हिब्रु 10
10
ख्रिस्टको बलि जेलाउलाउको बुङ भाअ्सिङ
1कालाउ मोसा पाहासो पिका व्यवस्था भबिस्यता लोका आसल काथागेलाइको झालाफालापा माजेङका रुप खिनिङ हि, इङको बास्ताबिक काथा माको, ओदोङ भाअ्सिङ व्यवस्थाको आधिनता हिका द्याङगेलाइ ओदोङ किसिमको भोग बासार किपाङ चढाइखे, कालाउ इदोङ भोगगेलाइहोइ परमेस्वरहेङ आराधाना पालि भेरपा लोका द्याङगेलाइहेङ हेलाउ बुङ पुर्न सिद्द बानाइलि मादोखे। 2जेसापा इदोङ भोग पाहासो परमेस्वरको आराधाना पाका द्याङगेलाइ ताइको पापसो सुद्द जेङनु, इम्बालाइ ताइमिहेङ दुसिका मासोचिधाङ, कालाउ भोग चढाइका काम बुङ माजेङधाङ। 3-4कालाउ सत्ये काथा इदोङ हि कि, इम्बालाइको चढाइका इङको बलिगेलाइ होइ गोताङ बासार किपाङ इम्बालाइहेङ पापको दुसिका जेङका फोम पापावा, हाइपालिपानु गुपुसगेलाइ जेसाङ साँढे कालाउ बोकागेलाइको हितिहोइ पाप पाका द्याङगेलाइको दुसिका कातिलि मादोखे।
5ओदोङ भाअ्सिङ सुमिङता लोलाउ ख्रिस्ट ताइको आबाहेङ दोअ्हि,
द्याङगेलाइसो नाअ् भोग कालाउ भेतिगेलाइ माभोना,
भरु नाअ् कासेहेङ द्याङ बानाइका हिना।
6होम भोग कालाउ पाप बलि गेलाइता नाअ् खुसि माजेङन्हा।
7कालाउ ख्रिस्ट परमेस्वरहेङ दोअ्हि, “का इता हिघा, हे परमेस्वर खाङ, धर्मसास्तरको कितापता काङको बारेता लेखेका भाइका
नाङकोङ इच्छा पुरा पालि का लोका हिघा।”
8हाइपालिपानु मोसाको व्यवस्थाता एसा लेखेलाउ बुङ, नेलाइ पाप स्यामाको भाअ्सिङ भोग कालाउ भेतिगेलाइ, होम बलि कालाउ पापबलिगेलाइ चढाइलि गोइखे, ख्रिस्ट दोअ्हि, “इदोङ काथागेलाइहोइ नेलाइहेङ खुसि मापिहि।”
9-10कालाउ न्हुसो ख्रिस्ट एसा दोअ्हि, “हे परमेस्वर खाङ, नाङकोङ इच्छा पुरा पालि का लोका हिघा” परमेस्वर लाङ भोग पिका कारारगेलाइ खारेज पाहि, कालाउकि वा नावा कारारगेलाइ सुरु पालि द्वाको। ओदोङ भाअ्सिङ येसु ख्रिस्ट ताइको जिउहेङ एखेताङ कालाउ जेलाउलाउको भाअ्सिङ भोग पिहि कालाउ इङको पाहासो केलाइ पबित्तरो जेङका हिनाहि।
11पुजारिगेलाइ बाराम्बार गोताङ दिना बेदिको आगाता जाअ्तेङ द्याङगेलाइको दुसिका मोअ्पालिको भाअ्सिङ मुन्धुमगेलाइ पाखे। इम्बालाइ लागातार एनोङ दोङ खाल्को भोग चढाइखे, जाइ हेलाउ बुङ पाप ल्होपातेङ चुम्पुलि मादोअ्खे। 12कालाउ ख्रिस्ट ताइमिङहेङ जेलाउबुङको भाअ्सिङ थेम्का पाप स्यामाको भाअ्सिङ एनोङ खिनिङ भोग चढाइहि, कालाउ न्हुसो वा परमेस्वरको दाम्पाहा खुर भारि झाउका साम्मानको थामेता योम्हि। 13-14ओदोङ भाअ्सिङ ख्रिस्ट एखेताङ सिपिहि, कालाउ द्याङगेलाइको पाप स्यामाको भाअ्सिङ कालाउ जेलाउलाउको भाअ्सिङ बलि जेङपिहि, कालाउ ताइको सारा सतुरुगेलाइहेङ माहारिपा धाउ ख्रिस्ट इन्ताङ ह्रुम्तेङ हिखे। हाइपालिपानु एनोङ दोङ बलि पाहासो पबित्तरो बानाइदोङखे कालाउ इम्बालाइहेङ वा जेलाउलाउको भाअ्सिङ सिद्द बानाइका हि।
15पबित्तरो आत्मा बुङ इदोइ सत्ये दोअ्तेङ केलाइहेङ साक्सि पिखे कालाउ लाम्फा वा दोअ्खे,
16“इङको दिना न्हुसो इम्बालाइ दोफा धेउका काङको कारार
इदोङ हि, परमप्रभु दोअ्खे,
नेलाइको हृदयता का काङको व्यवस्था ताअ् प्याङका,
कालाउ नेलाइको मनता बुङ का इङको लेखे प्याङका।” 17परमेस्वर आरोङ दोअ्खे,
“इम्बालाइको पाप कालाउ इम्बालाइको मारेम्का कामगेलाइ
का आरोङ फोम मापाङका।” 18कालाउ परमेस्वर केलाइको पाप कालाउ मारेम्का कामगेलाइको स्यामा पापिखे, कालाउ एला केलाइ हिदोइ बुङ भोग आरोङ चढाइलि आवस्यकता मान्थु।
कोसिस पालि दोअ्खे
19ओदोङ भाअ्सिङ आनाउ खान्धुराइ ओनेगेलाइ, येसु केलाइको भाअ्सिङ ताइको जिबन भोग पिकाको कारन केलाइ स्वर्गको माहा पबित्तरो थामेता साहाससोङ दुल्लि द्वाङ। 20जेलाउ ख्रिस्ट सिहि, कालाउ वा केलाइहेङ आनान्त जिबन पिलिको भाअ्सिङ नावा दामा खोलि पिहि, वा पारदा पाहासो दामा खोलि पिहि, इङको को आर्था या हि कि, वा ताइमिहेङ भोगको रुपता चढाइहि। 21कालाउ परमेस्वरको द्याङगेलाइता सासन पाका केलाइ दोफा एमि माहान पुजारि हि। 22कालाउ वा ख्रिस्टको हिति सिरकाइतेङ केलाइको ह्रदयता हिका दुसिका लाअ्पापिका हि, कालाउ केलाइको जिउ सुद्द चिहोइ झाका हि, कालाउ केलाइ तियार जेङका हिनाहि। ओदोङ भाअ्सिङ सत्ये ह्रदय कालाउ बल्लियाका खाङधुरि दोफाङ परमेस्वरको भेरपा हानाइने। 23केलाइको ताअ्का आस जेदोङ केलाइ दोफा हि दोअ्तेङ केलाइ दाबि पान्हाखे इङकोहेङ बलियापा चाअ्तेङ ताअ्ताइने, हाइपालिपानु परमेस्वरको प्रतिग्या पाका गोताङ काथा खाङधुरि योग्य दोफाङ पुरा पाङ। 24केलाइ ता-ताइमिता एमिसो-भेनेङहेङ प्रेम कालाउ भलाइ पाका कामता एमिसो-भेनेङहेङ हाउसाइ पाइने। 25हेथेको द्याङगेलाइको ते सङगति मान्हिका बानि हिखे, कालाउ केलाइ चाहि ए दोफाङ जोम्लि मालाताइने, भरु एमिसो-भेनेङहेङ झन हाउसाइ पिका काम पाइने, हाइपालिपानु केलाइ गिन्हाखे कि प्रभु धेमाङ घुरितेङ लोदोङखे।
26केलाइ इसिका पालि गोइखे, हाइपालिपानु जेसापा ख्रिस्टको बारेता सत्ये सन्देस थाहा निङतेङ बुङ केलाइ गितेङ-गितेङ पाप पान्हाहि पानु केलाइको पाप लाअ्पालिको भाअ्सिङ आरु हिदोइ बुङ भोग मान्थु जेदोङ परमेस्वर ग्रहन पाङ। 27भरु इम्बालाइ थिकाताङ परमेस्वरको न्यायको भाअ्सिङ ह्रुम्तेङ हिलि गोइखे कालाउ इम्बालाइ वाको सतुरु जेङका कारन दाल्दालाइका मेता भस्म जेनावा। 28जेसापा हासु बुङ मोसाको व्यवस्थाहेङ मा-मानिनाङ न्हेमि माकुनु सुमि साक्सि हि पानु उङको द्याङ दाया माकोसिङ सिलि गोयाङ।
29जेसापा मोसाको व्यवस्था आन्सार साजाइ इन्सिका हिघाहि पानु, जाइ परमेस्वरको चानहेङ हेला पाखे उङकोहेङ आझाइ झन बार्का साजाइ जेङखे। कालाउ वा परमेस्वरको चानहेङ खोकोइहोइ याङखे कालाउ आदार मापाखे। कालाउ वा ख्रिस्टको हितिहेङ पबित्तरो माथानिखे, जेदोङ परमेस्वर वासेहेङ पबित्तरो बानाइलिको भाअ्सिङ नावा कारार सुरु पाहि। वा पबित्तरो आत्माको आपामान पाहि, जाइ पाहासो वा आनुग्रह निङका हिघाहि। 30हाइपालिपानु केलाइ गिनाखे कि परमेस्वर दोअ्हि बादाला ह्रुका काम काङको हि, प्रतिफल का प्याङका दोअ्कालाइहेङ केलाइ नाल्न्हाखे। एसापा बुङ दोअ्का हि, “परमप्रभु ताइको द्याङगेलाइको न्याय पाङ।” 31सिन्हुका परमेस्वरको खुरसो साजाइ निङलि ओसारापाङ थिलि गोइका काथा हि।
32हानिका दिनागेलाइ फोम पासु जेलाउ नेलाइ लाङखे सत्ये धिरसुन्हा, नेलाइ हेन्जा कस्ट दोफाङ दुख बुङ भोगिलि गोइहि, कालाउ बुङ नेलाइ इस्थिर हिसुना। 33हेथेते नेलाइ मान्दा माताका कालाउ हेलागेलाइ सहिकाताङ द्याङगेलाइको आगाता नेलाइ जोम्सुन्हा कालाउ हेथेते दुख निङचाकालाइहेङ साघाइसुन्हा बुङ। 34कालाउ नेलाइ कैदिगेलाइ ह्रुता दाया तिङपासुन्हा ताइको सम्पति घिङतेङ चुम्पुलाउ बुङ खुसि जेङतेङ सहिसुन्हा, हाइपालिपानु नेलाइ गिघासुखेना कि, नेलाइ दोफा आझाइ बुङ परमेस्वरको प्रतिग्या पाका आमेनेगेलाइ हि, जेदोङ आझाइ उत्तम हि कालाउ जेलाउबुङको भाअ्सिङ हितेङ ह्यावा।
35ओदोङ भाअ्सिङ नेलाइको खाङधुरिहेङ मालाअ्सु, कालाउकि नेलाइ परमेस्वरसो बार्का इनाम निङलि दोसु। 36एला नेलाइ धैर्य हिलि गोइस्वाना, कालाउकि नेलाइ लागातार परमेस्वरको इच्छा आन्सार काम पालि दोसु। कालाउ खिनिङ नेलाइ परमेस्वरको प्रतिग्या पाका गोताङ काथा निङस्वाना। 37हाइपालिपानु धर्मसास्तरता जेसाङ लेखेका हि: परमेस्वर दोअ्खे,
“एला एघुरिताङ लोलि खाङका चाहि, जेसालाउ बुङ ल्वाङ,
कालाउ वा लेद्रा माजेनाङ।”
38कालाउ जाइ परमेस्वरता खाङधुरि पाखे, वा दोङ परमेस्वर पाहासो धर्मि जेङखे कालाउ जेसापा वा कासेहेङ इन्कार पाहे पानु, का वाको दोफा मालेङचाङका।
39कालाउ केलाइ परमेस्वरहेङ इन्कार पाका कालाउ हान्ति जेङकालाइ मध्येको माको, भरु केलाइते परमेस्वरता खाङधुरि पाकालाइहेङ बान्चि पाकालाइ मध्येको हिनाहि।
Currently Selected:
हिब्रु 10: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
