2 Ekuruhungi 26
26
Usija ma rire ombara mOjuda
(2Ozo 14:21-22; 15:1-7)
1Ovajuda avehe va toorora Usija, omuzandu wa Amasja, ngwa ri nozombura omurongo na hamboumwe kutja a pingene ihe mouhona. 2Kombunda yonḓiro ya Amasja, Usija wa huura otjihuro Elat, e tji kotora kOjuda ne tji tungurura.
3Usija wa rira ombara tja ri nozombura omurongo na hamboumwe, neye wa honapara mOjerusalem oure wozombura omirongo vitano na mbari. Ina wa ri Jekolja ngwa zire kOjerusalem. 4Usija wa tjita imbi mbyaa vi tjata ku Muhona, ama horere kotjikaro tjaihe Amasja. 5Sakaria, omuhonge we movya Ndjambi, ngunda a ri nomuinyo, eye wa karera Muhona nouṱakame, nu Ndjambi we mu sera ondaya.
6Usija wa hinga ovita kuna Ovafilisti. Eye wa teya otumbo twomawe twovihuro ooGat na Jabne na Asdod, na tungu ovihuro ovinamasa popezu na Asdod na mehi rOvafilisti. 7Ndjambi we mu vatera kutja a havere Ovafilisti nOvaaraba, mba turire mOgur-Baal, nOvameuni. 8Ovaamoni aave sutu otjisuta tjouhona ku Usija, neye wa rira omunamasa, nga ondangu ye tji ya zuvaka akuhe nga kOengipte.
9Usija wa zeuparisa oviṱunga mOjerusalem ama tungu otuhungu pomuvero wOkotjikoro, na pOmuvero wOrutjandja, na imba pu pe tanaukira orumbo. 10Eye wina wa tunga otuhungu tu twa zeuparisiwa mokuti ongoza, na hupura ozombu ozengi, orondu eye wa ri notupanda otuingi twozongombe komukuma wokongurova mEhi-erari na mEhi-etunda. Eye tjinga a suverere otutumbo novikunwa otja popa ovandu kutja ve kune omivite mehi rozondundu na mehi ehapise.
11Usija wa ri notjimbumba otjinene tjovita tji tje rirongerera otjirwa. Otjivaro tjotjimbumba tja ṱakamisiwa i ovatjangerepo ve ooJeiel na Maaseja, mba ri kehi yondyero ya Hananja, umwe wovahivirikwa vombara. 12Otjimbumba tjovita tja hongorerwa i oviuru vyomaṱunḓu 2 600. 13Kehi yavyo kwa ri ovarwe wovita 307 500, mba yenena okurwira ombara nawa kovanavita na yo. 14Usija wa yandja otuvao nomangaruvyo, nomakori wovitenda, nozombanda zotjirwa, nomauta noviku, nomawe woukarena kotjimbumba tjovita, 15mOjerusalem wa ungurisa ovirwise vyokuyumba oviku nomawe mbya ungurwa i ozonongo zovita, ne vi ziki kotuhungu na kovikoro vyotumbo twotjihuro. Ondangu ye ya tandavara koṋa akuhe, neye wa rira omunamasa tjinene mena rokutja wa muna ombatero onene tjinene ku Ndjambi.
Usija ma vererwa omeritongamisiro we
16Nungwari ombara Usija tja rira omunamasa, we ritongamisa na ha kara nouṱakame mu Muhona, Ndjambi we. Eye wa nyengura Muhona, Ndjambi we, mokuhita mondjuwo ya Muhona okukatwimisira ovyomoro omuwa kotjipunguhiro tjomatwimisiro. 17Omupristeri Asarja puna ovapristeri omirongo hambondatu ovanamasa nomapenda va kongorera ombara, 18#Eks 30:7, 8; Num 3:10okumupirukira. Owo va tja nai: “Usija! Ove ko nousemba okutwimisira Muhona ovyomoro omuwa. Ovapristeri porwe, inḓa ozondekurona za Aron, omba yapurirwa okutjita nai. Za mo moṋa momuyapuke mwi! Ove wa yamburura Muhona Ndjambi, neye ke nokukupa ondjingonekero.”
19Usija wa kuramene mbo mondjuwo ya Muhona posi yotjipunguhiro tjomatwimisiro, nu wa ri notjiṱiziro tjomatwimisiro wozombunguhiro momake we. Eye wa pindikire novapristeri, nu mokamanga omutjise wongana wa pita motjipara tje. 20Asarja, Omupristeri Otjiuru, novapristeri ovakwao va tara motjipara tjombara nomburuma, nave i ṋiṋikiza kutja i ze mo mondjuwo ya Muhona. Usija wa hakahana okupita, Ndjambi tjinga e mu vera.
21Okuzambo oure womuinyo we ombara Usija wa kara omuhakohoke mena romutjise we. Eye tjinga e ha pwire okuhita mondjuwo ya Muhona rukwao, wa tura mondjuwo ye peke na kutuka koviungura avihe, omuzandu we Jotam ngunda a ri omuhona wondjuwo youhona nehonaparera otjiwaṋa.
22Omuprofete Jesaja, omuzandu wa Amos, wa tjanga oviṋa avihe vyarwe Usija mbya tjita ngunda a ri ombara. 23#Jes 6:1Usija wa koka na pakwa mehi romapakero rouhona, nungwari mena romutjise we ka pakerwe momaendo wouhona. Omuzandu we Jotam we mu pingena okurira ombara.
Currently Selected:
2 Ekuruhungi 26: HRR-UNI
Highlight
Copy
Compare
Share
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
