2 Ekuruhungi 28
28
Ahas ma rire ombara mOjuda
(2Ozo 16:1-4)
1Ahas wa rira ombara tja ri nozombura omirongo vivari; neye wa honapara mOjerusalem oure wozombura omurongo na hamboumwe. Eye ka horerere kotjikaro otjiwa tjaihe mukururume ombara David; moruveze rwanao wa tjita imbi mbyaa vi ha tjata ku Muhona, 2na horere kovikaro vyozombara za Israel. Eye wa ungurisa oviserekarera vyovitenda vya Baal, 3na twimisire ovyomoro omuwa momukutu wa Ben-Hinom; nu wina wa punguha ovanatje ve omuini ovazandu ve rire ozombunguhiro ozoningiririsiwa kovisenginina, ama horere kovitjitwa oviyaukise vyoviwaṋa Muhona mbya rambere mehi, Ovaisrael tji ve ya. 4Ahas wa punguhira ozombunguhiro na twimisire ovyomoro omuwa poṋa pekepeke pomerikotameneno kovisenginina kozondundu na kehi yomiti avihe vyomizire wina.
Ovita kuna Ovasirie nOvaisrael
(2Ozo 16:5)
5 #
2Ozo 16:5; Jes 7:1 Motjimbe tjourunde wombara Ahas mbwa tjita, Muhona, Ndjambi we, we mu yandja momake wombara ya Sirie, noyo ye mu havera nai huura ovandu ve ovengi, nai ve twara kOdamaskus otja ovakamburwa. Eye wina wa yandjewa momake wombara ya Israel ndje mu havera tjinene. 6Pekah, omuzandu wa Remalja, wa zepa ovarwe ozombangaṋe 120,000 meyuva rimwe mOjuda, tjinga ava nakaura Muhona, Ndjambi wooihe mukururume. 7Omuisrael umwe omurwe wovita wena Sikri wa zepa Maaseja, omuzandu wombara Ahas, na Asrikam, omutye wondjuwo youhona, na Elkana, ngwa ri omukuramenepo wombara. 8Nangarire kutja Ovajuda va ri ovomuhoko umwe nOvaisrael, otjimbumba tjOvaisrael tjovita tja huura ovakazendu novanatje vawo 200,000 natji ve twara kOsamaria puna ovihuurwa ovingi.
Omuprofete Obed
9Omurumendu ngwa rukirwe Obed, omuprofete wa Muhona, wa turire mOsamaria. Eye wa hakaena notjimbumba tjOvaisrael tjovita, ama tji kotoka. Nu tji tja ri pokuhita motjihuro wa tja nai: “Muhona, Ndjambi wooiho mukururume, wa pindika nOvajuda, nu wa tjita kutja mu ve havere; nungwari eṋe mwe ve zepa momazenge omanene. 10Nambano eṋe mwe rimana okutjita ovarumendu novakazendu va Jerusalem nova Judea ve rire ovakarere veṋu. Kamu nokutjiwa kutja eṋe wina mwa tjita ouvi ku Muhona, Ndjambi weṋu, are? 11Purateneye ku ami. Ovahuurwa mba owo omarumbi novaṱena kweṋu. Ve eseye ve yaruke, Muhona tjapo ngee mu vere momazenge we.”
12Ovarumendu ozohongora vane vomuhoko wa Efraim, okutja ooAsarja, omuzandu wa Johanan, na Berekja, omuzandu wa Mesilemot, na Jehiskija, omuzandu wa Salum, na Amasa, omuzandu wa Hadlai, va sekamena ozondjito zotjimbumba tjOvaisrael tjovita. 13Owo va tja nai: “Amu eta ovahuurwa mba nguno! Eṱe twa tjita ourunde rukuru komurungu wa Muhona, nu twe mu pindikisa, nga tja yenene okutuvera. Ondjo yetu onene rukuru, nambano mamu vanga okutjita otjiṋa tji matji weza ondjo yetu.” 14Komuhingo mbwi otjimbumba tjovita tja isa imba ovahuurwa novihuurwa momurungu wotjiwaṋa novanane vatjo, 15novarumendu mba vane va zikwa okuyandja ozombanda kovahuurwa okuza movihuurwa. Owo ve ve pa ozombanda nozongaku okuzara, nave ve pe ovikurya mbya yenena okurya nokunwa, nave twa omaze womiṋinga movirwaro vyawo. Imba mba ri ovingundi tjinene okukayenda va kavirisiwa kousino; novahuurwa avehe otji va yarurwa kOjeriko, otjihuro tjomavare. NOvaisrael va yaruka konganda kOsamaria.
Ahas ma ningire ombatero kOvasirie
(2Ozo 16:7-9)
16Moruveze ndo ombara Ahas wa hinda ombuze okuningira ombatero kombara ya Asirie, 17Ovaedom tjinga ava rwisire nave havere Ovajuda rukwao nave ve twara mouhuura. 18Moruveze tjingero ndo Ovafilisti va huura ovihuro mbya ri mEhi-erari na mOnegeb ra Juda. Ovihuro mbi vya ri ooBet-Semes na Ajalon na Gederot; wina va huura ovihuro Soko na Timna na Gimso puna ovirongo vyavyo, nave tura mu vyo ongarerere; 19orondu Muhona wa susuparisa Juda mena ra Ahas, ombara ya Juda, eye tjinga a tjita ezunganeno mOjuda ne ha ṱakamene mu Ndjambi. 20Komuhingo mbwi Tiglat-Pileser, ombara ya Asirie, moruveze rwokuvatera Ahas we mu sekamena ne mu etere oumba. 21Ahas otja toora ovihuze vyondjuwo ya Muhona novyondjuwo youhona novyozondjuwo zovahongore votjiwaṋa, ne vi yandja kombara ya Asirie, nungwari mokutjita nai wina kape vaterere.
Omauvi wa Ahas
22Oviwonga vye tji vya rira ovinene, ombara Ahas wa tura ondjo komurungu wa Muhona komeho yarutenga. 23Ahas wa punguhira ozombunguhiro koomukuru vovisenginina vOvasirie mbe mu haverere, ama tja nai: “Oomukuru vOvasirie va vatera ozombara za Sirie; nami tji mbe ze punguhire ozombunguhiro, ngahino maze ndji vatere wina.” Nungwari ihi tja eta onyoneno ku ye na kotjiwaṋa tje. 24Ahas wa toora oviungurise avihe vyondjuwo ya Muhona ne vi nyanyaura. Eye wa pata ondjuwo ya Ndjambi na ziki ovipunguhiro momivanda avihe vya Jerusalem. 25Motjihuro na motjirongo atjihe mOjuda eye wa tunga poṋa pomerikotameneno kovisenginina pu mape twimisirwa ovyomoro omuwa koomukuru vovisenginina. Komuhingo mbwi otje riyetera omuni omazenge wa Muhona, Ndjambi wooihe mukururume.
26Ovitjitwa avihe vyouhonapare we okuza kombutiro nga kondjandero vya tjangwa mEmbo rEkuruhungi rOzombara za Juda noza Israel. 27#Jes 14:28Ombara Ahas wa koka na pakwa mOjerusalem, nungwari ka pakerwe momaendo wouhona. Omuzandu we Hiskija we mu pingena okurira ombara.
Currently Selected:
2 Ekuruhungi 28: HRR-UNI
Highlight
Copy
Compare
Share
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
