2 तिमोथि 4
4
सुसमाचार हिङपाका जिम्मा
1जेलाउ येसु ख्रिस्ट राजा भाइपाङ सासन पालि ल्वाङ, कालाउ वा सिन्हुका कालाउ सिकालाइको न्याय पावा। ओदोङ भाअ्सिङ परमेस्वर कालाउ ख्रिस्टको साक्सिको रुपता का नासेहेङ थाङका आदेस प्याङका। 2नाअ् जिसिकाङ आबास्थाता बुङ परमेस्वरको बचन प्राचार पालि तियार जेङ, कालाउ द्याङगेलाइ गोल्ति पालाउ इम्बालाइहेङ सम्झाइसु कालाउ आसल पालि हाउसाइ पासु। कालाउ इदोइ गोताङ काथागेलाइ धर्य पातेङ रेम्फासो धिरपा। 3हाइपालिपानु इसिका सोमोइ लोदोङखे जेलाउ द्याङगेलाइ सत्ये सिक्स्याहेङ हिङलि माकितावा, कालाउ इम्बालाइ हेन्जा धाताइका सिक्स्यकसो ताइमिहेङ मन्दा ताअ्का काथा खिनिङ हिङलि भोखे। 4इम्बालाइ सत्ये काथा माहिङखे कालाउ दन्त्य काथागेलाइ चाहि हिङलि मन्दा ताअ्खे। 5कालाउ नाअ् कस्ट भोगिलि गोइलाउ बुङ जेलाउ बुङ ताइमिहेङ नियन्तरन पालि गोइखे, कालाउ सुसमाचार प्राचार पालि थाङका मेहेनत पाअ्, कालाउ प्रभु नासेहेङ पिका गोताङ काम पुरा पाअ्।
6का नासेहेङ या आदेस पिदोङखा, हाइपालिपानु का ते भोगको रुपता आर्पन जेङलि लागिका हिघा कालाउ काङको जिबन कालाउ परमेस्वरको भाअ्सिङ काङको काम दोलि तोम्का हि, हाइपालिपानु का गिखा कि का धेमाङ सियाङका वाला। 7खाङधुरिको रेम्का धुम पासु, जेसाङ एमि आर्मि धुम पालि हार मामानिखे, का बुङ ख्रिस्टको भाअ्सिङ थाङका मेहेनत पाका हिघा। का येसु ख्रिस्टको पिका कामहेङ पुरा पाका हिघा। कालाउ आखिरि दिना थेकापा खाङधुरि योग्य जेङतेङ हिघा। 8एला प्रभु कासेहेङ एनोङ इनाम प्याङ, जेदोङ चाहि काङको आसल पाका कामको इनाम हि। ठिकसो न्याय पाका प्रभु दोङ कासेहेङ इङको इनाम प्याङ जेलाउ वा आरोङ ल्वाङ। कालाउ का खिनिङ माको, कालाउ वाको लोका दामा खाङका झाराङहेङ इङको इनाम प्याङ।
पावलको ताइकोङ काथा
9तिमोथि जेथे धेमा जेङलि दो, कासेहेङ भेतिलि लोलि कोसिस पाअ्। 10हाइपालिपानु डेमास इदोइ सुमिङको काथागेलाइहेङ मन्दा ताअ्खे कालाउ वा कासेहेङ लाअ्तेङ थेसलोनिकि सहरता हानेका हि। कालाउ खान्धुराइ ओने क्रेसेनस चाहि गलातिया इलाका हानिका हि, कालाउ तितस चाहि दालमितिया प्रदेसता हानिका हि। 11लुका खिनिङ का दोफा हि, जेलाउ नाअ् ल्वाना मर्कुसहेङ बुङ नाअ् दोफा चुम्तेङ लौउ, हाइपालिपानु वा इता कासेहेङ काङको कामता साघाइलि द्वावा। 12का तुखिकसहेङ एफिसस सहरता दिङगिल्का हिघा।
13जेलाउ नाअ् ल्वाना, का तरोआस सहरता हिलाउ इन्ता कार्पसको साअ्ता काङको लाअ्धिघा कोट चुम्तेङ लौउ। कालाउ इन्ता हिका काङको कितापगेलाइ कालाउ बिसेस पातेङ धालेको पात्तारा बुङ चुमापि।
14चिरको काम पाका आलेकज्यानडर कासेहेङ हेन्जा पोल्ति चित्ता तुपापिका हि। प्रभु वासेहेङ वाको मारेम्का काम आन्सार बद्ला ह्रुकावा। 15नाअ् बुङ उङकोसो चङख हि, हाइपालिपानु वा केलाइको येसु ख्रिस्टको सिक्स्याको बारेता घोर बिरोध पाका हि।
16लाङ पोल्ति आदालतता काङको मुद्दा चलिलाउ हासु बुङ काङको पक्स्यता माधुइहि, कालाउ झाराङ कासेहेङ लाअ्तेङ हानिहि। परमेस्वर इङको काथाको दुसिका इम्बालाइहेङ मालाग्याको, भरु का प्रार्थाना पाङका कि इम्बालाइ कासेहेङ लाअ्काता परमेस्वर इम्बालाइहेङ स्यामा प्याको। 17कालाउ प्रभु काङको दोफा हिघाखे, कालाउ वा दोङ कासेहेङ सरबुङ पिहि, कालाउकि का गोताङ गैर-यहुदिगेलाइहेङ जाइ इन्ता जोम्का हिघाहि, इम्बालाइहेङ येसु ख्रिस्टको सुसमाचार प्राचार पालि द्वाको कालाउ इम्बालाइ झाराङ हिनाको। कालाउ वा कासेहेङ सिकासो बन्चिपाहि, जेसाङ म्हितुका खुवाँको नुइसो हासु बान्चि पावा। 18कालाउ प्रभु कासेहेङ गोताङ खाल्को मारेम्का कामगेलाइसो जोगेपावा, कालाउ वा कासेहेङ जोगाइतेङ ताइको स्वर्गको सासनता चुम्पावा। वाको महिमा जेलाउलाउ बुङ ज्याको। आमेन।
19प्रिस्किला कालाउ वाको के आकिलास कालाउ ओन्सिफरसको गोताङ जाहानगेलाइहेङ काङको सेउपाखा हि दोअ्पि। 20इरासतस कोरिन्थि सहरताङ हि, कालाउ का तोरोफिमसहेङ मिलेटस सहरता लाअ्तेङ लोघा, हाइपालिपानु वा मासाधेका हिघाहि। 21चुङदिनको सोमोइ खाङतेङ लाम्फा दोङ काङकोता लोलि सकभर कोसिस पाअ्। युबलस, पुदेनस, लिनस, क्लोडिया कालाउ इता हिका झाराङ खान्धुराइ ओनेगेलाइ नासेहेङ सेउपाखा पिगिल्का हि।
22का प्रार्थाना पाङका कि प्रभु नाङको दोफा ह्याको कालाउ वाको आनुग्रह बुङ नाङको दोफा ह्याको।
Currently Selected:
2 तिमोथि 4: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
