2 कोरिन्थि 10
10
पावलको आल्ते
1का पावल, नेलाइको आगाता हिलाउ मोनोइ जेङघा, कालाउ दुरे हिलाउ नेलाइ प्रति साहासि जेङखा! ख्रिस्टको मोनोइता कालाउ मायारु पाहासो का नेलाइहेङ सेउपाखा। 2का नेलाइहेङ सेउपाखा, कि नेलाइकोता लोलाउ का थाङका ब्याभार पालि मागोइयाको, हाइपालिपानु आधिमि द्याङगेलाइहेङ केलाइ इदोइ सुमिङको द्याङगेलाइको तरिकाहोइ काम पानाखे दोअ्का साङखा लागिखे। 3हाइपालिपानु केलाइ इदोइ सुमिङता हिनाखे, कालाउ बुङ इदोइ सुमिङको द्याङगेलाइ भाइपाङ केलाइ ताइको सतुरु दोफा धुम मापानाखे। 4हाइपालिपानु केलाइको धुमको कात्तिगेलाइ द्याङगेलाइ माको, भरु इन्सिका किल्लागेलाइहेङ नासा पालिको भाअ्सिङ केलाइ परमेस्वरको सरबुङको हातियारगेलाइ प्रयोग पानाखे। 5परमेस्वरको ग्यानको बिरोधता जाअ्का गालाबाजिगेलाइ कालाउ गोताङ आहाङकारि पुर्न बाधा केलाइ नासा पाङ, कालाउ केलाइ गोताङ बिचारहेङ ख्रिस्टको आग्या केम्लि बसता पानाखे। 6जेलाउ नेलाइ ख्रिस्टको पुर्न आग्याकारि जेङस्वाना केलाइ आग्या माकिकालाइहेङ साजाइ पिलि तियार जेनाङ।
7नेलाइते बाहार तिङका काथाहेङ खिनिङ खाङसुखेना, हिदोइ बुङ द्याङहेङ इदोइ निसित हि कि इङको ख्रिस्टको दोङ नु, वा ताइमिहेङ आरोङ फोम पाको। कि जिसिका उङको ख्रिस्टको हि केलाइ बुङ ख्रिस्टको दोङ हिनाहि। 8हाइपालिपानु केलाइहेङ प्रभुको पिका खाबाराको बिसोइता का हेन्जाङ घमन्ड पालाउ बुङ का लेदेरलि मागोयाङका, हाइपालिपानु इदोइ खाबारा नेलाइको खाङधुरिहेङ नासा पालि माको, भरु नेलाइको खाङधुरि बाढेपालि साघाइलिको भाअ्सिङ दोङ हि। 9का नेलाइहेङ लेखेका पात्तारागेलाइ नेलाइहेङ थिपालि तिम्पिका दोअ्तेङ माथानेसु। 10हाइपालिपानु आधिमि द्याङगेलाइ दोअ्खे, “वाको पात्तारागेलाइ थाङका कालाउ प्राभाबसालि हिखे, कालाउ इङको ताइमिङ लोकाता चाहि इङको हुइतेङ हिखे कालाउ वाको बचनको हिदोइ बुङ महत्य माजेङखे।” 11इन्सिका द्याङगेलाइ इदोइ फोम ताटाको, कि केलाइ ताइको लोलि मादोकाता पात्तारागेलाइ पाहासो जेदोङ दोअ्नाखे, ताइमिङ लोका बेला केलाइ सहि काम पानाखे।
12ताइको बाखिन ताइमिङ पाका आधिमि द्याङगेलाइ दोफा केलाइ ताइमिहेङ एनोङ दोङ थामेता सारिपा ताअ्लि, माकुनु ताइमिङहेङ इम्बालाइ दोफा दाजिलि केलाइ साहास मापाङ। कालाउ इम्बालाइता-ताइमिहेङ दोङतेङ खाङलाउ इम्बालाइ बुद्दिमानि माजेङका भाइका जेनाङ। 13परमेस्वर पिका काम खान्तेङ बाहारको कामहेङ केलाइ गर्ब मापाङ। कालाउ नेलाइ दोफाको कामको भाअ्सिङ परमेस्वर केलाइहेङ तोकि पिका सिमा लिता खिनिङ ह्याङ। 14नेलाइकोता लोलाउ बुङ मालोका भाइपा केलाइ काथा धाअ्पातेङ घमन्ड मापाङ, हाइपालिपानु ख्रिस्टको सुसमाचार चुम्पुतेङ दुरेको दामासो नेलाइकोता लाम्फा कोरिन्थ सहरता थुकाका केलाइ दोङ हिघानाहि। 15केलाइको भाअ्सिङ परमेस्वर दोअ्का सिमा कालामतेङ बोमिगेलाइको परिस्रोमता गर्ब मापाङ, भरु केलाइको आस या हि, कि नेलाइको खाङधुरि बाढेतेङ हानिलाउ केलाइ नेलाइको वरिपोरि हेन्जाङ द्याङगेलाइता थुकालि द्वाङ। 16कालाउकि केलाइ दुरे-दुरेको मौउजागेलाइता नेलाइ खाङतेङ बाहार सुसमाचार प्राचार पालि द्वाको। एसापा आरुगेलाइ लाम्फासोङ काम पाका थामेता केलाइ काम पातेङ घमन्ड मापाइने। 17जेसाङ पबित्तरो धर्मसास्तर दोअ्खे, “घमन्ड पाकालाइ परमप्रभुता दोङ घमन्ड पाको।” 18हाइपालिपानु ताइको बाखिन ताइमिङ पाका द्याङ सुइकार माजेनाङ, भरु परमेस्वर दोङ बाखिन पाका द्याङहेङ सुइकार पाङ।
Currently Selected:
2 कोरिन्थि 10: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
