प्रकास 15

न्हि लोङ स्वर्गदुत कालाउ आम्तिम बिपति

1जेलाउ वा दोअ्लि दोहि, का आकासता एनोङ भेनेङ फरक चिन्हा तिङघा, जेदोङ हेन्जाङ आचाम्माको कालाउ हेथे थिलि गोइका हिघाहि। न्हि लोङ स्वर्गदुतगेलाइ न्हि लोङ भेनेङ खाल्को बिपतिगेलाइ चुमाका हिघाहि। इदोइ बिपतिगेलाइ आम्तिम हि हाइपालिपानु जेलाउ इदोइ नासातावा कालाउ परमेस्वरको चेरचुङ दोकावा। 2कालाउ का समुन्द्र भाइका तिङका आमेने तिङघा, जेदोङ काँसा भाइपा चिल्कातेङ हिघाहि कालाउ मे दोफा बुङ मिसालाइका हिघाहि। का उङको द्‍याङगेलाइहेङ बुङ तिङघा जाइहेङ राक्सेस जितिलि मादोहि। इम्बालाइ इङको राक्सेस कालाउ इङको मुर्तिहेङ मापुजिहि, कालाउ वाको सङख्याको छाप मालागाइहि, जेदोङ राक्सेसको मिङको चिन्हा हि। कालाउ इन्ता समुन्द्र भाइका तिङपाका भाइपा काम्भेता जाअ्का हिघाहि, कालाउ झाराङ परमेस्वरको पिका उर्निहेङ इम्बालाइ झाराङ चाअ्का हिघाहि।

3इम्बालाइ ले लेतेङ हिघाहि जेसाङ परमेस्वरको सेवक मोसा हेन्जाङ लाम्फा लेका हिघाहि। इम्बालाइ येसुको बाखानाइको ले लेहि, जाइ थुमा भाइकाङ हि:

“हे परमप्रभु परमेस्वर सरबुङसाइका,

जेदोङ नाअ् पान्हा इङको माहान कालाउ आचाम्माका हि।

नाअ् दोङ गोताङ राइजिको राजा हिना।

नाङको गोताङ काम सहि कालाउ धार्मिक हि।”

4“हे प्रभु, नासेहेङ झाराङ द्‍याङगेलाइ थिखे,

कालाउ झाराङ नाङको मिङको साम्मान पाखे,

हाइपालिपानु नाअ् खिनिङ पबित्तरो परमेस्वर हिना।

गोताङ सारभिको गोताङ द्‍याङगेलाइ नाङकोता लोखे कालाउ नाङको आराधाना पाखे,

हाइपालिपानु नाङको धार्मिक कामगेलाइ झाराङ गिखे।”

5इदोइ द्‍याङगेलाइ ले लेलि दोतेङ न्हुसो, का तिङघा स्वर्गता मुन्दिर हेअ्न्हाका हिघाहि। जेदोङ इङको पाल भाइका हि। जाइहेङ हिब्रुगेलाइ ताइ दोफाङ चाका-मान्दा थामेता न्हे कुरि बासार थेकापा घुराइगिल्हि। 6-7कालाउ न्हुसो, न्हि लोङ स्वर्गदुतगेलाइ इङको मुन्दिरसो बाहार लोहि, जाइ आम्तिम न्हि लोङ बिपतिगेलाइ चुम्तेङ ल्वाङ। ओबालाइ चिल्काका जे:का लोखोन धाबा होङका हिघाहि, कालाउ इम्बालाइको तुम्ता वरिपरि सोनाको पेत्तिगेलाइ बुङ हिघाहि। कालाउ द्‍यालोङ हुसि हिका प्रानिगेलाइ मध्ये एमि कालाउ गोताङ स्वर्गदुतहेङ सोनाको जाम बात्ति पिहि। जेदोङ जाम बात्ति जेलाउलाउ बुङ बान्चितेङ हिका परमेस्वरको हेथे थिलि गोइका साजाइ पोङघाका हिघाहि। 8मुन्दिर धुवाहोइ पोङघाका हिघाहि। जेदोङ परमेस्वरको महिमा कालाउ सरबुङसो लोका हिघाहि। हासु बुङ मुन्दिर लिता दुल्लि मादोघाहि जेलाउ थेकापा न्हि लोङ स्वर्गदुतसो चुमाका न्हि लोङ बिपतिगेलाइ मादोपा भरि।

Currently Selected:

प्रकास 15: DHINT

Highlight

Copy

Compare