एफिसि 2

सिकासो जिबन

1नेलाइ येसुता खाङधुरि पालि खान्तेङ लाम्फा आत्माता सिका हिघासुखेना, कालाउ नेलाइ दोफा परमेस्वरसो निङका जिबन मान्थुघाखे, हाइपालिपानु नेलाइ पाप पासुना कालाउ परमेस्वरको आग्या माकिसुन्हा। 2लाम्फा नेलाइ इदोइ सुमिङको द्‍याङगेलाइ कोनिङ हिगिल्घासुखेना कालाउ नेलाइ सुमिङको सासक साइतानहेङ मानिघासुखेना। कालाउ साइतान एला बुङ परमेस्वरको आग्या माकिलाइको माझाता काम पाखे। 3केलाइ बुङ एखे इम्बालाइ भाइपाङ हिघानाहि, मारेम्का इच्छा कालाउ जिउको इच्छा पुरा पातेङ ताइको पापमय स्वभाबता जियाइका हिघान्हाहि। कालाउ बो द्‍याङगेलाइ भाइपाङ केलाइ बुङ परमेस्वरको चेरचुङता परिलि गोइधाङ। 4कालाउ परमेस्वर ओसारापाङ दायालु हिका हि, कालाउ केलाइहेङ हेन्जा प्रेम पाखे। 5जेलाउ केलाइ आत्माता सिका हिघान्हाहि, केलाइको ख्रिस्टको दोफाको सम्बन्धको कारन वा केलाइहेङ आनान्त जिबन निङलि योग्य बानाइहि, कालाउ परमेस्वरको आनुग्रहसो नेलाइ मुक्ति निङका हिसुन्हा। 6केलाइको येसु ख्रिस्ट दोफाको सम्बन्धको कारन परमेस्वर केलाइहेङ बुङ सिकासो सिन्चाल पाहि, कालाउ वाको दोफाङ स्वर्गता सासन पालि पिहि। 7परमेस्वर इसिका पाहि, कालाउकि लोका सोमोइता सुमिङको द्‍याङगेलाइ तिनाको कि वाको आनुग्रह हेथे माहान हि। इदोइ आनुग्रह वा केलाइको भाअ्सिङ पाका गोताङ काम पाहासो केलाइ येसु ख्रिस्ट दोफाको सम्बन्ध हिकालाइहेङ तिङपाका हि। 8हाइपालिपानु जेलाउ नेलाइ खाङधुरि पासुन्हा कालाउ परमेस्वर ताइको आनुग्रह पाहासो नेलाइको मुक्ति पाका हि, नेलाइ ताइमिङ दोङ उद्दार निङका माको, भरु इङकोते परमेस्वरको दान हि। 9या नेलाइको पाका रेम्का काम पाहासो माको, ओदोङ भाअ्सिङ नेलाइ दोफा घमन्ड पाका हिदोइ बुङ कारन मान्थु। 10हाइपालिपानु केलाइ परमेस्वरको सिरजाइन्हाका हिनाहि, कालाउ केलाइ येसु ख्रिस्ट दोफाको सम्बन्ध हिकालाइ नावा द्‍याङको रुपता एल्का काम पालिको भाअ्सिङ सिरजाइन्हाका हि। केलाइ इङको आसल कामगेलाइ पाइने दोअ्तेङ वा लाम्फा दोङ तियार पाका हिघाहि।

ख्रिस्टता झाराङ एमि दोङ

11ओदोङ भाअ्सिङ नेलाइ फोम पासु, नेलाइ गैर-यहुदि जेङतेङ जोलोम नाङ, यहुदिगेलाइ नेलाइको खाताना पाका मान्थु दोअ्तेङ खुजालाइखे, कालाउ इम्बालाइको खाताना जेङका कारन इम्बालाइ दोअ्खे कि केलाइते परमेस्वरको द्‍याङगेलाइ हिनाहि। कालाउ इङकोते जिउको खिनिङ खाताना हि हृदयको माको। 12नेलाइ परमेस्वर दोङ यहुदि द्‍याङगेलाइहेङ प्रतिग्या पाका काथाता बुङ सहभागि माजेङसुन्हा। फोम ताअ्सु, हानिका दिनागेलाइता नेलाइ ख्रिस्टहेङ नाल्का मान्थु घासुखेना, कालाउ नेलाइ परमेस्वरको चुनिका इस्राएलको द्‍याङगेलाइको रुपता मान्थु घासुखेना। कालाउ परमेस्वर प्रतिग्या पाका बाचाता नेलाइको हिदोइ बुङ थामे मान्थुघाखे। कालाउ नेलाइ इदोइ सुमिङता आस माकोसिङको कालाउ परमेस्वर बिनाको हिघासुखेना। 13ए सोमोइता नेलाइ परमेस्वरसो दुरे हिघासुखेना, कालाउ एला नेलाइको येसु ख्रिस्ट दोफाको सम्बन्धको कारन ख्रिस्टको हिति पाहासो नेलाइहेङ परमेस्वर ताइको भेरपाङ चुमाका हि।

14हाइपालिपानु ख्रिस्ट ताइमि दोङ केलाइको माझाता सान्ति चुमाका हि। हानिका सोमोइगेलाइता एनोङ बेरेमहोइ यहुदि कालाउ गैर-यहुदिगेलाइहेङ खेङन्हाका भाइका हिघाहि। कालाउ इम्बालाइ एमिसो-भेनेङहेङ मन्दा माताघाखे। कालाउ एला ख्रिस्ट इङको बेरेमहेङ उन्धि पापिहि कालाउ न्हेनोङ समुहहेङ एनोङ दोङ समुह बानाइका हि। 15वाको सिकासो, वा मोसाको व्यवस्थाता हिका गोताङ आग्यागेलाइ कालाउ नियमगेलाइ मोअ्पाहि। कालाउकि वा यहुदि कालाउ गैर-यहुदिगेलाइको माझाता सान्ति चुमालि द्वाको कालाउ एनोङ नावा समुह बानाइलि द्वाको। 16क्रुसता वाको सिका पाहासो ख्रिस्ट इङको न्हेनोङ समुहहेङ एनोङ दोङ बानाइहि कालाउ परमेस्वर दोफा मिलि पापिहि, कालाउ एसापा यहुदि कालाउ गैर-यहुदिगेलाइको माझाको सतुरुता मेतिन्हाहि। 17ख्रिस्ट लोहि, कालाउ नाअ् गैर-यहुदिगेलाइ जाइ परमेस्वरसो दुरे हिघाहि, कालाउ यहुदिगेलाइ जाइ परमेस्वरको भेरपा हिघाहि, न्हेमिहेङ दोङ मिलिलिको भाअ्सिङ सुसमाचारको प्राचार हिङपाहि। 18हाइपालिपानु ख्रिस्टको कारनहोइ केलाइ गोताङ द्‍याङगेलाइ ओदोङ पबित्तरो आत्मासो आबाकोता हानिलि द्वाङ।

19ओदोङ भाअ्सिङ नाअ् गैर-यहुदिगेलाइ एला नेलाइ परदेसि कालाउ प्रबासि माको, भरु परमेस्वरको पबित्तरो जनगेलाइ दोफाङ परमेस्वरको सदस्यगेलाइ जेङका हिसुना। 20नेलाइ बुङ छाल्न्हाका चात्यागेलाइ कालाउ परमेस्वरको बक्तागेलाइ योम्पाका जगता बानाइका साअ् भाइका हिसुन्हा। कालाउ जगको मुलि उन्ठुइ चाहि येसु ख्रिस्ट ताइमिङ हि। 21एन्साङ पातेङ वा ताइको गोताङ द्‍याङगेलाइहेङ प्रभुको पबित्तरो मुन्दिर जेङलि ए-दोफाङ तेअ्पाका हि। 22कालाउ नेलाइको ख्रिस्ट दोफाको सम्बन्धको कारन, नाअ् गैर-यहुदि खान्धुराइगेलाइ बुङ परमेस्वरको आरु द्‍याङगेलाइ दोफा गासिका हिसुना। कालाउकि नेलाइ इङको साअ् जेङलि दोसु, जेता परमेस्वर पबित्तरो आत्माको सरबुङ पाहासो बासा हिखे।

Currently Selected:

एफिसि 2: DHINT

Highlight

Copy

Compare