हिब्रु 13

आम्तिम आरति

1नेलाइ ख्रिस्टता खान्धुराइ दादा कालाउ बाइ ओनेगेलाइ भाइपा एमिसो-भेनेङहेङ मायारु पातेङ हिसु। 2जेदोङ खान्धुराइ ओनेगेलाइहेङ नाअ् लाम्फा हेलाउ बुङ भेतिका मान्थुना इम्बालाइहेङ ताइको साअ्ता बान्साको रुपता स्‍वागत पालि निल्लि माएल। हाइपालिपानु एसापा दोङ आधिमिते थाहा मानिङसिङ स्वर्गदुतगेलाइको स्‍वागत पाका हि।

3ताइमिङ बुङ इम्बालाइ दोफा कैदिता परिका कोनिङ झ्यालखानाता हिकालाइको ख्याल ताअ्सु, कालाउ ताइमि जेदोङ दुखको पिडाता परिका भाइपा जेसाङ नेलाइ इम्बालाइको पिडा ताइको जिउता आनुभब पासुखेना।

4झाराङको माझाता बिहु चाहि आदारनिय ह्याको, कालाउ एमिसो-भेनेङ दोफा जेलाउ बुङ खाङधुरि योग्य जेङतेङ हिसु, हाइपालिपानु दुराचारि कालाउ कासिबिरिगेलाइको न्याय परमेस्वर पावा।

5ताइको जिबनहेङ सम्पतिको चिचाहासो लाअ्पातेङ ताअ्सु, नेलाइ दोफा हिका काथाता सुकापा हिसु, हाइपालिपानु परमेस्वर ताइमिङ दोअ्का हि,

“का नेलाइहेङ हेलाउ बुङ मालाअ्ताङका

कालाउ का नेलाइहेङ हेलाउ बुङ मात्याग्याङका।”

6ओदोङ भाअ्सिङ माअ्थिसिङ केलाइ दोअ्नाखे,

प्रभु काङको साहायक हि,

का माथियाङका, हाइ पालि का थिलि कालाउ,

हिदोइ बुङ द्‍याङ कासेहेङ हाइ पालि द्वावा रो?

7ताइको आगुवागेलाइको फोम ताअ्सु, जाइ परमेस्वरको बचन नेलाइहेङ हिङपाहि, हेसा इम्बालाइ ताइको जिबन जियाइहि कालाउ सिका थेकापाङ खाङधुरि योग्य हितेङ हि, एन्साङ दोङ केलाइ बुङ इम्बालाइ भाइपाङ परमेस्वरता खाङधुरि पाइने। 8येसु ख्रिस्ट आन्जि, नानि कालाउ जेलाउलाउ बुङ ए सामान हिका हि, वा हेलाउ बुङ माबदिलिखे।

9नेलाइहेङ थाहा माजेङका आचाम्माको सिक्स्याको मारेम्का दामाता मालागिसु, कालाउ चाका-आम्का आमेनेको बारेता नियमगेलाइ मानितेङ माको, भरु परमेस्वरको आनुग्रहता नेलाइको ह्रदय बल्लियाका ह्याको। हाइपालिपानु इन्सिका मुन्धुम पालि केम्कालाइको उपकार जेङका मान्थु।

10केलाइको एनोङ बेदि हि, जाइता चढाइका भोगगेलाइसो पबित्तरो खोपाराता काम पाका पुजारिगेलाइहेङ चालि खाबारा मान्थु। 11बासार किपाङ प्राधान पुजारि पाप भोगको भाअ्सिङ गुपुसको हिति माहा-पबित्तरो थामेता पाप स्याको भाअ्सिङ इङकोहेङ चुमाघाखे, कालाउ इङको गुपुसको जिउ चाहि द्‍याङगेलाइ हिका थामे खान्तेङ बाहार#13:11 बाहार इङको सोमोइता द्याङगेलाइ खोपारागेलाइता हिघाखे, हाइपालिपानु इङको बेला सहर मान्थुघाखे। चुमातेङ ओअ्घाखे। 12ओदोङ भाअ्सिङ येसु बुङ वाको ताइकोङ हिति पाहासो द्‍याङगेलाइहेङ पबित्तरो पापालि यरुसेलेम सहर खान्तेङ बाहार, “वा कस्ट भोगिहि कालाउ सिहि।” 13ओदोङ भाअ्सिङ केलाइ बुङ सहर बाहार वाकोता हानाइने कालाउ वा दोङ सहिका बेइज्यत केलाइ बुङ सहियाइने। 14हाइपालिपानु इदोइ प्रिथिबिता, केलाइ दोफा हिदोइ बुङ सहर मान्थु, जेदोङ जेलाउको भाअ्सिङ ह्याको। कालाउ लोका सहरको चाहि केलाइ आस पातेङ हिनाखे।

15ओदोङ भाअ्सिङ परमेस्वरकोता येसु पाहासो लोसु, कालाउ केलाइ लागातार केलाइको परमेस्वरको मिङको महिमाको भाअ्सिङ घोसाना पाकाताङ बाखिनको भोग चढाइने। हाइपालिपानु इदोइ बाखानाइ केलाइको वाकोता खाङधुरि पालि सुइकारलि दोङ हि। 16भलाइ पालि ताइमि दोफा हिका आमेने आवस्यकता परिकालाइहेङ बाख्राइलि मानिल्सु, हाइपालिपानु इसिकाङ भोगगेलाइता परमेस्वर खुसि जेङखे।

17नेलाइको आगुवागेलाइको आग्या केम्सु कालाउ इम्बालाइको आधिनता हिसु, इम्बालाइको काम नेलाइको आत्मागेलाइहेङ रक्स्या पालि दोङ हि, कालाउ इम्बालाइ नेलाइको बारेता परमेस्वरहेङ लेखा पिलि गोयाङ, इदोइ काम इम्बालाइ आनान्दसो पाको, दुख मानितेङ माको, माकुनुते नेलाइहेङ हिदोइ बुङ फाइदा माजेनाङ।

18केलाइको भाअ्सिङ प्रार्थाना पासु, केलाइहेङ निसित दोङ थाहा हि कि, केलाइको बिबेक जाहाँका हि, हाइपालिपानु केलाइ जेलाउ बुङ आसल काथागेलाइ पालि भोनाखे। 19नेलाइहेङ काङको बिसेस आग्राह इदोइ हि कि, काङको भाअ्सिङ प्रार्थाना पापिसु, कालाउ का आरोङ नेलाइकोता मारफाङ लोलि द्वाको।

प्रार्थाना

20-21कालाउ एला, सान्तिको परमेस्वर, जाइ प्रभु येसुहेङ सिकासो सिन्हु पाहि, वाको इच्छा पुरा पालिको भाअ्सिङ नेलाइहेङ गोइका गोताङ गुनगेलाइ प्याको, कालाउ परमेस्वर वासेहेङ मन परिका गोताङ काथागेलाइ येसु ख्रिस्ट पाहासो पालिको भाअ्सिङ केलाइहेङ साघाइयाको। येसु दोङ भेडागेलाइको आसल लाखुरिया हि दोअ्का काथा आनान्त बाचाको चिन्हा वाको हितिसो दोङ तिङपाखे, वासेहेङ दोङ जेलाउलाउको भाअ्सिङ महिमा मिलियाको। आमेन। 22खान्धुराइ ओने, का नेलाइहेङ सेउपाखा, कि काङको लेखेका इदोइ हाउसाको सन्देसहेङ धैर्य दोफा हिङसु, हाइपालिपानु नेलाइहेङ का आतुइसा बानाइतेङ लेखेका हिघा।

23नेलाइहेङ इदोइ थाहा पिलि भोखा, कि केलाइको खान्धुराइ ओने तिमोथि झ्यालखानासो छुतिका हि, जेसापा वा मारफाङ लोहि पानु का वाको दोफा नेलाइहेङ भेतिलि ल्वाङका।

24नेलाइको गोताङ आगुवागेलाइ कालाउ झाराङ परमेस्वरको द्‍याङगेलाइहेङ बुङ सेउपासु। इटालि सारभिसो लोका खान्धुराइगेलाइ नेलाइहेङ बुङ सेउपाखा पिगिल्का हि।

25नेलाइ झाराङ दोफा परमेस्वरको आनुग्रह ह्याको। आमेन।

Currently Selected:

हिब्रु 13: DHINT

Highlight

Copy

Compare