2 तिमोथि 1

1का पावल इदोइ पात्तारा लेखेदोङखा। परमेस्वर कासेहेङ ख्रिस्ट येसुको एमि छाल्न्हाका चात्याको रुपता चुनिहि, कालाउकि का येसु ख्रिस्टता खाङधुरिको माध्यामसो लोका आनान्त जिबन पिका प्रतिग्या परमेस्वर पाका सन्देसहेङ प्राचार पालि द्वाको। 2का इदोइ पात्तारा तिमोथिहेङ लेखेदोङखा नाअ् काङको ताइकोङ चान भाइका हिना का प्रार्थाना पाखा, कि आबा परमेस्वर कालाउ केलाइको प्रभु येसु ख्रिस्ट नासेहेङ आनुग्रह, क्रिपा कालाउ सान्ति प्याको।

धन्यबाद कालाउ हाउसाइपाका

3जेलाउ बुङ का परमेस्वर दोफा प्रार्थाना पाखा दिनाङ नासेहेङ फोम पाखा, का परमेस्वरहेङ धन्यबाद चढाइखा, जाइको सेवा काङको पुर्खागेलाइ पाका भाइपाङ का बुङ सुद्द बिबेकहोइ पाखा। 4कासेहेङ फोम हि, जेलाउ केलाइ लाअ्न्हाहि नाअ् हेसा खार्का हिघाखेना, इङको फोम होइ नासेहेङ भेतिलि काङको बार्का इच्छा हि। कालाउ भेतिलि निङनु का हेन्जा लेङचा धाङका। 5कासेहेङ नाङको येसु ख्रिस्ट ह्रुता हिका खाङधुरिको फोम हि। इङको खाङधुरि जेदोङ लाम्फा नाङको आझाइ लोइस कालाउ नाङको आमाइ युनिस्ता हिघाहि। कालाउ एला कासेहेङ निस्चित हि, कि नाङकोता बुङ इन्सिकाङ खाङधुरि हि। 6ओदोङ भाअ्सिङ का नासेहेङ परमेस्वर पिका इङको बरदानको बारेता फोम पापालि चाहिखा, जेदोङ बरदान का ताइको खुर नाङकोता ताअ्लाउ, परमेस्वर नासेहेङ पिका हिघाहि। इङको बरदानहेङ जोगाइतेङ ताअ्। 7हाइपालिपानु परमेस्वर केलाइहेङ थिका आत्मा माको, कालाउ केलाइहेङ सरबुङ, प्रेम कालाउ ताइमिहेङ काबुता ताअ्का आत्मा पिका हि।

8ओदोङ भाअ्सिङ केलाइको प्रभु येसु ख्रिस्टको बारेता द्‍याङगेलाइहेङ साक्सि पिलि मालेदेरसु। कालाउ का कैदता हिघा दोअ्तेङ बुङ मालेदेरसु, भरु परमेस्वर नेलाइहेङ पिका सरबुङ प्रयोग पालि गोइखे, कालाउ सुसमाचारको भाअ्सिङ काङको दुखता झ्वाइका जेङसु। 9परमेस्वर केलाइहेङ बान्चिपाहि कालाउ पबित्तरो जिबन जियाइलि काइहि। केलाइ रेम्का काम पाकानाङ काइका माको, भरु ताइको योजाना कालाउ आनुग्रहहोइ परमेस्वर केलाइहेङ बान्चिपाहि। जेदोङ आनुग्रह वा येसु ख्रिस्ट पाहासो सुमिङहेङ सिरजाइका खान्तेङ लाम्फा पिका हिघाहि। 10कालाउ एला परमेस्वर ताइको चान येसु ख्रिस्टहेङ दिङगिल्तेङ ताइको आनुग्रह तिङपाका हि। वा दोङ सिका सरबुङहेङ नासा पाहि कालाउ केलाइहेङ सुसमाचार पाहासो आनान्त जिबनको दामा तिङपाहि। 11इदोइ येसु ख्रिस्टको सुसमाचारको भाअ्सिङ परमेस्वर कासेहेङ प्राचार पालि कालाउ साल्न्हाका चात्या कालाउ सुसमाचारको गुरुको रुपता नियुक्ति पाहि। 12ओदोङ सुसमाचार प्राचार पालिको भाअ्सिङ का झ्यालखानाता कस्ट भोगिलि गोइतेङ हिघा। कालाउ बुङ का मालेदेरखा, हाइपालिपानु का ख्रिस्टहेङ नाल्खा जाइ ह्रुता का भोरोसा बुङ ताअ्का हिघा। कालाउ कासेहेङ इदोइ निसित हि, कि परमेस्वर कासेहेङ जिम्मा पिका काथाहेङ ख्रिस्ट ताइमिङ आरोङ घुरितेङ मालोपा धाउ इङको काथा जोगाइतेङ ताअ्ताङ।

13का नासेहेङ पिका गोताङ सत्ये सिक्स्यागेलाइ नमुना भाइपाङ जोगाइतेङ ताअ्सु। खाङधुरि कालाउ प्रेम दोफा या पासु, हाइपालिपानु नेलाइ येसु ख्रिस्ट दोफा ए जेङतेङ हिसुन्हा। 14परमेस्वर पिका सत्ये सिक्स्याहेङ जोगाइतेङ ताअ्सु, कालाउ पबित्तरो आत्मा नासेहेङ इङको सिक्स्या जोगाइतेङ ताअ्लि साघाइयाङ, जेदोङ पबित्तरो आत्मा केलाइ दोफा हिखे।

15नासेहेङ थाहा हि, कि एसिया प्रदेसता हिका हेन्जा जोसो खान्धुराइगेलाइ कासेहेङ लाअ्का हि, कालाउ इङको मध्ये फुगेलस कालाउ हर्मोगेनस हि।

16प्रभु आन्सिफरसको जाहानहेङ क्रिपा पाको दोअ्तेङ का प्रार्थाना पाखा। हाइपालिपानु ओन्सिफरस का कस्टता हिलाउ भेतिलि लोहि कालाउ हेन्जाङ खेप साघाइहि। कालाउ कासेहेङ झ्यालखानाता भेतिलि लोलि बुङ मालेदेर हि। 17जेलाउ वा रोम सहरता लोहि, कालाउ कासेहेङ मानिङपा भरि गोताङ थामेगेलाइ लागातार भोअ्तेङ हि। 18प्रभु आन्सिफोरसहेङ न्याको दिनाता माहान क्रिपा तिङपाको। नासेहेङ रेम्फा थाहा हि, कि एफिसस सहरता वा कासेहेङ हेन्जाङ प्रकारसो साघाइका हिघाहि।

Currently Selected:

2 तिमोथि 1: DHINT

Highlight

Copy

Compare