साल्न्हाका चात्या 28
28
पावल माल्टाता
1जेलाउ केलाइ रेम्फाङ जाहाजसो काम्भेता खुअ्नाहि, कालाउ केलाइहेङ थाहा जेङहि, कि इङको टापुको मिङ माल्टा हिघाहि। 2इन्ताको द्याङगेलाइ केलाइहेङ रेम्फासो सामाराइहि। हाइपालिपानु इन्ता वाइ लोतेङ चुङनाङ इम्बालाइ मे धोपिहि, कालाउ केलाइ झाराङहेङ स्वागत पाहि। 3पावल ए बोझा मिसिङ जाराइतेङ मेता जुहि। मे धाङकानाङ एनोङ बिस हिका पुय्याँ बाहार लोहि कालाउ पावलको खुरता लुन्धाइन्हाहि। 4इन्ता योम्कालाइ पावलको खुरता पुय्याँ तोइनातेङ हिका तिङतेङ इम्बालाइ ता-ताइमि दोअ्लि तेङहि, इदोइ द्याङते हासुहेङ सेअ्का हिलि गोयाङ। वा समुन्द्रसो बान्चितेङ ते ओल्लेहि, कालाउ केलाइको “देबि न्याय” वासेहेङ बान्चिलि पिका मान्थु। 5कालाउ पावल खुर हेङगालाइतेङ पुय्याँहेङ मेता ह्वापिहि, “कालाउ पावलहेङ हाइ दोङ हान्ति माजेङहि।” 6उङको द्याङगेलाइ सोचिहि, कि पावल एला इमावा, माकुनु एधामासिङ लोङतेङ स्यावा दोअ्तेङ निकोङ बेर थेकापा पावलहेङ खाङतेङ हि। कालाउ स्यावा दोअ्तेङ ह्रुम्तेङ हिका द्याङगेलाइ पावलहेङ हाइ दोङ माजेङका तिङतेङ इम्बालाइ ताइको बिचार बदलेतेङ दोअ्लि तेङहि, “वाते देउता कि हिघाहि।”
7इङको टापुता पब्लियस मिङ हिका एमि प्रमुख द्याङ हिघाहि वाको मिलिङगेलाइ इङको थामेको भेरपा हिघाहि। वा केलाइहेङ वाको साअ्ता लोलि दोअ्तेङ काइहि, कालाउ वा केलाइ दोफा रेम्का ब्यभाहार पाहि, केलाइ वाको साअ्ता सुम दिना थेकापा बासा हिनाहि। 8पब्लियसको आबाहेङ मिसा लोका कालाउ लिसि राइनाङ मासाधिका हिघाहि। कालाउ पावल वासेहेङ खाङलि साअ् लिता हानिहि कालाउ वाको भाअ्सिङ प्रार्थाना पाहि, कालाउ ताइको खुर वाको ह्रुता ताअ्तेङ वा एल्पाहि। 9इसिका घाटाना थाहा गितेङ इङको टापुको गोताङ मासाधिकागेलाइ पावलकोता लोहि। कालाउ पावल इम्बालाइहेङ बुङ एल्पा पिहि। 10इङको टापुको द्याङगेलाइ केलाइहेङ हेन्जाङ साम्मान पाहि, कालाउ केलाइ इन्ता सुम माइना थेकापा हिनाहि। कालाउ न्हुसो केलाइ जाहाजता धोल्न्हाहि कालाउ इम्बालाइ केलाइहेङ गोइका झोको आमेनेगेलाइ बुङ जाहाजता ताअ्पिहि।
पावल रोमता
11सुम माइना न्हुसो केलाइ आलेकजेन्द्रिया सहरसो लोका जाहाजता धोल्नाहि। इङको जाहाज चुङकाता इदोङ टापुता हिघाहि। कालाउ इदोइ जाहाजको आगाभारि जाउथ्या दिरगेलाइको चित्तरो खोपाइका हिघाहि। 12केलाइ सिराक्युस सहरता थुकान्हाहि, कालाउ इन्ता केलाइ सुम दिना थेकापा हिनाहि। 13इन्तासो केलाइ रेगियास सहरता थुकालि लोन्हाहि। एनि न्हुसो माहेसो भेरमा दलाइलि तेङहि, कालाउ केलाइ न्हु दिना पतिओलि सहरता थुकालि लोन्हाहि। 14इन्ता केलाइ आधिमि खान्धुराइ ओनेगेलाइहेङ दुसुन्हाहि, इम्बालाइ केलाइहेङ इन्ता ए आथार थेकापा हिलि दोअ्तेङ सेउपाहि। कालाउ न्हुसो केलाइ रोम सहर भारि हानिका दामा हानिन्हाहि। 15रोम सहरको आधिमि खान्धुराइगेलाइ केलाइ लोदोङनाखे दोअ्का हिङहि, कालाउ इम्बालाइ केलाइहेङ भेतिलि कालाउ रोम सहरता चुम्पुलि आप्पियसको हाते कालाउ सुम पाति दोअ्का थामेता लोहि। जेलाउ पावल इम्बालाइहेङ तिङहि, वा परमेस्वरहेङ धन्यबाद पिहि कालाउ वा साहास निङहि।
16जेलाउ केलाइ रोम सहरता थुकान्हाहि, कालाउ पावलहेङ एमि सिपाइको खाङसुलि ताइकोङ देरा ह्रुतेङ हिलि आनुमति मिलिहि।
रोमता पावलको प्राचार
17सुम्नि न्हुसो पावल यहुदिगेलाइको आगुवागेलाइहेङ काइलि दिङगिल्हि, जेलाउ इम्बालाइ जोम्हि कालाउ पावल दोअ्हि, “काङको ओनेगेलाइ, का ताइको सारभिको द्याङगेलाइ माकुनु पुर्खागेलाइको मुन्धुमको बिरोधता हाइ दोङ काम पाका मान्थुघा। कालाउ बुङ कासेहेङ यरुसेलेम सहरसो रिम्तेङ रोमि सारकारको खुरता सुम्पि पिका हि। 18रोमिगेलाइ कासेहेङ हेन्जाङ प्रस्नगेलाइ पाहि, कालाउ बुङ इम्बालाइ कासेहेङ सेअ्का दन्ड पिका कारन हिदोइ बुङ मानिङहि। कालाउ इम्बालाइ कासेहेङ लाअ्पिलि खाङहि। 19कालाउ यहुदि आगुवागेलाइ बिरोध पाकानाङ रोमि साम्रातहेङ आनुरोध पालि कासेहेङ कर लागिहि। कालाउ का काङको ताइको द्याङगेलाइको बिरोधता दुसिलि गोइका हाइ दोङ काथा मान्थु। 20ओदोङ भाअ्सिङ नेलाइ दोफा भेतिलि कालाउ काथा पालि नेलाइहेङ इता काइका हिघा। का एसापा झिन्झिरिहोइ जिङन्हाका हिघा, हाइपालिपानु इस्राएलगेलाइको आस माकुनु ख्रिस्ट लाम्फाङ दोङ लोलि दोका हि दोतेङ का खाङधुरि पाखा।”
21यहुदि आगुवागेलाइ पावलहेङ दोअ्हि, “केलाइ नाङको बिसोइता यहुदिया जिल्लाता हिका द्याङगेलाइसो हिदोइ बुङ पात्तारागेलाइ निङका मान्थुन्हाहि। कालाउ ना ते हासु बुङ खान्धुराइगेलाइ लोतेङ नाङको बिरोधता हिदोइ बुङ मारेम्का काथा दोअ्का माकुनु हिङपाका हि। 22कालाउ केलाइ नाङको बिचारगेलाइ हिङलि भोअ्नाखे। हाइपालिपानु केलाइहेङ थाहा हि कि इदोङ प्रभुको दामाको बिरोधता द्याङगेलाइ द्यापाहाङ मारेम्का खिनिङ दोअ्तेङ हि।”
23उङको यहुदिगेलाइ पावलको भाअ्सिङ एनोङ दिना साल्हि, इङको दिना हेन्जा द्याङगेलाइ पावलहेङ देराता भेतिहि। कालाउ पावल इम्बालाइहेङ ह्रिमासो बेलापा थेकापा परमेस्वरको सासनको बिसोइता कालाउ मोसाको व्यवस्था कालाउ परमेस्वरको बक्तागेलाइ लेखेका कितापगेलाइसो बुझि पाहि। कालाउ इम्बालाइहेङ येसुको खाङधुरिता चुमालि कोसिस पाहि। 24हेथेते पावलको काथागेलाइता खाङधुरि पाहि, कालाउ हेथेते मापाहि। 25इम्बालाइ ता-ताइमिता सहमति माजेङहि कालाउ पावल या आम्तिम काथा दोअ्तेङ इम्बालाइहेङ बिदा पिहि, “पबित्तरो आत्मा यासाइया परमेस्वरको बक्ताको माध्यामसो नाङको पुर्खागेलाइहेङ दोअ्का काथा सत्ये हिघाहि:
26उङको द्याङगेलाइ हिका भारि हाने,
कालाउ इम्बालाइहेङ दोअ्,
हिङनुते नेलाइ हिङसुखेना,
कालाउ बुङ नेलाइ मागिसुखेना,
खाङनुते खाङसुखेना कालाउ बुङ मातिङसुखेना।
27हाइपालिपानु इदोइ द्याङगेलाइको हृदय थाङका जेङका हि,
कालाउ इम्बालाइको न्हातोङगेलाइ बैरा जेङका हि,
कालाउ इम्बालाइ ताइको मिसियाँ चिम्का हि, माकुनुते
इम्बालाइ मिसियाँहोइ तिङधावा, कालाउ न्हातोङहोइ हिङधावा, ह्रदयहोइ बुझिधावा
कालाउ का भारि घुरिधावा
कालाउ का इम्बालाइहेङ एल्पाधाङका।”
28ओदोङ भाअ्सिङ का चाहिखा कि नेलाइहेङ थाहा जेनाको, कि परमेस्वरको मुक्तिको सुसमाचार गैर-यहुदिगेलाइको भाअ्सिङ पिगिल्का हि, कालाउ इम्बालाइ सुइकार पावा। 29कालाउ पावल इदोइ काथा दोअ्लि दोअ्तेङ, यहुदिगेलाइ ता-ताइमिता हेन्जा काथा पोसु काताङ बिदा जेङहि।
30पावल न्हुसो पुरा न्हे बासार थेकापा इन्ता ताइकोङ भाराको साअ्ता हि, वा झाराङ द्याङगेलाइहेङ स्वागत पाहि, जाइ वासेहेङ भेतिलि लोहि। 31पावल साहासि जेङतेङ बिना रोकतोक परमेस्वरको सासनको बिसोइता प्राचार पाघाहि, कालाउ प्रभु येसु ख्रिस्टको बिसोइता सिक्स्या पिघाहि।
Currently Selected:
साल्न्हाका चात्या 28: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
