1 कोरिन्थि 12
12
पबित्तरो आत्माको बरदानगेलाइ
1खान्धुराइ ओनेगेलाइ, पबित्तरो आत्माहोइ नेलाइहेङ पिका बरदानगेलाइको बारेता नेलाइको प्रस्नको बिसोइता का नेलाइहेङ झालाफालापा बुझिपालि भोखा। 2नेलाइहेङ थाहा दोङ हि कि, जेलाउ नेलाइ खान्धुराइ मान्थु घासुखेना, कालाउ नेलाइ हिदोइ बुङ प्रकारहोइ प्रभाबित जेङतेङ नुइ धुइलि मादोका मुर्ति पुजा भारि लागिका हिघासुखेना। 3ओदोङ भाअ्सिङ नेलाइ इदोइ काथा गिसु दोअ्का का भोखा, कि पबित्तरो आत्मासो नुइ धुइका हासु बुङ “येसु स्रापित ज्याको” माअ्दोखे, कालाउ पबित्तरो आत्मा पाहासो खिनिङ हासु बुङ “येसु दोङ प्रभु हि” दोअ्लि द्वाङ।
4आत्मिक बरदानगेलाइ परिपरिको हिखे, कालाउ पबित्तरो आत्मा दोङ इङको गोताङ पिखे। 5सेवा पाका तरिका भेनेङ-भेनेङ हि, कालाउ केलाइ झाराङ एनोङ दोङ परमेस्वरको सेवा पानाखे। 6कालाउ सेवाको भाअ्सिङ परिपरिको योग्यतागेलाइ हि, कालाउ ओदोङ परमेस्वर इम्बालाइ झाराङहेङ सेवाको भाअ्सिङ योग्यता पिखे। 7परमेस्वर झाराङ खान्धुराइगेलाइहेङ साघाइलि पबित्तरो आत्माको बरदानगेलाइ पिका हि। 8परमेस्वर पबित्तरो आत्मासो आधिमिहेङ बुद्दिको काथा दोअ्का, आधिमिहेङ ओदोङ पबित्तरो आत्माहोइ ग्यानको काथा दोअ्का बरदानगेलाइ पिखे। 9आधिमिहेङ ओदोङ पबित्तरो आत्मासो बल्लियाका खाङधुरि पाका, कालाउ आधिमिहेङ ओदोङ पबित्तरो आत्मासो मासाधिकालाइहेङ एल्पाका बरदानगेलाइ पिका हि। 10आधिमिहेङ ओदोङ पबित्तरो आत्मासो भारबुसाइका कामगेलाइ पाका, कालाउ आधिमिहेङ आगमबानि दोअ्का, कालाउ आधिमिहेङ आत्माको बरदानगेलाइ नाल्लि दोका, कालाउ आधिमिहेङ परिपरिको भासागेलाइ धुइका जेदोङ चाहि द्याङगेलाइ माबुझिखे, कालाउ आधिमिहेङ चाहि इङको भासागेलाइको माने खोलि पिका बरदानगेलाइ प्याङ। 11कालाउ इदोइ गोताङ बरदानगेलाइ एमि पबित्तरो आत्माको कामगेलाइ दोङ हि। वा झाराङहेङ वाको इच्छा आन्सारको बरदानगेलाइ पिखे।
एनोङ दोङ जिउ हेन्जा आङगगेलाइ
12हाइपालिपानु जेसाङ जिउ एनोङ हि, कालाउ इङको को हेन्जाङ आङगगेलाइ हिखे, कालाउ जिउको गोताङ आङगगेलाइ हेन्जा हिलाउ बुङ जिउ चाहि एनोङ दोङ हिखे, ख्रिस्ट कालाउ वाकोता खाङधुरि पाकालाइ बुङ इन्सिकाङ हिखे। 13हाइपालिपानु एनोङ दोङ पबित्तरो आत्मासो केलाइ झाराङ एनोङ दोङ जिउता बप्तिस्ता निङका हिनाहि। चाहे इङको यहुदि ह्याको, चाहे गैर-यहुदि, चाहे बान्धाइति, चाहे बान्धाइति माको, केलाइ झाराङ एनोङ दोङ पबित्तरो आत्मा निङका हिन्हाहि।
14केलाइको जिउ एनोङ दोङ आङगसो खिनिङ माको, भरु हेन्जा आङगगेलाइसो मिलितेङ जेङका हिखे। 15जेसापा खोकोइहोइ “का खुर माको, ओदोङ भाअ्सिङ का जिउको आङग माको” दोअ्काताङ, हाइ इङको जिउको आङगको माजेङखे रो? 16कालाउ जेसापा न्हातोङहोइ “का मिसियाँ माको, ओदोङ भाअ्सिङ का जिउको आङग माको” दोअ्काताङ, हाइ इङको जिउको आङगको माजेङखे रो? 17जेसापा गोताङ जिउ मिसियाँ दोङ हिनुते हिसोसो हिङलि? जेसापा गोताङ जिउ न्हातोङ दोङ हिनुते न्हुम्लि हिसोसो? 18कालाउ परमेस्वर ताइको इच्छा आन्सार केलाइको जिउता गोताङ आङगगेलाइ सोबाइपा सारिपा ताअ्पिका हि। 19जेसापा इङको गोताङ एनोङ दोङ आङग हिनुते कालाउ जिउ दोङ मान्थुधावा। 20ओदोङ भाअ्सिङ जिउको आङगगेलाइ हेन्जा हिलाउ बुङ जिउ चाहि एनोङ दोङ हि।
21मिसियाँ खुरहेङ “कासेहेङ नाङको आवस्यक मागोइयाङ” दोअ्लि मादोअ्खे, कालाउ पुरिङ बुङ खोकोइहेङ “कासेहेङ नाङको आवस्यक मागोइयाङ” दोअ्लि माद्वावा। 22भरु जिउको झन हुइका तिङका आङगगेलाइ दोङ माजेङसा माजेङका हि। 23-24जेदोङ जिउको आङगगेलाइहेङ केलाइ आतुइसा महत्वय थानिनाखे, इङकोहेङ केलाइ रेम्फासो स्याहार पानाखे। ओदोङ भाअ्सिङ केलाइको जिउता मातिङका आङगगेलाइ हेन्जा सामाराइन्हाखे, जेलाउ कि केलाइ तिङका आङगगेलाइको हेन्जा स्याहार पालि मागोइखे। ओदोङ भाअ्सिङ परमेस्वर केलाइको गोताङ जिउको आङगगेलाइहेङ सारिपा ताअ्का हि, कालाउकि आतुइसा महत्वय थानिका आङगगेलाइ बुङ स्याहार निनाको। 25कालाउकि जिउ माखेङन्हाको, कालाउ जिउको गोताङ आङगगेलाइ एमिसो भेनेङको भाअ्सिङ वास्ता पाको। 26जेसापा एनोङ आङगहेङ दुख जेङखे पानु, जिउको गोताङ आङगगेलाइहेङ दुख जेङखे। कालाउ एनोङ आङगको आदार जेङखे पानु, जिउको गोताङ आङगगेलाइ दोफाङ आनान्द मानिपाखे।
27नेलाइ ख्रिस्टको जिउ दोङ हिसुना कालाउ नेलाइ झाराङ वाको जिउको आङगगेलाइ भाइकाङ हिसुना। 28ख्रिस्टको इदोइ मन्डलिता परमेस्वर केलाइहेङ खाल-खाल्को कामको भाअ्सिङ नियुक्त पाका हि: एतेङ साल्न्हाका चात्यागेलाइ, न्हेतेङ परमेस्वरको बक्तागेलाइ, सुम्तेङ सिक्स्यकगेलाइ, कालाउ भारबुसाइका काम पाकालाइ, कालाउ एल्पाका बरदान निङकालाइ, कालाउ साघाइकागेलाइ, कालाउ आगुवागेलाइ, कालाउ परिपरिको भासा धुइकालाइहेङ ताअ्का हि। 29हाइ गोताङ साल्न्हाका चात्यागेलाइ दोङ हि? हाइ झाराङ परमेस्वरको बक्तागेलाइ दोङ हि? हाइ झाराङ मास्टरगेलाइ दोङ हि? हाइ झाराङ भारबुसाइका काम पाकालाइ दोङ हि? मिधुलाउ बुङ माको। 30हाइ झाराङ दोफा एल्पाका बरदानगेलाइ हिखे? हाइ झाराङ दोङ परिपरिको भासा धुइखे? हाइ झाराङ दोङ याको माने खोलिलि दोखे? सिलाउ बुङ माको। 31कालाउ झन बार्का बरदानगेलाइको निङका इच्छा पासु। कालाउ का नेलाइहेङ झन रेम्का इङको बरदानको काथागेलाइ दोअ्प्याङका।
Currently Selected:
1 कोरिन्थि 12: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
