पतरुस 1
1
1का, सिमोन पतरुस नेलाइहेङ लेखेदोङखा, का येसु ख्रिस्टको सेवक कालाउ छाल्न्हाका चात्या हिघा। का नेलाइ झाराङहेङ लेखेदोङखा, जाइ केलाइ झाराङको ओदोङ झोको आनमोल खाङधुरि निङका हि, इदोइ खाङधुरि केलाइको परमेस्वर कालाउ मुक्ति दाता येसु ख्रिस्ट पाहासो केलाइहेङ पिका हि, जाइ केलाइहेङ परमेस्वर दोफा धर्मि बानाइखे।
2का प्रार्थाना पाखा कि, परमेस्वर कालाउ येसु ख्रिस्ट केलाइको प्रभुको ग्यानता, नेलाइ बाढेकाताङ हानिलाउ परमेस्वर नेलाइहेङ हेन्जा खाङतेङ हेन्जा आनुग्रह कालाउ सान्ति प्याको।
ख्रिस्टको काइका कालाउ चुनाउति
3केलाइ परमेस्वरहेङ नाल्कानाङ वा केलाइहेङ वाको दोफा हिका इङको सरबुङ पिका हि। ओदोङ भाअ्सिङ केलाइ वासेहेङ लेङचापाका जिबन जियाइलि गोइका गोताङ काथा हि। वाको ताइकोङ पुर्न कालाउ महिमा पुर्न चरित्तरोको कारन वा केलाइहेङ ताइकोङ द्याङ जेङलि छाल्का हि। 4कालाउ वाको महिमा कालाउ भलाइको कारन वा केलाइहेङ हेन्जा बार्का कालाउ आनमोल प्रतिग्यागेलाइ पिका हि, इदोइ बरदानगेलाइ प्रयोग पातेङ केलाइ इदोइ सुमिङको खाराब इच्छागेलाइसो जोगिलि द्वाङ, जाइ केलाइहेङ हान्ति पाखे, कालाउ परमेस्वरको ताइकोङ स्वभाबता झ्वाइनालि द्वाङ। 5हाइपालिपानु नेलाइ परमेस्वरको स्वभाबता झ्वाइनालि बनिका हिसुना, नेलाइ ख्रिस्टता खाङधुरि पालि खिनिङ माको, कालाउ नेलाइ बोमिको भाअ्सिङ दिनाङ आसल काम पालि कोसिस पालि गोइखे। नेलाइ आसल काम खिनिङ पालि माको, कालाउ नेलाइ बुद्दिमान तरिकाहोइ ब्यभार पाका द्याङ बुङ जेङलि गोइखे। 6नेलाइ ग्यानि जेङतेङ खिनिङ जिबन जियाइलि माको, कालाउ नेलाइ ताइमिङ सयमि जेङलि गोइखे, नेलाइ ताइमि खिनिङ सयमि जेङलि माको, कालाउ नेलाइ दुखता बुङ धर्य जेङतेङ हिलि गोइखे। नेलाइ धर्य जेङतेङ हिलि खिनिङ माको, कालाउ नेलाइ परमेस्वरहेङ लेङचापाका जिबन बुङ जियाइलि गोइखे। 7नेलाइ परमेस्वरहेङ लेङचापाका जिबन जियाइलि खिनिङ माको, कालाउ ताइकोङ जाहानको सदस्य जेसाङ नेलाइ एमिसो-भेनेङ दोफा प्रेम पालि गोइखे। कालाउ झाराङ द्याङगेलाइहेङ बुङ प्रेम पालि गोइखे। 8जेसापा नेलाइ एसापा दोङ हेन्जा खान्तेङ हेन्जा ताइको जिबन जियाइसुन्हा पानु, कालाउ नेलाइ केलाइको प्रभु येसु ख्रिस्टको भाअ्सिङ काम लागिका कालाउ फल सेपाका भाइपा जेङस्वाना। 9कालाउ जेसापा एमि द्याङ एसापा जिबन माजियाइ नु, उङको एमि रेम्फा मिसियाँ तिङलि मादोका कान्हाँ द्याङ भाइका दोङ हि। वा इङको निल्का हि, कि ख्रिस्टता खाङधुरि पालि खान्तेङ लाम्फा वाको पाका पाप परमेस्वर स्यामा पापिका हि।
10ओदोङ भाअ्सिङ खान्धुराइ ओनेगेलाइ, ताइमिहेङ कालाउ बो द्याङगेलाइहेङ इदोइ तिङपालि आझाइ आसल ब्यभार पालि कोसिस पासु कि परमेस्वर नेलाइहेङ ताइको द्याङ जेङलि साल्का कालाउ काइलि थानिका हि। जेसापा नेलाइ इन्सिका पासुखेना पानु नेलाइ पाक्का दोङ परमेस्वरसो हेलाउ बुङ माखेङन्हा स्वाना। 11कालाउ दोफाङ परमेस्वर नेलाइहेङ येसु ख्रिस्ट हिका राइजिता भब्य स्वागत पाङ, जाइ केलाइको प्रभु कालाउ मुक्ति दाता हिका हि, वा इन्ता जेलाउलाउको भाअ्सिङ राजा जेङतेङ राइजि पाङ।
धर्मसास्तरको आगमबानि
12लाम्फा दोङ नेलाइहेङ इदोइ काथागेलाइ थाहा जेङकाङ हि, कालाउ द्याङगेलाइ नेलाइहेङ धिर्पाका सत्ये सिक्स्याता बल्लियाका जेङका हिसुना, का इङको काथागेलाइको बारेता जेलाउ बुङ फोम पाअ् पाङका। 13कासेहेङ थाहा हि कि का मासिपा धाउ नेलाइ दोफा प्राय इङको काथागेलाइको बारेता दोअ्तेङ हिलि उचित हि, कालाउकि नेलाइ इङको काथागेलाइ मानिल्सु। 14हाइपालिपानु का गिखा कि का धेमाङ स्याङका, हाइपालिपानु केलाइको प्रभु येसु ख्रिस्ट कासेहेङ झालाफालापा इङको तिङपा पिका हि। 15ओदोङ भाअसिङ का नेलाइहेङ इदोइ काथागेलाइ एला लेखेतेङ थाङका मेहेनत पादोङखा, कालाउकि का सितेङ नेलाइ इदोइ काथागेलाइ जेलाउ बुङ फोम पालि दोसु।
16जेलाउ केलाइ छाल्का चात्यागेलाइ नेलाइहेङ केलाइको प्रभु येसु ख्रिस्टको सरबुङ कालाउ आगामनको बारेता दोअ्का हिघानाहि, जेलाउ चङख जेङतेङ केलाइ नेलाइहेङ बानाइका दन्त्य काथागेलाइ दोअ्का मान्थु घानाहि। भरु केलाइ ताइमिङ ख्रिस्टको बार्का महिमा तिङका हिनाहि।
ख्रिस्टको महिमाको साक्सि
17-18केलाइ वाको दोफा पबित्तरो लाखता हिघान्हाहि, जेलाउ परमेस्वर आबा वासेहेङ साम्मान पाहि कालाउ परमेस्वरको जोल्काहोइ वासेहेङ खोराइका हिघाहि। जेलाउ केलाइ इन्ता हिघान्हाहि केलाइ सर्बोच्च महिमा, परमेस्वर स्वर्गसो एसा दोअ्काताङ पाका गाला हिङन्हाहि, “या काङको ताइकोङ मायारु चान हि, जाइहेङ का प्रेम पाखा। वाको दोफा का ओसारापाङ लेङचाखा।
19ओदोङ भाअ्सिङ केलाइ परमेस्वरको बक्तागेलाइ पाहासो लेखेका धर्मसास्तरता आझाइ भरोसा ताअ्नाखे। जेसापा नेलाइ या सन्देसता ध्यान पिसुना पानु नेलाइ रेम्का काम पासुखेना, हाइपालिपानु इदोइ ह्रिमा माजेङपा भरि कितिकितिकाता जोल्तेङ हिका गेसा भाइपा का दोङ हिघा कालाउ ह्रिमाको झेङका होइ सुमिङता थाअ्साइका चुमाका भाइपाङ ख्रिस्टको थाअ्साइका नेलाइको ह्रदयगेलाइता जोलावा। 20कालाउ या काथा बुझिलि महत्व पुर्न हि कि धर्मसास्तरता नेलाइ पढेका परमेस्वरको बक्तागेलाइको बचन खिनिङ बक्तागेलाइको ताइकोङ बिचारगेलाइ खिनिङ माको। 21हाइपालिपानु बक्तागेलाइ ताइमिङ हेलाउ बुङ हाइ दोङ माधुइहि, हाइपालिपानु आरु हासु बुङ नेलाइको नुइ धुइका चाहिघाखे। भरु पबित्तरो आत्मा नेलाइको बिचारहेङ काबुता ताअ्हि कालाउ इम्बालाइहेङ वा गोइका परमेस्वरको बचन धुइका बानाइहि।
Currently Selected:
पतरुस 1: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
