कलस्सि 1

धन्यबादको प्रार्थाना

1परमेस्वरको साल्न्हाका द्‍याङ जेङलि चुनिका का पावल, इदोइ पात्तारा लेखेदोङखा, का येसु ख्रिस्टको छाल्न्हाका चात्या दोङ हिघा। का कालाउ केलाइको खान्धुराइ ओने तिमोथिसो झाराङहेङ सेउपाखा। 2ख्रिस्टता हिका कलस्सि सहरको परमेस्वरको जनगेलाइ कालाउ खाङधुरि योग्य ओनेगेलाइ केलाइको आबा परमेस्वर दोङ नेलाइहेङ आनुग्रह कालाउ सान्ति प्याको।

3जेलाउ केलाइ नेलाइको भाअ्सिङ प्रार्थाना पानाखे, परमेस्वर जाइ केलाइको प्रभु येसु ख्रिस्टको आबा हि, वासेहेङ दिनाङ धन्यबाद पिनाखे। 4हाइपालिपानु ख्रिस्ट येसुता नेलाइको खाङधुरि कालाउ परमेस्वरको जनगेलाइको भाअ्सिङ नेलाइको प्रेमको काथा केलाइ हिङका हिनाहि। 5नेलाइ इङको पासुखेना हाइपालिपानु नेलाइको आस स्वर्गता ताअ्का काथाता हि। जेदोङको येसु ख्रिस्टको सत्ये सन्देसको बिसोइता नेलाइ लाम्फाङ सुसमाचार हिङका हिसुना। 6इङको सुसमाचार नेलाइकोता लोका हि कालाउ गोताङ सुमिङता फाइलाइका हि कालाउ हेन्जा द्‍याङगेलाइ खान्धुराइ जेङका हि, कालाउ इम्बालाइको जिबन बद्लिका हि। जेसाङ इदोइहोइ नेलाइको जिबन बदलिहि, जेलाउ नेलाइ लाङ पोल्ति नेलाइ सन्‍देस हिङका हिघासुन्हा। कालाउ इदोइ सत्ये बुझेका हिसुन्हा, कि परमेस्वर ताइको आनुग्रह पाहासो ख्रिस्टता खाङधुरि पाकालाइको पाप स्यामा पापिखे। 7जेदोङ काथा नेलाइ केलाइको आनाउ दोफाङको सानाइति बान्धाइति इपाफ्राससो धिर्का हिसुन्हा। वा केलाइको सङकटता ख्रिस्टता खाङधुरि योग्य सेवक हि। 8इपाफ्रास केलाइहेङ आरु द्‍याङगेलाइको भाअ्सिङ नेलाइको प्रेमको बारेता दोअ्का हि, जाइ नेलाइहेङ पबित्तरो आत्माहोइ पिका हि।

9नेलाइको बारेता इदोइ गोताङ काथागेलाइ केलाइ हिङका दिनासोङ, केलाइ नेलाइको भाअ्सिङ लागातार प्रार्थाना पातेङ हिनाहि। कालाउकि परमेस्वर नेलाइहेङ बुझिका ग्यान प्याको कालाउ नेलाइ वाको इच्छाहेङ पुरा रुपहोइ बुझिलि दोसु, वा नेलाइहेङ आत्मिक ग्यानता बुद्दिमानि बानाइयाको। 10केलाइ प्रार्थाना पानाखे, कालाउकि नेलाइ प्रभुहेङ आदार पिका कालाउ हाउसाइपाका जिबन जियाइलि दोसु, कालाउ नेलाइ लागातार आसल कामगेलाइ पासु, आरुको भाअ्सिङ भलाइ पालि दोसु। कालाउकि नेलाइ परमेस्वरहेङ आझाइ रेम्फासो गिलि दोसु। 11का प्रार्थाना पाखा, कि नेलाइहेङ परमेस्वर ताइको माहान सरबुङ प्रयोग पातेङ हेन्जा बल्लियाका बानाइका हि। कालाउकि नेलाइ धर्य पासु कालाउ आनान्द दोफाङ ताइको गोताङ कस्टगेलाइ सहिलि दोसु। 12नाअ् आबा परमेस्वरहेङ धन्यबाद पि, जाइ नासेहेङ परमेस्वरको जनगेलाइहेङ निङका काथा नेलाइहेङ बुङ निङलि योग्य बानाइका हि, जाइ चाहि परमेस्वर स्वर्गता तियार पाका हि। 13खान्धुराइ ओनेगेलाइ, नेलाइ रेम्का काम पालि मामाइसु। हाइपालिपानु वा केलाइहेङ साइतानको सरबुङसो लाअ्पाका हि, कालाउ ताइको मायारु चानको सासनता चुमाका हि। 14वा केलाइहेङ लाअ्पाका हि, कालाउ वा केलाइको पापगेलाइ स्यामा पापिका हि।

ख्रिस्ट झाराङ खान्तेङ माहान

15परमेस्वरहेङ हासु बुङ तिङलि मादोखे, कालाउ वाको चान द्‍याङ जेङतेङ लोहि वा परमेस्वरहेङ द्‍याङगेलाइको माझाता देखाल पापिहि। कालाउ वाको दोफा परमेस्वर सिरजाइ पाका गोताङ आमेने ह्रुता सर्बच्चा खाबारा हि। 16हाइपालिपानु परमेस्वर ख्रिस्ट पाहासो दोङ गोताङ आमेने सिरजाइहि, स्वर्ग कालाउ प्रिथिबिको आमेनेगेलाइ, तिङलि दोका कालाउ तिङलि मादोका आमेनेगेलाइ, सिङहासनगेलाइ कालाउ सरबुङगेलाइ, सासकगेलाइ कालाउ खाबारागेलाइ, इदोङ गोताङ आमेनेगेलाइ परमेस्वर ख्रिस्ट पाहा कालाउ वाकोङ भाअ्सिङ दोङ बानाइका हि। 17गोताङ आमेनेगेलाइ सिरजाइलि खान्तेङ लाम्फा दोङ ख्रिस्ट हिघाहि। कालाउ वा दोङ गोताङ आमेनेहोइ ए दोफाङ काम पालि बानाइखे। 18येसु ख्रिस्ट मन्डलिको आगुवाइ पाखे जेसाङ द्‍याङको पुरिङहोइ ताइको जिउ काबुता पाखे। कालाउ वाआङ लाम्फाङ हिघाहि जाइ सिकासो सिन्चाल्का मध्ये जेठा हिघाहि, कालाउकि वाआङ दोङ गोताङ काथा ह्रुता सर्बच्चा ह्याको। 19हाइपालिपानु आबा परमेस्वर योजाना बानाइहि कि वाको गोताङ बानि ख्रिस्टता ह्याको। 20परमेस्वर ताइको चानहेङ दिङगिल्लि निर्नय पाहि, कालाउ वा ताइको हिति होपाहि कालाउ क्रुस्टता सिहि। परमेस्वर ताइमिङता कालाउ गोताङ आनेमानेगेलाइको माझाता मिलि पालि या काम पाहि। एसापा वा ताइमिङता कालाउ स्वर्ग कालाउ प्रिथिबिता हिका गोताङ आनेमानेको माझाता मिलिसुका चुमाहि।

21हानिका सोमोइता दुस्ट काम पातेङ नेलाइ परमेस्वरसो दुरे जेङसुन्हा कालाउ ताइको मनता बिरोधि जेङका हिघासुखेना। 22कालाउ ताइकोङ आगाता नेलाइहेङ पबित्तरो, खात्ति, कालाउ निरदुसि तिङपालि ख्रिस्ट परमेस्वरको चान द्‍याङ जेङहि कालाउ क्रुस्टता सिहि। वाको सिकासो परमेस्वर नेलाइहेङ एला मिलिसुका चुमाका हि। 23जेसापा नेलाइ ताइको खाङधुरिता दिगो कालाउ बल्लियाका जेङतेङ कालाउ नेलाइ हिङका सुसमाचारको आस माअ्लासुन्हा पानु, इदोइ दोङ इङको सुसमाचार हि, जाइ सुमिङता गोताङ द्‍याङगेलाइहेङ प्राचार पाका हि। कालाउ जाइको का पावल सुसमाचार प्राचार पालि सेवक जेङघा।

मन्डलिता पावलको काम

24हाइपालिपानु का नेलाइहेङ सुसामाचारगेलाइ प्राचार पाकानाङ, एला का नेलाइको भाअ्सिङ कस्ट भोगिदोङखा, कालाउ ख्रिस्टको तर्फसो का ताइकोङ खुसिहोइ इदोइ कस्टगेलाइ भोगिदोङखा, कालाउकि वाको द्‍याङगेलाइहेङ साघाइलि द्वाको जेदोङ वाको जिउ मन्डलि दोङ हि। 25परमेस्वर कासेहेङ ताइको मन्डलिको सेवा पालि जिम्माबारि सुम्पिका हि, कालाउकि का परमेस्वरको सन्‍देस पुरा रितिहोइ गैर-यहुदिगेलाइहेङ प्राचार पालि द्वाको। 26इदोइ रहस्यको काथा गोताङ द्‍याङगेलाइ जाइ हेन्जाङ लाम्फा हिघाहि कालाउ इम्बालाइसो म्होन्हाका हिघाहि कालाउ एला परमेस्वरको जनहेङ इदोइ काथा देखाल जेङका हि। 27परमेस्वर ताइको द्‍याङगेलाइहेङ इदोइ सम्पति कालाउ महिमामय रहस्यको काथा बाताइलि निर्नय पाहि, जेदोङ वाको दोफा सुमिङको गोताङ द्‍याङगेलाइको भाअ्सिङ हि। कालाउ या रहस्य ख्रिस्ट ताइमिङ हि, वा नेलाइ दोफा हि। जाइ महिमाको भाअ्सिङ केलाइको एमि खिनिङ आस हि। 28केलाइ गोताङ द्‍याङगेलाइहेङ ख्रिस्टको बारेता हिङपान्हाखे, झाराङ द्‍याङहेङ चेताउनि कालाउ सारा बुद्दिहोइ धिरपाहान्खे जेदोङ परमेस्वर केलाइहेङ पिका हि। कालाउकि केलाइ निसित जेङलि द्वाको कि झाराङ द्‍याङ ख्रिस्टता परिपक्का जेनावा जेलाउ इम्बालाइ परमेस्वरको आगाता जाअ्तावा। 29ओदोङ भाअ्सिङ का थाङका परिस्रोम पाखा, इङको चाहि ख्रिस्टको पिका का लिता पाका बार्का सरबुङ आन्सार का पाखा।

Currently Selected:

कलस्सि 1: DHINT

Highlight

Copy

Compare