प्रकास 21

नावा आकास नावा प्रिथिबि

1कालाउ न्हुसो का नावा आकास कालाउ नावा प्रिथिबि तिङघा, हाइपालिपानु पुर्ना आकास, पुर्ना प्रिथिबि कालाउ समुन्द्र मोअ्लि दोका हिघाहि। 2का पबित्तरो सहरहेङ बुङ तिङघा जेदोङ नावा यरुसेलेम हि। इदोइ परमेस्वरसो स्वर्ग लेता खुतेङ लोखे। इङको सहरहेङ दारवाइनि भाइपा तियार पाका हिघाहि, कालाउ वासेहेङ बोन्हा बोअ्पातेङ साजाइतेङ ताअ्हि कालाउ दारा दोफा बिहु पालि तियार हि। 3आरोङ का परमेस्वरको सिङहासनसो बारका गालाहोइ हासु बुङ धुइका हिङघा। वा दोअ्हि, “एलासो परमेस्वर मानिमुइगेलाइ दोफा ह्याङ, कालाउ वा ताइको द्‍याङगेलाइता ह्याङ। वा ताइमिङ दोअ्ताङ ओबालाइ वाको द्‍याङगेलाइ हि कालाउ वा बुङ ओबालाइ दोफा ह्यावा, कालाउ ओबालाइ बुङ दोअ्तावा इङको वाको परमेस्वरको हि। 4परमेस्वर इम्बालाइको मिसियाँको गोताङ मितिगेलाइ योप्यावा। हासु बुङ एला हेलाउ बुङ मासियाङ, हासुको बुङ दुख, सोक कालाउ पिडा माजेनाङ, हाइपालिपानु पुर्ना सुमिङ एला मान्थुहि।”

5कालाउ सिङहासनता बिराजमान हिका कासेहेङ दोअ्हि, “एला का गोताङ नावा बानाइदोङखा।” वा एसा बुङ कासेहेङ दोअ्हि, “इदोइ काथा लेखे। जेदोङ काथा का नासेहेङ दोअ्दोङखा इङको सत्ये कालाउ भोरोसा पालि योग्य हि।”

6आरोङ वा कासेहेङ दोअ्हि, “एला गोताङ पुरा जेङहोइ। का दोङ आल्फा कालाउ ओमेगा हिघा। का दोङ सुरु कालाउ आन्त्य हिघा। जाइ चि आम्लि किका हि का इम्बालाइहेङ ताजा चि आम्पालि चुम्पुवाङका जेदोङ ए पाइसा माकोसिङ जिबनको चि आम्लि प्याङका। 7जाइ इम्बालाइ दुस्टको सरबुङहेङ हारिपावा, ओबालाइहेङ काङकोसो इदोइ गोताङ आसिसगेलाइ प्याङका। कालाउ का वाको परमेस्वर जेनाङका कालाउ ओबालाइ बुङ काङको चानगेलाइ जेनावा। 8कालाउ जाइ का ह्रुता खाङधुरि मापाखे, इम्बालाइ गन्धक दोफाङ ओअ्का मेको तालता हानिलि गोइयावा जेदोङ इङको वाको न्हेतेङ सिका दोङ हि। जेदोङ द्‍याङगेलाइ भेनेङ द्‍याङको आगाता कासेहेङ मासुइकारखे, दुस्ट काम पाखे, मारा पाखे, आनाइतिक कासिबिरि पाखे, जादु-तुना पाखे, मुर्तिगेलाइको पुजा पाखे कालाउ धाताइखे, इम्बालाइ झाराङ दोफा बुङ इन्सिकाङ जेनाङ।”

9कालाउ आरोङ न्हि लोङ स्वर्गदुतगेलाइ ताइको न्हि लोङ जाम बात्तिसो पोङघातेङ हिका न्हि लोङ आम्तिम बिपति द्‍याङ जाति ह्रुता हुपिहि, इङको मध्येसो एमि स्वर्गदुत कासेहेङ दोअ्हि, “का दाराहेङ तिङपाङका जाइ धेमाङ थुमा दोफा बिहु पाङ।”

नावा यरुसेलेम सहर

10पबित्तरो आत्माको सरबुङहोइ कासेहेङ स्वर्गदुत हेन्जा झाउका लाखता चुम्पुहि। पबित्तरो सहर जेदोङ नावा यरुसेलेम हि, जेदोङ स्वर्गसो, परमेस्वरसो खुतेङ लेता लोका हिघाहि। 11परमेस्वरसो लोलि तोम्का चिल्कातेङ हिका फाइसालामकाहोइ, इङको सहर चिल्कातेङ हिघाहि। इङको मेनाङ जाङका उन्ठुइ जास्पर भाइपा चिल्कातेङ हिघाहि कालाउ सिसा भाइका जाहाँका हिघाहि। 12सहरको द्‍यापाहाङ एनोङ बारका झाउका बेरेम हिघाहि। बेरेमको तेन्हे फिनुगेलाइ हिघाहि कालाउ इङको गोताङ फिनुता एमि स्वर्गदुत पाले भाइपा जाअ्का हिघाहि। कालाउ गोताङ फिनुगेलाइ ह्रुता इस्राएललिको तेन्हे हारागुटियाको मिङ लेखेका हिघाहि। 13सहरको द्‍यापाहाङ सुमलोङ-सुमलोङ फिनुगेलाइ हिघाहि: जेदोङ कि नुहे, दिहे, दाहे, कालाउ माहे दिसा हिघाहि। 14इम्बालाइ इङको सहरको बेरेम तेन्हे बारका उन्ठुइगेलाइ ह्रुता बानाइका हिघाहि। गोताङ उन्ठुइता थुमाको तेन्हे छाल्न्हाका चात्यागेलाइको मिङ हिघाहि।

15जेदोङ स्वर्गदुत काङको काथा पाघाहि, वाको दोफा इङको सहरको, इङको फिनुगेलाइ कालाउ इङको को बेरेमहेङ दोङलिको भाअ्सिङ एनोङ सोनाको लागासि पिहि। 16इङको सहरको आकार बर्गकार हिघाहि कालाउ वाको द्‍यापाहाङ बानाबोर हिघाहि। स्वर्गदुत ताइको दोङका लागासिहोइ इङको सहरहेङ दोङहि। इङको को लम्बाइ न्हे हाजार द्‍यासाइ किलो मिटर हिघाहि। कालाउ इङको को चौडाइ कालाउ उचाइ इङको लम्बाइको बानाबोर हिघाहि। 17कालाउ न्हुसो, इङको स्वर्गदुत सहरको उचाइ बुङ दोङहि। वा जेसापा द्‍याङगेलाइ आमेनेगेलाइ दोङखे इन्साङ वा बुङ दोङहि। बेरेमको उचाइ सुम कुरि तु मिटर हिघाहि। 18इङको सहर निखुर सोनाहोइ बानाइका हिघाहि जेदोङ काँचको भाइका चिल्कातेङ हिघाहि, कालाउ इङको बेरेम मेनाङ जाङका उन्ठुइ जास्परसो बानाइका हिघाहि। 19इङको सहर जेदोङ बारका उन्ठुइ ह्रुता बानाइका हिघाहि, इङको तेन्हे मेनाङ जाङका उन्ठुइहोइ साजाइका हिघाहि। लाङ यास्पर हिघाहि, न्हेतेङ निर, सुम्तेङ हरित रत्न, द्‍यातेङ पन्ना, 20नातेङ आनिक्स, तुतेङ इ:का मनि, न्हितेङ पितमनि, येएतेङ बेरुज, क्वातेङ पुस्पराज, तेअ्औउ लसुने, तेएङ निलमनि, कालाउ तेसुमतेङ कोटेला हिघाहि। 21इङको तेन्हे फिनुगेलाइ बुङ गोताङ एनोङ-एनोङ मोतिहोइ बानाइका हिघाहि। सहरको मिङ चलिका गल्लिगेलाइ निखुर सोनाहोइ बानाइका हिघाहि जेदोङ सिसा भाइपाङ चिल्काका हिघाहि।

नावा यरुसेलेम सहरको महिमा

22का मुन्दिर मातिङघा, हाइपालिपानु परमप्रभु परमेस्वर सरबुङसाइका कालाउ थुमा ओदोङ सहरता हिखे। ओदोङ भाअ्सिङ, एला इन्ता मुन्दिरको आवस्यक मान्थु। 23इदोइ सहरहेङ थाअ्साइका पिलि सान्हे माकुनु तालि मागोइखे। हाइपालिपानु ताइमिङ परमेस्वरको महिमाता इङको सहरहेङ थाअ्साइ पाका हि, थुमा बुङ जाइ यासेहेङ थाअ्साइका बानाइहि। 24इङको सहरको थाअ्साइकाहोइ प्रिथिबिता हिका गोताङ द्‍याङगेलाइहेङ फाइसालामका पिखे कालाउ सुमिङको गोताङ राजागेलाइ ताइको धन-सम्पति इङको सहरता चुमावा। 25इङको सहरको फिनुगेलाइ लिपाङ खुल्ला हिखे। इङकोगेलाइ हिदिकाल बुङ बन्द माजेनाङ हाइपालिपानु इङको सहरता न्हिसिन माजेनाङ। 26सुमिङता हिका गोताङ द्‍याङगेलाइ ताइको गोताङ सुन्दर आमेनेगेलाइ कालाउ धन-सम्पतिगेलाइ इङको सहरता चुमावा। 27कालाउ हिदोइ बुङ आसुद्द आमेने इङको सहरता माल्वाङ। मारेङका काम पाकालाइ माकुनु धाताइका द्‍याङगेलाइ, इन्ता मादुल्लाङ थुमाको जिबनको कितापता जाइको मिङ लेखेका हि खिनिङ इङको द्‍याङ इङको सहरता दुल्लि द्वावा।

Currently Selected:

प्रकास 21: DHINT

Highlight

Copy

Compare