साल्न्हाका चात्या 26
26
1कालाउ राजा आग्रिप्पा पावलहेङ दोअ्हि, “नासेहेङ ताइको बिसोइता नुइ धुइलि आनुमति हि।” कालाउ पावल ताइको खुरको इसाराहोइ ताइमिहेङ बान्चिपालिको भाअ्सिङ एसापा दोअ्तेङ नुइ धुइलि तेङहि: 2“ओइ राजा आग्रिप्पा, यहुदिगेलाइ जेदोङ काथाहोइ कासेहेङ दुसिखे, नानि नाङको आगाता ओदोङ काथागेलाइको उत्तारा पिलि निङकाता का ताइमिहेङ भाग्यसालि थानिखा।” 3का ताइमिहेङ भाग्यसालि सम्झिखा, हाइपालिपानु नासेहेङ यहुदिगेलाइको गोताङ मुन्धुमगेलाइ कालाउ काथा पोसुका थाहा हि। ओदोङ भाअ्सिङ का बिन्ति पाखा, काङको बयान ह्रुम्तेङसाङ हिङपि।
4ताइको द्याङगेलाइको माझाता कालाउ यरुसेलेम सहरता जामालसोङ काङको जिबन सैलि यहुदिगेलाइहेङ थाहा हि। 5इम्बालाइ कासेहेङ जामाल आबास्थासोङ नाल्खे, कालाउ जेसापा इम्बालाइ मन पाहे पानु इङको काथाको साक्सि पिलि द्वावा, कि का केलाइको धर्मको झाराङ खान्तेङ कट्टर समुहको फारिसि जेङतेङ जिबन बिति पाघाखा। 6कालाउ परमेस्वर केलाइको पुर्खागेलाइहेङ पाका प्रतिग्याता भोरोसा ताअ्नाङ नानि का इदोइ मुद्दाता जाअ्का हिघा। 7इदोइ प्रतिग्या निङलिको आसता केलाइको तेन्हे कुलगेलाइ लागातार न्हिसिन-नितिम परमेस्वरको आराधाना पाखे। ओइ राजा, का बुङ परमेस्वरको प्रतिग्या पाका काथा पुरा पाङ दोअ्का ओदोङ आस ताअ्नाङ उङको यहुदिगेलाइ कासेहेङ दुसिका हि। 8कालाउ पावल इन्ता जोम्तेङ हिका गोताङ यहुदिगेलाइहेङ दोअ्हि, “नेलाइ खाङधुरि पास्वाना, कि परमेस्वर सिकालाइहेङ आरोङ सिन्चाल पालि दोअ्खे, परमेस्वर येसुहेङ सिकासो सिन्चाल पाहि दोअ्तेङ हाइ पालि नेलाइ खाङधुरि मापा सुखेना?”
9कासेहेङ बुङ खाङधुरि हिघाहि, कि नासरत देराको येसुको बिरोधता हेन्जाङ काथागेलाइ का पालि गोयाङ। 10कालाउ का यरुसेलेम सहरता इन्सिकाङ पाघा, कालाउ मुलि पुजारिगेलाइसो खाबारा निङतेङ का हेन्जा खान्धुराइगेलाइहेङ झ्यालखानाता ह्वापाघा कालाउ इम्बालाइहेङ सेअ्लि तोम्लाउ इम्बालाइको बिरोधता का बुङ सहमत जेङघा। 11कालाउ गोताङ यहुदिगेलाइको चाउघारा साअ्गेलाइता का इम्बालाइहेङ हेन्जा पोल्ति दन्ड पितेङ येसुको बिसोइता मारेम्का काथा धुइका बानाइघाखा। का इम्बालाइको बिरोधता ओथे हेन्जा रिसाहा हिघाखा, कि का आरु सहरगेलाइता बुङ हानितेङ इम्बालाइहेङ साताइघा।
12एसापा दोङ एनि मुलि पुजारिगेलाइसो खाबारा कालाउ आग्या पात्तारा निङतेङ का दमस्कस सहर हानिदोङघाखा। 13ओइ राजा इङको दिना नितिमा का दमस्कस सहर हानिकाताङ पालाउ दामाता का एनोङ फाइसालामका आकाससो लोतेङ हिका तिङघा, इङको जोल्का थाअ्साइका का कालाउ का दोफा हानेका द्याङगेलाइको कोरपाहाङ चिल्कातेङ हिघाहि। 14जेलाउ केलाइ झाराङ भोनोइता थोबिन्हाका हिघान्हाहि, कालाउ का हिब्रु भासाता एसा दोअ्का गाला हिङघा, साउल, साउल, नाअ् हाइ पालि कासेहेङ साताइखेना? एनोङ पिया ताइको ग्रिहिको मेसाहेङ लाअ्थिका भाइपा नाअ् काङको बिरोधता फेसुतेङ ताइमिहेङ चोट पातेङ हिना।
15कालाउ का दोअ्घा, “हे प्रभु, नाअ् हासु हिना? प्रभु कासेहेङ दोअ्हि, का येसु हिघा, जाइहेङ नाअ् साताइतेङ हिना।” 16एला ल्हो कालाउ ताइको खोकोइता जाअ्, हाइपालिपानु का नासेहेङ काङको सेवक चुनिका हिघा, नाअ् काङको बिसोइता जेदोङ तिङन्हा कालाउ न्हुसो जेदोङ काथा का नासेहेङ तिङपाङका इङको गोताङ काथागेलाइको बारेता नेलाइ साक्सि पिलि गोइस्वाना। 17का नाङको ताइकोङ द्याङगेलाइसो कालाउ गैर-यहुदिगेलाइसो जोगाइतेङ ताअ्ताङका जाइकोता का नासेहेङ दिङगिल्खा। 18कि नाअ् द्याङगेलाइहेङ सत्ये तिङपाना, कालाउकि इम्बालाइ कितिकितिकासो फाइसालामकाता कालाउ साइतानको सरबुङसो परमेस्वर भारि घुरियाको। कालाउ परमेस्वर इम्बालाइको पापगेलाइ स्यामा पापियाङ कालाउ इम्बालाइ कासेहेङ खाङधुरि पानाङ पबित्तरो हिकालाइको थामे इम्बालाइ बुङ निनावा।
19“ओदोङ भाअ्सिङ ओइ राजा आग्रिप्पा, स्वर्गसो निङका दर्सन प्रति का आग्याकारि जेङघा। 20कालाउ लाम्फा दमस्कस सहरता, कालाउ यरुसेलेम सहरता कालाउ गोताङ यहुदिया जिल्लाता हिकालाइहेङ कालाउ गैर-यहुदिगेलाइहेङ बुङ पाप पालि लाअ्सु कालाउ परमेस्वर भारि घुरिसु दोअ्तेङ का प्राचार पाघा। कालाउ वाको योग्यको काम ताइको ब्यभारसो बुङ तिङपासु दोअ्तेङ धिरपाघा। 21ओदोङ भाअ्सिङ यहुदिगेलाइ कासेहेङ मुन्दिरता रिम्तेङ सेअ्लि भोहि। 22कालाउ एला थेकापा बुङ का परमेस्वरसो साघाइ निङतेङ हिघा। ओदोङ भाअ्सिङ म्हुइकासो-बार्का झाराङको आगाता जाअ्तेङ साक्सि पिदोङखा। परमेस्वरको बक्तागेलाइ कालाउ मोसाको धुइका बचन आबस्य बुङ पुरा जेनावा दोअ्का काथा बाहेक का आरु हाइ दोङ दोअ्का मान्थुघा। 23इम्बालाइ दोअ्हि कि ख्रिस्ट दुख ल्होपातेङ सिलि गोयाङ कालाउ सिकासो सिन्हुकागेलाइ मध्ये वा दोङ झाराङ खान्तेङ लाङति जेनावा। कालाउ वा यहुदिलाइहेङ कालाउ गैर-यहुदिगेलाइहेङ परमेस्वरको सन्देस घोसाना पावा जेदोङ फाइसालामका भाइका जेनावा।”
24पावल ताइमिङहेङ बान्चिपालिको भाअ्सिङ इङको काथागेलाइ दोअ्काताङ पालाउ फेस्तस हाकिम ह्रिकाइतेङ दोअ्हि, “नाअ् पागाला जेङका हिना। नाङको हेन्जा पढाइहोइ नासेहेङ पागाला बानाइहि।”
25कालाउ पावल दोअ्हि, “मानेनिय फेस्तस हाकिम, का पागाला माको, कालाउ का सत्ये कालाउ बुद्दिको काथागेलाइ पाखा। 26राजा आग्रिप्पा इदोइ काथागेलाइको बिसोइता गिखे, का वासेहेङ धुक्कोहोइ दोअ्लि द्वाङका। का पाक्का हिघा कि वा इङको गोताङ काथागेलाइ गिखे, हाइपालिपानु इदोइ काथागेलाइ म्होन्हाका जेङका मान्थु। 27राजा आग्रिप्पा, हाइ नाअ् परमेस्वरको बक्तागेलाइहेङ खाङधुरि पान्हा? का गिखा, कि नाअ् खाङधुरि पाखेना।”
28राजा आग्रिप्पा पावलहेङ दोअ्हि, “हाइ नाअ् कासेहेङ आतुइसा सोमोइता ख्रिस्टियान बानाइलि द्वाना?”
29पावल जबाफ पिहि, “आतुइसा सोमोइता ह्याको माकुनु हेन्जाङ ह्याको, नाअ् खिनिङ माको कालाउ नानि काङको काथा हिङका झाराङ का भाइकाङ ख्रिस्टतियन जेनाको दोअ्तेङ परमेस्वर दोफा प्रार्थाना पाङका कालाउ कैदि कोनिङ माको।”
30कालाउ राजा आग्रिप्पा, हाकिम फेस्तस कालाउ वाको बेजान ओने बर्निकि कालाउ इम्बालाइ दोफा योम्तेङ हिका आरु द्याङगेलाइ बुङ ल्होतेङ हानिहि। 31इम्बालाइ बाहार हानिलाउ ता-ताइमिता एसा दोअ्काताङ काथा पालि तेङहि, “इदोइ द्याङहेङ सेअ्लि गोइका माकुनु झ्यालखानाता ताअ्लि गोइका हिदोइ बुङ काम पाका मान्थु।”
32राजा आग्रिप्पा फेस्तस हाकिमहेङ दोअ्हि, “जेसापा इदोइ द्याङ रोमि साम्रातहेङ वाको न्याय पालि आनुरोध मापाकानु वासेहेङ लाअ्पिलाउबुङ जेङधाङ।”
Currently Selected:
साल्न्हाका चात्या 26: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
