फिलिप्पि 1

1ख्रिस्ट येसुको बान्धाइतिगेलाइ, का पावल तिमोथि दोफा इता पात्ताराता फिलिप्पि सहरता हिका मन्डलिको आगुवागेलाइ कालाउ खान्धुराइगेलाइहेङ साघाइका दोफाङ गोताङ परमेस्वरको जनगेलाइहेङ लेखेदोङखा, जाइ ख्रिस्ट येसुको दोङ हि।

सेउपाखा

2केलाइ प्रार्थाना पान्हाखे कि, परमेस्वर केलाइको आबा कालाउ प्रभु येसु ख्रिस्टको आनुग्रह कालाउ सान्ति नेलाइ दोफा हितेङ ह्याको।

पावलको परमेस्वरहेङ धन्यबाद कालाउ खान्धुराइगेलाइको भाअ्सिङ प्रार्थाना

3का जेलाउ बुङ नेलाइको बारेता सोचिखा कालाउ परमेस्वरहेङ धन्यबाद पिखा। 4कालाउ काङको गोताङ प्रार्थानाता का नेलाइ झाराङको भाअ्सिङ आनान्दसोङ जेलाउ बुङ परमेस्वरको साघाइको भाअ्सिङ बिन्ति पाखा। 5हाइपालिपानु नेलाइ सुसमाचारता खाङधुरि पाका दिनासोङ एला थेकापा येसु ख्रिस्टको बारेता सुसमाचार प्राचार पालि कासेहेङ साघाइकानाङ का धन्यबाद पिखा। 6का इदोइ काथाता पुरा खाङधुरि पाखा, कि परमेस्वर नेलाइकोता जेदोङ आसल काम सुरु पाहि, इङको वासेहेङ दोङ जेलाउ येसु ख्रिस्ट आरोङ ल्वाङ कालाउ पुरा पावा।

7नेलाइ झाराङको भाअ्सिङ का इसिका बिचार पालि ठिक हि, हाइपालिपानु का नेलाइ झाराङहेङ हेन्जा प्रेम पाखा, हाइपालिपानु का कैदि हिलाउ नेलाइ सुसमाचारको सुरिक्स्या कालाउ इदोइहेङ सत्ये प्रमानित पाका या न्हेनोङ दोङ कामता काङको दोफा परमेस्वरको आनुग्रहता झ्वाइनाका हिसुना। 8हाइपालिपानु परमेस्वर काङको साक्सि हि, कि हेसापा ख्रिस्ट येसुको प्रेमता का नेलाइ झाराङहेङ भेतिलि भोखा।

9का प्रार्थाना पाङका, कि परमेस्वरको ग्यान कालाउ बिबेकता ता-ताइमिको भाअ्सिङ नेलाइको प्रेम झन बाढेकाताङ हानाको, 10कालाउकि जाइ काम पालि उत्तम हि इङको नेलाइ साल्लि दोअ्स्वाना, जेलाउ ख्रिस्ट आरोङ ल्वाङ इङको दिनाको भाअ्सिङ सुद्द कालाउ दुसुलि मादोका जेङतेङ हिसु। 11कालाउ जेसाङ एनोङ सिङ फल पिखे, एन्साङ दोङ नेलाइ परमेस्वरको महिमा कालाउ बाखिनको भाअ्सिङ येसु ख्रिस्टता ठिक काम पातेङ हानेसु।

सुसमाचार प्राचार जेङकाता पावलको आनान्द

12खान्धुराइ ओनेगेलाइ इदोइ काथा नेलाइहेङ थाहा जेनाको दोअ्तेङ का भोखा, कि का ह्रुता जाइ लागिका काथागेलाइहोइ झन बास्ताबता सुसमाचार फाइलाइपालि साघाइ जेङका हि। 13इता थेकापा कि साम्रात महलको गोताङ सिपाइ कालाउ बाकि गोताङ द्‍याङगेलाइकोता बुङ इदोइ थाहा जेङका हि, कि का ख्रिस्टको सेवा पाका हिनाङ झ्यालखानाता हिघा। 14हेन्जा जोसो खान्धुराइ ओनेगेलाइ, का एला झ्याल्खानाता परेकाता प्रभुता साहासि जेङका हि, कालाउ परमेस्वरको बचन साहास सो प्राचार पाका जेङका हि।

15या सत्ये हि, कि हेथेते आरिस कालाउ इख पातेङ कालाउ आरु द्‍याङगेलाइहेङ रेम्का बिचारसो ख्रिस्टको बारेता सुसमाचार प्राचार पाखे। 16उङको द्‍याङगेलाइ रेम्का बिचारसो कालाउ प्रेम दोफा सुसमाचारको प्राचार पाखे, हाइपालिपानु इम्बालाइहेङ थाहा हि, कि ख्रिस्टको सुसमाचारको सुरिक्स्याको भाअ्सिङ कासेहेङ इता झ्याल्खानाता ताअ्का हि। 17कालाउ उङको इख पाका द्‍याङगेलाइ चाहि स्वार्थको कारन ख्रिस्टको बारेता प्राचार पाखे, हाइपालिपानु इम्बालाइ इता झ्याल्खानाता काङको कस्ट थोपिलि भोखे। 18हाइ दोङ ज्याको, मुल काथा चाहि इदोइ दोङ हि, कि गोताङ प्रकारसो चाहे मारेम्का कारनहोइ, चाहे सत्येता, ख्रिस्टको बारेता सुसमाचारको प्राचार जेनाको, का इदोइताङ लेङचाङका।

ख्रिस्टको भाअ्सिङ जियाइलि

19एइ, का लेङचातेङ ह्याङका। हाइपालिपानु का गिखा, कि नेलाइको प्रार्थाना कालाउ येसु ख्रिस्ट दोङ दिङगिल्पिका पबित्तरो आत्माको साघाइहोइ या काङको लाअ्पालिको भाअ्सिङ हि। 20काङको एकदम इच्छा कालाउ आस इदोइ दोङ हि, कि का लेदेरलि मागोइयाङका। कालाउ का हानिका सोमोइता दोअ्का भाइपाङ ख्रिस्टको बारेता दोअ्लि साहास जेनाङ। चाहे का बान्चियाको माकुनु सियाको, का काङको गोताङ जिबनहोइ ख्रिस्टहेङ लागातार आदार पाङका। 21हाइपालिपानु काङको भाअ्सिङ बान्चिलि ख्रिस्टको आदारको भाअ्सिङ जेनाङ, कालाउ सिलि चाहि फाइदा हि, हाइपालिपानु का ख्रिस्ट दोफा ह्याङका। 22जेसापा का जिउता दोङ बान्चिलि गोइनु बुङ का ख्रिस्टको भाअ्सिङ काम लागिका जेनाङका। कालाउ बुङ का सिलि माकुनु बान्चिलि हिदोइ चाहि छाल्लि गोइका हि, इङको का दोअ्लि माद्वाङका। 23का मागियाङका इङको न्हेनोङ मध्ये हिदोइ चाहि साल्लि गोइका हि। भरु सितेङ ख्रिस्ट दोफा हिलि इच्छा हि, हाइपालिपानु या हेन्जाङ दोङ रेम्का हि। 24कालाउ का जिउता हितेङ हिलि नेलाइको साघाइको भाअ्सिङ झन आवस्यक हि। 25इदोइ काथाता का निस्चित हिघा कालाउ का गिखा, कि का सिन्हुतेङ ह्याङका कालाउ नेलाइ झाराङ दोफा ह्याङका, कालाउ खाङधुरिता बल्लियाका बानाइलि कालाउ आनान्दको भाअ्सिङ का नेलाइहेङ साघाइयाङका। 26कालाउकि जेलाउ का आरोङ नेलाइकोता ल्वाङका कालाउ जेदोङ काम येसु ख्रिस्ट काङको पाहासो पाअ्दोङखे। काङको कारन ख्रिस्ट येसुता गर्ब पालि नेलाइहेङ आझै हेन्जाङ कारनगेलाइ ह्यावा।

27कालाउ मुख्य काथा इदोङ हि कि नेलाइको जिबनको चाल-चलन ख्रिस्टको सुसमाचारको भाअ्सिङ योग्य जेनाको। का चाहे लोतेङ नेलाइहेङ तिनाको, चाहे लोलि मादाको, कालाउ बुङ का नेलाइको बारेता इदोइ दोङ काथा हिङलि भोखा, कि नेलाइ एनोङ दोङ उधेस्यता बल्लियाका जेङतेङ हिसुना, कालाउ ए दोफाङ मिलितेङ सुसमाचारको खाङधुरिको भाअ्सिङ परिस्रोम पासुखेना, 28कालाउ बिरोधिगेलाइ दोफा हिदोइ बुङ काथाता माअ्थिसुखेना। इम्बालाइको भाअ्सिङ या हान्तिको लक्स्न दोङ, कालाउ नेलाइको भाअ्सिङ चाहि मुक्तिको ल्क्स्न हि, जेदोङ मुक्ति चाहि परमेस्वरसो लोका हि। 29हाइपालिपानु परमेस्वर नेलाइहेङ ख्रिस्टता खाङधुरि पालि खिनिङ माको, कालाउ वाको ह्रुता खाङधुरि पाकानाङ दुख भोगिलि बुङ आबसर पिका हि। 30कालाउ इङकोङ सङघरस जेदोङ हानिका सोमोइता नेलाइ काङकोता तिङसुन्हा कालाउ जिसिका दुखको काथा नेलाइ एला हिङका हिसुना, इन्सिका दुखता का आझै बुङ इता झ्यालखानाता हिघा।

Currently Selected:

फिलिप्पि 1: DHINT

Highlight

Copy

Compare