प्रकास 4
4
स्वर्गिय सिङहासनको दर्सन
1इदोइ गोताङ घाटानागेलाइ जेङलि दोअ्तेङ न्हुसो, का युहान्ना तिङघा कि स्वर्गता एनोङ फिनु हेअ्न्हाका हिघाहि, कालाउ इन्ता का दोफा हासु बुङ नुइ धुइतेङ हिघाहि कालाउ जाइ नुइ धुइघाहि वाको गाला का लाम्फा हिङका हिघाखा, जाइको गाला सानाइको गाला भाइका हिघाहि। कालाउ वा कासेहेङ दोअ्हि: “इता ह्रुता लौउ, कालाउ एला न्हुसो जेदोङ काथागेलाइ जेङलि गोइखे का इङको नासेहेङ तिङपाङका।” 2एन्सालाउ दोङ परमेस्वरको आत्मा काङकोता लोहि, खाङसु, स्वर्गता एनोङ सिङहासन हिघाहि, कालाउ इङको सिङहासनता एमि बिराजमान हिघाहि। 3वा जाइ सिङहासनता बिराजमान जेङका हिघाहि वा मेनाङ जाङका उन्ठुइगेलाइ भाइका तिङघाहि, जाइहेङ यास्पर उन्ठुइ कालाउ कार्नेलियास उन्ठुइ दोअ्घाहि। इङको सिङहासनको वरिपरि धेङगुर हिघाहि, कालाउ इदोइ नेल्पा जाङका उन्ठुइ भाइका तिङघाहि। 4इङको सिङहासनको कोरपाहाङ ए कुरि द्या आरु सिङहासनगेलाइ हिघाहि। कालाउ पुरिङता सोनाको मुकुटगेलाइ कालाउ जे:का धाबागेलाइ लागाइतेङ ए कुरि द्यामि आगुवागेलाइ इङको सिङहासनगेलाइता योमतेङ हिका का तिङघा। 5इङको सिङहासनसो बिजुलिगेलाइ चिलकातेङ हिघाहि, कालाउ बादेलसो गड्याङ-गुडुङको गालागेलाइ ओल्लेतेङ लोघाहि। कालाउ इङको सिङहासनको आगाता न्हि लोङ चेरादानिगेलाइ जोल्तेङ हिघाहि, जेदोङ परमेस्वरको न्हि लोङ आत्मागेलाइ हि। 6सिङहासनको आगाता एनोङ हाइ दोङ हिघाहि जेदोङ समुन्द्र भाइकाङ तिङघाहि, जेदोङ सिसा भाइपा जाहाका हिघाहि। कालाउ गोताङ सिङहासनको द्यापाहाङ द्यालोङ हुसि हिका प्रानिगेलाइ हिघाहि, जाइको जिउगेलाइता मिसियाँहोइ पुराङ ढाकिका हिघाहि। 7इदोइ लाङ हुसि हिका प्रानि खुवाँ भाइका हिघाहि, न्हेतेङ प्रानि बहर भाइकाङ हिघाहि, सुम्तेङ प्रानिको ह्राइ द्याङको भाइकाङ कालाउ द्यातेङ प्रानि उडाइतेङ हिका बाजा भाइका हिघाहि। 8इङको द्यालोङ दोङ हुसि हिका प्रानिको तुलोङ-तुलोङ पाखेना हिघाहि, कालाउ इम्बालाइको पाखेनागेलाइ लिता कालाउ बाहार न्हे पाहा मिसियाँहोइ ढाकिका हिघाहि। कालाउ झेम्पाङ लिपाङ इम्बालाइ माथामिसिङ एसा दोअ्काताङ लेकाताङ हिघाहि,
“पबित्तरो, पबित्तरो, पबित्तरो प्रभु सरबुङसाइका परमप्रभु,
वा इसिका परमेस्वर हि, जाइ सुरुको सोमोइसोङ एला थेकापा कालाउ
जेलाउलाउको भाअ्सिङ परिबतन माजेनाङ।”
9-10जाइ सिङहासनता बिराजमान हिका हि वा दोङ हि जाइ जेलाउलाउ बुङ सिन्हुका हितेङ हिखे। जेलाउ बुङ हुसि हिका प्रानिगेलाइ वासेहेङ महिमा, आदार, कालाउ धन्यबाद पिखे, ए कुरि द्यामि आगुवागेलाइ वाको आगाता तुघुरतेङ वाको आराधाना पाखे। इम्बालाइ ता-ताइको मुकुट सिङहासनको आगाता ताअ्तेङ या दोअ्ताङ:
11“हे प्रभु केलाइको परमेस्वर,
नाअ् गोताङ थोक सिरजाइना।
नाङको इच्छा पाहासो,
इङकोगेलाइ सिरजाइनाका हिघाहि,
कालाउ इम्बालाइ आस्तित्व्यता हि।
ओदोङ भाअ्सिङ नाअ् महिमा, आदर कालाउ सरबुङ निङका योग्यको हिना।”
Currently Selected:
प्रकास 4: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
