhire oomukuru varwe ozombunguhiro; komuhingo mbwi otji ve ndji pindikisa na imbi avihe mbi va tjita. Omazenge wandje maye sekamene Jerusalem, nu kamaaye yanda ko. 26Nu kombara oini, ami ngu mbi ri Muhona, Ndjambi wa Israel, me tja nai: Ove wa puratena ku imbi mbya tjangwa mEmbo ndi, 27nu we ritanaura no risusuparisa omuini komurungu wandje; amo nyondorora ozombanda zoye nokurira, indu tji wa zuva kutja ami mba tanda okuvera Jerusalem novature vatjo. Ami mbe ku zuvira ongumbiro yoye, 28nove komoo kara nomuinyo moruveze ndu me eta oviwonga kOjerusalem na kovature vatjo. Ami me ku zepa mohange.”
Novarumendu va yaruka kombara Josija nombuze ndji.
Josija ma tjiti omerikutiropamwe wokukara nonḓuviro ku Muhona
(2Ozo 23:1-20)
29Ombara Josija wa isana ovanane avehe va Juda nova Jerusalem, 30nowo va ya pamwe kondjuwo ya Muhona, amave kongorerwa i ovapristeri nOvalevi notjiwaṋa atjihe, ovatumbe novasyona. Ombara ya resera momurungu wawo avehe neraka enene indi Embo arihe rOmerikutiropamwe nda vazerwe mondjuwo ya Muhona. 31Tjazumba ombara Josija otja kakurama meṋe yongunḓe youhona na tjiti omerikutiropamwe na Muhona kutja ma kara nonḓuviro ku ye, nokutja ma ṱakamisa omazikamisiro nomatwako we nomutima nomuinyo we auhe, nu ma yenenisa omambo womerikutiropamwe otja tji ya tjangwa mEmbo ndi. 32Eye wa tjita ovandu va Benjamin na ngamwa auhe ngwa ri mOjerusalem, ve kwizike kutja mave ṱakama momerikutiropamwe nga. Novandu va Jerusalem va kara nonḓuviro komambo womerikutiropamwe ngu va tjitire na Ndjambi wooihe mukururume. 33Ombara Josija wa nyona oviserekarera avihe oviyaukise vyovisenginina mbya ri mehi arihe rotjiwaṋa tja Israel, nu ngunda a ri nomuinyo wa kondja tjinene kutja otjiwaṋa tji karere Muhona, Ndjambi wooihe mukururume.
Currently Selected:
2 Ekuruhungi 34: HRR-UNI
Highlight
Copy
Compare
Share
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
