प्रकास 19
19
स्वर्गता परमेस्वरको बाखिन
1बल्लियाका स्वर्गदुत नुइ धुइलि दोतेङ न्हुसो, का स्वर्गता हेन्जा द्याङगेलाइ ले लेका गाला भाइका हिङघा:
“हाल्लेलुयाह!#19:1 हाल्लेलुयाह याको माने “परमेस्वरको बाखिन पालि”
नाअ् दोङ हिना जाइ झाराङ द्याङगेलाहेङ मुक्ति पिखेना।
केलाइ परमेस्वरहेङ गोताङ महिमा पिनाखे।
एला नाअ् ताइको सरबुङको प्रयोग पाअ् कालाउ राजाको भाइपा सासन पाअ्!
2वाको बाखानाइ पासु! हाइपालिपानु वाको गोताङ न्याय सत्ये हि कालाउ ठिक हि।
वा इङको बारका सहरहेङ साजाइ पिहि जाइ मिङ चलिका बेस्या भाइका हि।
हाइपालिपानु वा सुमिङता हिका द्याङगेलाइहेङ पाप पालि उसकाइहि।
परमेस्वर वासेहेङ घुरिपातेङ तिरिपिहि हाइपालिपानु वाको बान्धाइतिगेलाइहेङ सेअ्हि।”
3कालाउ आरोङ द्याङगेलाइ एखे ले लेका गाला भाइका हिङघा:
“हाल्लेलुयाह!
बेबिलोन सहरहेङ ओपाका मेको धुवा हेलाउ बुङ तिलि मागानाङ।”
4कालाउ इङको सोमोइ, ए कुरि द्यामि आगुवागेलाइ कालाउ द्यालोङ हुसि हिका प्रानिगेलाइ तुघुरहि कालाउ सिङहासनता योम्तेङ परमेस्वरको आराधाना पाहि। इम्बालाइ एसा दोअ्घाहि,
“आमेन, हाल्लेलुयाह!”
थुमाको बिहु
5कालाउ इङको सोमोइता, का हासु बुङ नुइ धुइका हिङघा। कालाउ वाको गाला इसिका लागिहि कि जेसाङ परमेस्वरको सिङहासनसो लोका हिघाहि। वा दोअ्हि,
“नाअ् दोङ केलाइको परमेस्वरको सेवकगेलाइ हिना कालाउ नाअ् वासेहेङ थि।
चाहे नाअ् महत्वय पुर्न हि चाहे महत्व हिन द्याङगेलाइ हिसुना।
केलाइको परमेस्वरको बाखानाइ पासु!”
6कालाउ न्हुसो, का हेन्जाङ द्याङगेलाइको ह्रिकाइका भाइका बारका गाला हिङघा। इम्बालाइको ह्रिकाइका हेन्जा ओसारापाङ बारका चिको झरना भाइकाङ हिघाहि, कालाउ बादेलसो गद्द्याङ-गुद्द्याङको गाला भाइका हिघाहि। इम्बालाइ दोअ्हि,
“हाल्लेलुया!
परमेस्वर केलाइको परमप्रभु, गोताङ सरबुङ हि,
कालाउ वा राजा जाइ सासन पाखे।
7केलाइ झाराङ खुसि जेनाइने कालाउ आनान्द मानाइने
कालाउ वासेहेङ बाखानाइ प्याइने।
एला इदोइ सोमोइ हि जाइ येसु जाइ थुमा हि,
जेलाउलाउको भाअ्सिङ ताइको द्याङगेलाइ दोफा मिलियावा,
इङको दारा भाइपा जाइ ताइको दारइवाइनि दोफा बिहु पाखे।
हाइपालिपानु वा द्याङगेलाइहेङ ताइमिहेङ वाको दोफा मिलिलि तियार पाखे।
8परमेस्वर वासेहेङ पबित्तरो, सुद्द कालाउ जाहाका धाबा होङलि पिहि,
जेदोङ रेस्मिहोइ बानाइका हिघाहि।”
रेस्मिको धाबा खान्धुराइ ओनेगेलाइको रेम्का कामगेलाइ तिङपाखे।
9कालाउ इङको स्वर्गदुत कासेहेङ दोअ्हि, “इदोइ काथाहेङ लेखे: थुमाको बिहुको भातियार मानिलिको भाअ्सिङ, जेदोङ द्याङगेलाइ नेउता निङहि इम्बालाइ धन्यको हि।” वा आरोङ कासेहेङ दोअ्हि, “इदोइ सत्ये बचन परमेस्वर दोअ्हि।”
10जेलाउ का इदोइ हिङघा, काङको दोफा काथा पातेङ हिघाहि का वाको आगाता तुघुरघा, हाइपालिपानु का वाको आराधाना पालि हानिदोङघाखा। कालाउ वा कासेहेङ दोअ्हि, “काङको आराधाना मापासु। नाअ् सिरिप परमेस्वरको आराधाना पालि गोइखे। हाइपालिपानु, का बुङ नाङको कालाउ नाङको दोफा खान्धुराइ पाका सेवक हिघा। नेलाइ झाराङ भाइपा का बुङ इदोइ वा हृुता सुइकार पाका हिघा कि येसु दोङ प्रभु हि। हाइपालिपानु इङको पबित्तरो आत्मा दोङ हि जाइ परमेस्वरको द्याङगेलाइ येसुहेङ देखाल पाका सत्ये काथाको घोसाना पालिको भाअ्सिङ साघाइखे।”
जे:का ओह्याँ धोल्कालाइ
11आरोङ का स्वर्गहेङ हेअ्नाका तिङघा, इन्ता काङको आगाता एनोङ जे:का ओह्याँ हिघाहि। जाइ वाको ह्रुता दोल्हि, वा इसिका हि वासेहेङ खाङधुरि पालि द्वास्वाना कालाउ वा माधाताइखे। कालाउ वा धार्मिक दोफाङ वा ताइको सतुरुगेलाइको न्याय पाखे कालाउ इम्बालाइको बिरोधता फेसुखे। 12वाको मिसियाँ जोल्का तिका मे भाइका हिघाहि। कालाउ वा ताइको पुरिङता हेन्जा मुकुट तु:का हिघाहि। कालाउ वाको जिउता एनोङ मिङ लेखेका हिघाहि, कालाउ वा दोङ इङको मिङको माने हिघाहि। 13वा हितिहोइ चोबेका धाबागेलाइ बोअ्का हिघाहि, कालाउ वाको मिङ “परमेस्वरको बचन” हिघाहि। 14स्वर्गसो लोका सिपालाइको बारका जेर वाको न्हु-न्हु हानिदोङघाहि। इङको सिपाइगेलाइ जे:का ओह्याँगेलाइता धोल्का हिघाहि, कालाउ इम्बालाइ जाहाँका जे:का रेस्मिको धाबागेलाइ बोअ्का हिघाहि। 15वाको नुइसो एनोङ धार हिका कात्ति लोहि वा गोताङ रास्टगेलाइहेङ हारिपावा। झाराङ द्याङ जाइ वाको खाबाराहेङ मामानिखे, वा ओबालाइहेङ थाङका साजाइ प्याङ। वा दाखरस एनोङ खारासो झोतेङ हिका भाइका परमेस्वर, सरबुङसाइकाको थिलि गोइका चेरचुङको क्रोडहोइ लाअ्प्याङ। 16वाको लोखोन धाबा कालाउ दाम्पाहा फिला ह्रुता एनोङ मिङ लेखेका हिघाहि, थुमा “प्रभुगेलाइको प्रभु” कालाउ राजागेलाइको राजा हि।
17आरोङ का एमि स्वर्गदुत सान्हे ह्रुता जाअ्तेङ हिका तिङघा। वा बारका गालाहोइ आकास ह्रुता उराइका गोताङ सिघुनगेलाइहेङ काइहि। वा दोअ्हि, “लौउ कालाउ परमेस्वर नाङको भाअ्सिङ तियार पाका बारका भोजको भाअ्सिङ जोम्सु। 18लौउ कालाउ राजागेलाइ, आर्मिको नेतागेलाइ, ओह्याँगेलाइ कालाउ ओबालाइको ह्रुता धोल्कालाइको सिका जिउको बिहा चाअ्सु। नेलाइ गोताङ सिका द्याङगेलाइको बिहा चाअ्लि दोस्वाना, चाहे वा बान्धाइति कालाउ स्वतन्तरो हि, बारका कालाउ म्हुइका हि।”
19आरोङ का समुन्द्रसो बाहार ओल्लेका राक्सेसहेङ कालाउ प्रिथिबिको गोताङ राजागेलाइहेङ कालाउ इम्बालाइको सेनाहेङ तिङघा। इम्बालाइ झाराङ मिलितेङ जे:का ओह्याँ ह्रुता धोल्तेङ हिका कालाउ वाको सेनाको बिरोधता धुम पालि लोका हिघाहि। 20कालाउ इङको लाङति राक्सेस कालाउ वाको दोफा भेनेङ राक्सेस जाइ धाताइका आगमबानि पाघाखे इङको न्हेमि रिम निन्चाहि। इदोइ धाताइका आगमबक्ता राक्सेसको भाअ्सिङ आचाम्माको चिन्हा तिङपाघाहि कालाउ झाराङ द्याङगेलाइहेङ धोका पिहि जाइ राक्सेसको चिन्हा ताइको कापाल ह्रुता ताअ्का हिघाहि कालाउ जाइ वाको मुर्तिहेङ पुजा पाका हिघाहि। इदोइ न्हेमिहेङ सिन्हु पाङ गन्धकहोइ ओतेङ हिका ताल भाइका बारका मेता थाइगिल्याङ। 21आरोङ, जे:का ओह्याँ ह्रुता धोल्का इङको राक्सेस कालाउ गोताङ सेनागेलाइहेङ सेअ्हि, वाको नुइसो ओल्लेका धार हिका कात्तिहोइ झाराङहेङ पाल्हि। सिघुनगेलाइ लोहि कालाउ गोताङ सिका द्याङगेलाइको सिका जिउ हामु माआघाइपा थेकापा चाअ्हि।
Currently Selected:
प्रकास 19: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
