प्रकास 1

1परमेस्वर येसु ख्रिस्टहेङ इङको म्होन्हाका काथा तिङपाहि, जेदोङ धेमाङ जेनाङ, कालाउकि वा ताइको सेवकगेलाइहेङ इदोइ काथागेलाइ देखाल पालि द्वाको। कालाउ न्हुसो येसु ताइको सेवक युहान्नाहेङ इदोइ काथागेलाइ तिङपालिको भाअ्सिङ ताइको स्वर्गदुत दिङगिल्हि। 2युहान्‍ना ताइमिङ तिङका गोताङ काथा लेखेहि, इङको परमेस्वरसो लोका सन्‍देस हि कालाउ गोताङ काथा जेदोङ येसु ख्रिस्ट दोअ्का हि। 3इदोइ आगमबानि पढेका झाराङहेङ परमेस्वर आसिस पिखे, कालाउ हिङका कालाउ केम्का झाराङहेङ आसिस पिखे। हाइपालिपानु इदोइ आमेनेगेलाइ धेमाङ जेनाङ।

न्हि लोङ मन्डलिहेङ युहान्नाको आभिबादन

4इदोइ पात्तारा का युहान्‍ना एसिया प्रदेसको न्हि लोङ मन्डलिको खान्धुराइगेलाइको भाअ्सिङ लेखेदोङखा। का प्रार्थाना पाखा कि परमेस्वर नासेहेङ वाको आनुग्रह कालाउ सान्ति तिङपाको। वा इसिका परमेस्वर हि, जाइ सुरुको सोमोइसोङ एला थेकापा कालाउ जेलाउलाउको भाअ्सिङ परिबतन माजेनाङ, परमेस्वरको सिङहासनको आगाता ह्यावा न्हि लोङ दोङ आत्मासो#1:4 न्हि लोङ दोङ आत्मासो इदोइहोइ पबित्तरो आत्माहेङ उल्लेख पाखे, कालाउ आधिमि सोचिखे कि इदोइहोइ न्हि लोङ बिसेस स्वर्गदुतगेलाइ सङकेत पाखे। कालाउ “न्हि लोङ” माकुनु “न्हि गुना” एनोङ कारनको भाअ्सिङ प्रयोग पाका हि। बिद्वानगेलाइ झ्वाइनाका हि कि “न्हि लोङ” यहुदिगेलाइको भाअ्सिङ पुराङ मानिघाखे।, 5-6कालाउ येसु ख्रिस्टसो, जाइ परमेस्वरको सत्येता खाङधुरि योग्यता देखाल पापियाङ। वा दोङ हि जाइ सिका न्हुसो आरोङ सिन्हु पाहि, कालाउ वा इदोइ सुमिङको गोताङ राजागेलाइको सासक हि। कालाउ येसु ख्रिस्ट केलाइहेङ मायारु पाखे कालाउ वाको हितिहोइ केलाइहेङ केलाइको पापगेलाइसो बान्चिपाखे। वा केलाइहेङ एनोङ जाति बानाइहि जाइ दोफा परमेस्वर ओबालाइको राजाको रुपता हिका हि। कालाउ वा केलाइहेङ वाको आबा परमेस्वरको भाअ्सिङ पुजारिगेलाइ बानाइहि। वा दोङ जेलाउलाउको भाअ्सिङ साम्मान कालाउ खाबारा गोताङ सोमोइ निङलि गोयाङ। आमेन।

7हिङसु, वा बादेलगेलाइ दोफा लोदोङखे, कालाउ झाराङ वासेहेङ तिनावा। ओबालाइ बुङ जाइ वासेहेङ भालाहोइ बाहि कालाउ वासेहेङ सेअ्हि। कालाउ प्रिथिबिता हिका गोताङ द्‍याङगेलाइ जेलाउ वासेहेङ तिनावा, इम्बालाइ जिउधाइ लोपाङ खारावा कालाउ तुम्ता थेकावा। एसाङ जेनाको। आमेन।

8परमप्रभु परमेस्वर दोअ्खे, “का दोङ आल्फा कालाउ ओमेगा हिघा” का दोङ सुरु कालाउ आन्त्य हिघा। वा इसिका परमेस्वर हि, जाइ सुरुको सोमोइसोङ एला थेकापा कालाउ जेलाउलाउको भाअ्सिङ परिबतन माजेनाङ, कालाउ जाइ आरोङ ल्वाङ। वा सरबुङसाइका परमप्रभु हि।

द्याङको चानको दर्सन

9का युहान्‍ना, नाङको दोफाङ खान्धुराइ, नेलाइ येसुता हिकागेलाइ झाराङ परमेस्वरको सासनको सहभागि जेङस्वाना, कालाउ केलाइ झाराङ दुख-कस्ट भोगिन्हाखे कालाउ येसुको भाअ्सिङ धैर्य दोफा सहिलि बुङ गोइखे। परमेस्वरको बचन कालाउ येसु ख्रिस्टको साक्सि दोअ्नाङ का पत्मोस दोअ्का टापुता#1:9 पत्मोस दोअ्का टापुता पत्मोस एनोङ टापु हि, जेता कैदिगेलाइहेङ जेलाउ सेलाउ रोमिगेलाइ कैदिता ताअ्का हिघाहि। हिघा। 10आइताबारको दिना परमेस्वरको आत्मा काङकोता लोहि, का काङको न्हु पाहा आधिमिहेङ का दोफा नुइ धुइका कोनिङ हिङघा जेदोङ सानाइको भाइका चेराका गाला कालाउ झालाफालापा हिघाहि। 11इङको गालाहोइ एसा दोअ्हि, “नाअ् जेदोङ तिङखेना इङको एनोङ कितापता लेखे, कालाउ इङकोहेङ न्हि लोङ दोङ मन्डलिगेलाइहेङ दिङगिल्सु, जेदोङ चाहि एफिसस सहर, स्मुरना सहर, परगाम सहर, थिआटिरा सहर, सार्दिस सहर, फिलाडेलफिया सहर कालाउ लाउडिकिया सहर हि।”

12काङको दोफा काथा पाकाताङ हि दोअ्तेङ का खाङलि घुरिघा, जेलाउ का घुरिघा कालाउ का ओबालाइको गेसागेलाइ दोअ्फाङ हिका न्हि लोङ सोनाको चेरादानिगेलाइ तिङघा। 13“हिदोइ बुङ द्‍याङ भाइका तिङघाखे” जेदोङ चाहि चेरादानिगेलाइको माझाता जातेङ हिघाहि। वा ताइको पाइताला थेकाका लोखोन धाबा होङका हिघाहि। कालाउ वाको तुम्ता भरि सोनाको रङको फिता लागाइका हिघाहि। 14वाको पुरिङको पुसुङ कापाइ माकुनु हिउ भाइपा हेन्जा जे:का कालाउ उन भाइपा जाहाँका हिघाहि, कालाउ वाको मिसियाँ जोल्का तिका मे भाइका हिघाहि। 15वाको पाइतालागेलाइ मेको वाङखाराका घाराता ओपातेङ तल्काइका कासाको भाइका हिघाहि, कालाउ वाको गाला चाहि चालाचुलुका चि गेलाइको गाला भाइका हिघाहि। 16वाको ताइको दाम्पाहा खुरहोइ न्हि लोङ फुरुगेलाइ रिम्तेङ ताअ्का हिघाहि, कालाउ वाको नुइसो न्हे धार हिका चुका कात्ति ओल्लेका हिघाहि। वाको ह्राइ थाअ्साइतेङ जोल्तेङ हिघाहि जेसाङ आधा दिनाता सोना चिल्कातेङ हिघाहि।

17जेलाउ का वासेहेङ तिङघा, कालाउ एन्सालाउ दोङ का वाको चरनता परिघा। का सिका द्‍याङ भाइपा हिघाखा। कालाउ वा ताइको दाम्पाहाको खुर काङको ह्रुता ताअ्तेङ दोअ्हि “माअ्थि, का दोङ सुरु कालाउ आन्त्य हिघा। 18का जिबनको मुल हिघा, का एखे सिघा। कालाउ एला का सिन्हुका हिघा कालाउ का जेलाउलाउको भाअ्सिङ सिन्हुतेङ ह्याङका, कालाउ का दोफा सिका ह्रुता खाबारा हि, कालाउ पाताल ह्रुता बुङ जेता सिका द्‍याङगेलाइ हिखे। 19ओदोङ भाअ्सिङ जेदोङ नाअ् तिङका हिना, इङको लेखे, न्हेनोङ काथागेलाइ जेदोङ एला जेङतेङ हि कालाउ इङको काथागेलाइ जेदोङ न्हुसो जेनाङ। 20एला का काङको दाम्पाहा खुरता न्हि लोङ फुरुगेलाइको माने हाइ वाला कालाउ न्हि लोङ सोनाको चेरादानिगेलाइको माने हाइ हि दोअ्ताङका जेदोङ लाम्फा थाहा मान्थुघाहि। याको माने या हि: न्हि लोङ फुरुगेलाइ इङको स्वर्गदुतगेलाइहेङ तिम्पाखे जाइ न्हि लोङ मन्डलिगेलाइहेङ सामाराइखे कालाउ न्हि लोङ चेरादानिको न्हि लोङ मन्डलिगेलाइहेङ तिम्पाखे।”

Currently Selected:

प्रकास 1: DHINT

Highlight

Copy

Compare