Zakharia Uram 6

Zakharia biryi liki inbaryi dinyi eibmou kunumna ara kongkong ena boyibarande bisam kuda dumbaryi eibmou uram deyok

6:1-8

1Zakharia biryi kunumna liki inbaryi dinyi eibmouci, nukmou ara ato eboka nukmou. “Niryi dinman uca, yuk kunumna ton eibman. A eibman kunumna ara ninyi ordaryibanmangiryi bisam kuda aryi boyibanmaci uca, kongkong eryibarande aia asi eibman. Ba, a kongkong ena ara mutuk kon bitinyi bukdei noutamtam aryi dumbaryi anabmang asi eibman. A mutuk kon ara keil si tembaga aryi bukwe mutuk bitinyi noutamtam aryi anabmang asi eibman. 2A kongkong erande dinyi ara bisam kuda bitinyi aryi linmaring ba, kongkong eryibanmar asi eibman. Ba, kongkong ena bobmang bisam kuda otong ara yuma dinyi ara kurun bi otong deibwe kuda aryi bobmar. Ani, bitinyi dinyi ara mirin otong deibwe kuda aryi bobmar asi eibman.#Why. 6:4-5 3Ba, winiryi kongkong ena bobmar bisam otong ara kait otong deibwe bisam aryi bobmar. Ura, dumunyi bobmar bisam kuda ara kourkikibna otong deibwe bisam kuda aryi bobmar asi eibman.#Why. 6:2 4Ura, niryi uram doboka ni ab tonkwa uram sisingmanim Malaikat Tuhan bisi ato eboka asibdenman. ‘Nai a, a asing eibmana nirya ara unatoa ati eibman do?’ eboka asibdenman. 5Uca, a uram eryuryangananyi biryi nisi ato ebmar, ‘Sunci Er Iya Erebdobnyi, imtam yin doun nang sienyi urasin dam binmangnyi ani, kumwe anamyangarande tam bindobkwamang. Ara, ton dinyi ara yaletam binkwamar ba, ton dinyi ara kitingbantam binkwamar. Ba, ton dinyi ara me utam binkwamar ba, ton dinyi ara me youkwetam kuboka bindobkwamang.#Why. 7:1 6Ara, mirin otong deibwe bisam kuda aryi linmaci kongkong ena ara Me Utam mutuk kuboka binkwamar. Ba, kait otong deibwe bisam kuda aryi linmaci kongkong ena ara kitingbantam mutuk binkwamar. Ba, kourkikibna otong deibwe bisam kuda aryi linmaci kongkong ena ara Me Youkwetam mutuk binkwamar,’ ebmar. 7Ba, a mikib bisam kuda dumbaryi ara, ‘Tukwetam mutuk nirya yibinkiriktibyi,’ tenen kwelyakde donmang asi Malaikat biryi, ‘Ur anabdobmunyi ura, tukwetam mutuk nirya ur yibinkirikdarur,’ ebmar. Ba, sunci ola anabdobing ura, tukwetam mutuk nirya yibindoka dibkirikmang. 8Ura, a uram eryuryangananyi biryi uram doboka nisi ebmanir, ‘Kanci dibderum. Sun anaboka Me Utam mutuk tam binmang bisam kuda mer aryi Ni Kanya asi namibdeibmaning,’ ebmar asi eibman,” eboka nukmou.

Ukuryok kaibwa unubkwandanyi biryi Yerusalem atei asi Er kun atei kibkwamwe uram deyok

6:9-15

9Zakharia biryi ato eboka nukmou, “Er Iya Erebdobnyi biryi nisi uram eboka arukmanir. Ara, ato eboka arukmanir, 10‘‘Kanci anabdobminyi ura, ninyi si Zefanya mi Yosia atei asi birum. Akatei biminyi ura, sun yuk atei boboka deirlorbinamnyi nang deici sun taruk dam aryi karen dinyi asi buboka dobdoro yibinkwandum. Sun yuk mutuk deirilorbinamnyi nang deici si ara Heldai biryi deirin dinyi ab, Tobia biryi deirin dinyi ab, Yedaya biryi deirin dinyi ab buboka dobkwandum. Ani, sun Babel mutuk aryi tamuboka yandobyi nang nirya aryi deirin dinyi ab kuboka buluboka dobkwandum. 11A buluboka dobkwamarim keica ara dengna weik keil si perak ab, emas ab asi dobminyi ura, weik sien nang kisok kaluraming dinyi kiknibkwandum. Sirya kiknibminyi ura, ninyi si Yozadak mi Yosua ninyi dama deirin sienyi bisi kalubdeibkwandum. 12Sirya kalubdeibminyi ura, ersi ato ebkwandum, “Er Iya Erebdobnyi, imtam yin doun nang sienyi biryi ato ebdeibmar, ‘Anyi er si ara Ninyi Yok Unumnanyi. Anyi bira ninyi minob nang yok unumnanyi. Anyi bira er kuranci akiryi yok unubokabdiryi erci Er Imtamnyi biti dama deirin ai dobkwandanyi,’ ebdeibmar,” ebkwandum. 13Ura, tonda “Anyi biryi Er Iya Erebdobnyi dama deirin ai dalubkaamnyi asi tubto tamuboka dobkwande. Ba, anyi er si asi weik ererdeirin dinyi dobdobkwande ani, erci weik sien nang bun sokon bukoka er kalingna mutuk kun nang asi talebkwande. Ba, er siriktam kuboka ara dama deirinanyi tentok kubkwande ura, sunci tonkwa bukoka sun kun ai mangkau kun uram deyok asi sisikoka tonkwa wa ibkwanding. 14Ba, weik sien nang kaluraming dinyi ara Er Iya Erebdobnyi biti dama deirin ai umbura iya kubkwande. Ara, sun ninyi atei boboka deirlorbinamnyi nang asi tamuboka yandamingnyi ati kanya teneibkwandum. A nang sun si ara Heldai ab, Tobia ab, Yedaya ab, ninyi si Zefanya mi si Yosia ab ati, kanya teneirdena ati akai umbura iya deibkwandum. 15Asi, era mutuk nang ababyi yandoka Er Iya Erebdobnyi biti dama deirin ai tonkwa dobkwandum. Ba, a ebdeianci tok nirya kunubci ura, sunci nisi bikwanurum, “E, anyi bira Er Iya Erebdobnyi, imtam yin doun nang sienyi biryi bokdonokwe ba, yandoka kurur,” tenen bikwanurum.’ ” Ani, sun Er Iya Erebdobnyi bira sun Molondarurnyi uram asi diboka-diboka kekebmunyi ura, a ebman dinyi nirya kunubkwande,’ eboka arukmanir,” eboka nukmou.

Currently Selected:

Zakharia Uram 6: MTG

Highlight

Copy

Compare