हिब्रु 3

मोसा खान्तेङ येसु माहान

1ओदोङ भाअ्सिङ परमेस्वर वाको दोफा स्वर्गता झ्वाइनालि काइका खान्धुराइ ओनेगेलाइ दोङ हिसुना, येसुता मन लागाइसु जाइ केलाइको भाअ्सिङ परमेस्वरको दुत कालाउ प्राधान पुजारि जेङका हि। 2कालाउ येसु परमेस्वर पाहासो पिका गोताङ काम पाहि, कालाउ एसापा दोङ मोसा बुङ परमेस्वर पाहासो पिका गोताङ काम खाङधुरि योग्यसोङ पुरा पाहि। 3-4द्‍याङगेलाइ साअ् धाम्खे कालाउ परमेस्वर दोङ गोताङ थोक सिरजाइहि, जेसाङ साअ् खान्तेङ साअ् धाम्कालाइ हेन्जा साम्मान निङखे, एन्साङ दोङ येसु बुङ मोसा खान्तेङ हेन्जा बार्का साम्मानको योग्य हि। 5हाइपालिपानु मोसा बान्धाइति भाइपा परमेस्वरको साअ्को गोताङ द्‍याङगेलाइ दोफा खाङधुरि योग्य जेङहि, कालाउ मोसाको पाका काम दोङ परमेस्वर भबिस्यता धुइलि तोम्का सत्ये काथाको उधारन हिघाहि। 6कालाउ येसु ख्रिस्ट चाहि परमेस्वरको साअ्को द्‍याङगेलाइ दोफा चानको रुपता खाङधुरि योग्य हिघाहि, कालाउ जेसापा केलाइ केलाइको आसता साहास ताअ्तेङ हिनाहि पानु, कालाउ केलाइ परमेस्वरको द्‍याङगेलाइ दोङ हिनाहि।

खाङधुरि मापाकालाइको बिरोधता चेताउनि

7ओदोङ भाअ्सिङ पबित्तरो आत्मा धर्मसास्तरता दोअ्खे,

नानि नेलाइ परमेस्वरको गाला हिङसुन्हा,

8चाका-मान्दा थामेता जाचिका सोमोइता, नेलाइको पुर्खागेलाइ परमेस्वरको बिरोध पानाङ भाइपा

वाको आग्या केम्लि नेलाइ इन्कार मापासु,

9इन्ता नेलाइको पुर्खागेलाइ कासेहेङ मासाअ्तेङ जाचिहि,

जेलाउ कि, इम्बालाइ न्हे कुरि बासार थेकापा काङको आचाम्माको कामगेलाइ तिङका हिघाहि।

10ओदोङ भाअ्सिङ का इङको पुस्ता दोफा चेर ताम्पातेङ का दोअ्घा,

हाइपालिपानु इम्बालाइ काङको आनुसरन पालि इन्कार पाहि, कालाउ इम्बालाइ काङको पिका काम पालिसो इन्कार पाका हि।

11ओदोङ भाअ्सिङ का काङको चेर ताम्पाकाता केरा चाघा,

कालाउ काङको माइसालि पिका थामेता

इम्बालाइ हेलाउ बुङ दुल्लि मानिनाङ।

12खान्धुराइ ओनेगेलाइ, चङख हिसु, कालाउकि नेलाइ मध्ये हासुता बुङ हिका दुस्ट कालाउ खाङधुरि मापाका ह्रदयहोइ नेलाइहेङ जिबन पिका परमेस्वरसो लाअ्पातेङ दुरे चुम्पुलि माद्वाको। 13हाइपालिपानु नेलाइ जेलाउ बुङ धर्मसास्तरता एसा दोअ्का हिङसुखेना, “नानिको दिनासो”, नेलाइ एमिसो-भेनेङहेङ रेम्का तरिकासो ताइको जिबन जियाइलि हाउसाइ पासु। माकुनुते नेलाइ पापको छलिता परिस्वाना, कालाउ नेलाइको ह्रदय राङका जेनावा। 14कालाउ जेसापा केलाइ लाङखेता हिका खाङधुरिता केलाइको जिबनको आनान्त थेकापा ख्रिस्टता बल्लियाका जेङतेङ हिनाहि पानु, केलाइ ख्रिस्ट दोफा बानाबोरको हक जेनाङ। 15जेसाङ धर्मसास्तरता इसिका लेखेका हि,

“नानिङ नेलाइ परमेस्वरको गाला हिङस्वाना पानु,

कालाउ नेलाइको पुर्खागेलाइ परमेस्वरको बिरोध पाका भाइपा

वाको आग्या केम्लि इन्कार मापासु।”

16हासु परमेस्वरको गाला हिङतेङ बुङ वाको बिरोध पाहि? इम्बालाइ एस्राएल सारभिको द्‍याङगेलाइ दोङ हि, जाइहेङ मोसा मिस्रो सारभिसो ओल्लेपातेङ चुमाका हिघाहि। 17कालाउ परमेस्वर उङको द्‍याङगेलाइ दोफा न्हे कुरि बासार थेकापा चेर ताम्पाहि, कालाउ जाइ-जाइ पाप पाका हिघाहि, इम्बालाइ चाका-मान्दा थामेता सितेङ हानिहि। 18जेलाउ परमेस्वर केरा चातेङ या घोसाना पाहि कि, इम्बालाइ काङको पिका थामेता माइसा चालि दुल्लि मानिनाङ, हाइपालिपानु वा उङको द्‍याङगेलाइको बारेता दोअ्घाहि, जाइ परमेस्वरको आग्या केम्लिसो इन्कार पाका हिघाहि। 19इदोइ पाहासोङ केलाइ थाहा निङका हिनाहि कि, जाइ खाङधुरि पालि इन्कार पाका कारन इम्बालाइ माइसा चाका थामेता दुल्लि मानिङहि।

Currently Selected:

हिब्रु 3: DHINT

Highlight

Copy

Compare