1 कोरिन्थि 8
8
मुर्तिहेङ चढाइका चाका-आम्का
1नेलाइ कासेहेङ मुर्तिगेलाइहेङ चाढाइका चाका-आम्काको बिसोइता हिअ्का हिघासुन्हा, केलाइ इदोइ गोताङ काथागेलाइको बिसोइता गिनाखे, कालाउ ग्यानहोइ केलाइहेङ घमन्डि बानाइखे, कालाउ प्रेमहोइ चाहि आरुहेङ साघाइखे। 2जेसापा जाइ गिखा दोअ्तेङ सम्झिखे, कालाउ वा गिलि गोइका खास काथा हाइ दोङ गिका मान्थुखे। 3कालाउ हासु बुङ परमेस्वरहेङ प्रेम पाखा दोअ्खे पानु, उङको द्याङहेङ परमेस्वर नाल्खे।
4ओदोङ भाअ्सिङ का मुर्तिगेलाइहेङ चाढाइका चाका-आम्का चालि एल या माएल, इङको प्रस्नको जोबाफ पिलि भोखा, केलाइ गिनाखे कि मुर्तिगेलाइ सत्ये परमेस्वर माको, भरु एमि खिनिङ परमेस्वर हि। 5स्वर्ग कालाउ प्रिथिबिता हेन्जा हि जाइहेङ द्याङगेलाइ “दिरगेलाइ” कालाउ “इस्वरगेलाइ” दोअ्खे। 6कालाउ केलाइको भाअ्सिङ ते एमि खिनिङ परमेस्वर हि, कालाउ वा केलाइको आबा हि। कालाउ वा दोङ गोताङ आमेने बानाइहि, कालाउ केलाइ वाकोसोङ बान्चिका हिनाहि। एन्साङ पातेङ केलाइ दोफा एमि खिनिङ प्रभु हि, कालाउ वा येसु ख्रिस्ट हि। येसु पाहासो दोङ गोताङ काथा सिरजाइन्हाहि, कालाउ वाकोसोङ केलाइ बान्चिका हिनाहि।
7कालाउ बुङ केलाइको आधिमि खान्धुराइगेलाइहेङ मुर्तिको हिदोइ बुङ सरबुङ मान्थुखे दोअ्का काथा आझाइ थाहा मान्थु। हाइपालिपानु लाम्फा इम्बालाइ मुर्ति पुजा पाघाखे, ओदोङ भाअ्सिङ एला बुङ मुर्तिगेलाइहेङ चाढाइका चाका-आम्का चालाउ इम्बालाइहेङ इसिका लागिखे कि, का ताइमि बुङ मुर्ति पुजाता झ्वाइनाघा। कालाउ रेम्का-मारेम्का लाअ्पालि मादोनाङ इन्सिका चाका-आम्का काथाहोइ का पाप पाखा दोअ्का थानिखा। 8कालाउ चाका-आम्का आनेमानेहोइ केलाइहेङ परमेस्वरको भेरपा माबानाइखे। माचालाउ बुङ परमेस्वरको नजरता केलाइ आयोग्य माजेङन्हाखे, कालाउ चालाउ बुङ केलाइ परमेस्वरको नजरता आसल माजेनाङ।
9कालाउ ख्याल ताअ्सु, नेलाइको स्वतन्तरहोइ इङको हुइका खाङधुरि हिका द्याङगेलाइहेङ पापता मापरि पाको। 10नेलाइहेङ थाहा हि कि, इदोइ मुर्तिगेलाइता जिबन मान्थु, कालाउ ओदोङ भाअ्सिङ नेलाइ मुर्तिहेङ चाढाइका चाका आमेने चालि दोस्वाना। कालाउ जेसापा हासु बुङ खाङधुरिता हुइका हिनाङ नासेहेङ इङको मुर्तिहेङ चाढाइका चाका आमेने चाकाताङ पाका तिङखे पानु, वा बुङ इदोइ ते पाप माको रोइसो दोअ्तेङ मुर्तिहेङ चाढाइका चाका आमेने चालि सुइरिखे। 11ओदोङ भाअ्सिङ खाङधुरिता हुइका हिका ओनेगेलाइ, नाङको कारनहोइ येसुता खाङधुरि पालि लाअ्तावा, जाइको भाअ्सिङ येसु ख्रिस्ट सिपिहि। 12एसापा जेलाउ खाङधुरिता हुइका ओनेगेलाइ इन्सिका पालि रेम्का माको दोअ्तेङ बिचार पासुखे, कालाउ जेसापा नेलाइ ओदोङ काम पालि तोङपासुखेना पानु नेलाइ पाप पासुखेना, एन्साङ दोङ नेलाइ येसु ख्रिस्टको बिरोधता पाप पासुखेना। 13ओदोङ भाअ्सिङ जेसापा मुर्तिहेङ चाढाइका चाका आमेनेहोइ आरु खान्धुराइगेलाइहेङ खाङधुरि लाअ्लि लागाइखे पानु, का इन्सिका चाका आमेने माचाङका, कालाउकि आरु खान्धुराइगेलाइ ताइको खाङधुरि मालाअ्ताङ।
Currently Selected:
1 कोरिन्थि 8: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
