Zakharia Uram 14

Er Iya Erebdobnyi biryi Yerusalem atei Iya Weik Sienyi kibdanmou uram deyok

14:1-21

1Diba ati, uki tentok da berekwande tum ara Er Iya Erebdobnyi biryi wibdeibwe tum berekwande. Ba, a uki tum aryi sun mar ordana nang aryi, sun Yerusalem nang bona talena yandoka arabdobsingiryi, sun urasin dam asi bokdobkwaming. 2Sun Yerusalem atei nang asi mar bobkwansing ati, Ni Iya Erebdobnyi biryi im dangna mutuk nang tukwe dangna mutuk nang nirya bulubdeibkwan. Ba, akatei nirya arabdobsingnyi ura ai umbura wengyandoka utotoa nirya dobdobkwaming. Ani, sun nerabwe ara talyi yobdoro yibinkwaming. Ba, akatei nang ton deici nang ara boboka yuk mutuk deirirlorbinkwaming. Bok, ninyi weik deici nang ara nirya kum danardeina kum kubkwaming. Eda, akatei iya kubdobkwaming. 3Ura, Er Iya Erebdobnyi biryi mar dobdiryi, sun yuk atei nang-yuk atei nang asi mar bobkwande. Ba, Erci mar bobkwande ara mar ordan tum aryi ordaraming to kubkwande. 4A tum ara Er Imtamnyi bira Yerusalem atei donunga yaletam kuboka bukwe mutuk si Zaitun dub ai yandoka tikwande. Ba, Zaitun kon ara yaletam aryi deyok kouboka dilikdebinmaci asi kitingbantam deiribinkwande. Ba, a mutuk kon ara ton tam ara me utam kuboka burbici ura, ton tam ara me youkwetam kuboka burbinkwande. Asi noutam kwaklobokwande mutuk neitamtam ara weik mutuk bakan nun likeibkwande. 5Ba, sunda Ni Imtamnyi mutuk kon bukwe ninkan-ninkan noutam likwa mutuk bakan asi cungdorbinsekwandum. A cungbinkwandum ola ara minob talak Yehuda mutuk taleamwe weik sienyi si Uzia kuramwe talak aryi mutuk eimna donmou ba, cungbinandau to kuboka cungdorbinkwandum. Ura, Er Iya Erebdobnyi ni Molonunyi bira Er uram eryuryangan nang nirya Ersi milibmangnyi bok tonkwa yankwaming. 6Ba, a talak ara arum ikib-ikib erande dinyi kum, lumtaia deirirande ton dinyi kum ababyi ton kum kubkwande. 7Bok, uki tentok berekwande uki tum ara ukuryok talak aryi berekmaci ani, inibmaci ani, kimnande to kum kubkwande talak uki berekwande. Eda, lukunda kunuk dangnande uki ababyi nirya berekmurubkwande uki talak yankwande. A uki berekwande talak ara diba kunubkwande bok, Er Iya Erebdobnyi tentok bingdur.

8A talak aryi ninyi kam kurdeirin me Yerusalem atei dam aryi u doboka yuryibinkwande. Ura, te kwalekci ai aryi ton tam ara yaletam kuboka yurbici ura, ton tam ara kitingbantam kuboka yurbinkwande. A me yuryibaranci ara iya co keta li babyi mourya li babyi ton cemdena kum uca iya yibinmurubkwande.#Yeh. 47:1; Yoh. 7:38; Why. 22:1 9Ba, Er Iya Erebdobnyi bira im dangna mutuk tukwe dangna mutuk kalingna Weik Sienyi kibkwande. Ba, a talak ara ninyi nirya Er tentok asi sun Molonanyi kibdeiboka molobkwaming. Ani, Er si asi weik erebdeiboka Er tentok si asi molobkwaming. 10A mutuk dam bukwe mutuk nirya ara Araba-Yordan mutuk bakan likwe to kuboka likwande. Ara, me utam Geba mutuk aryi deyok kouboka likde yurbinanci asi Yerusalem atei donunga me youkwetam kuboka mutuk Rimon mutuk dam sirya lingdeirirbinkwande. Bok, Yerusalem atei donunga dam burdarur mutuk ara outam kibdeiboka akatei asi iya erebkaboka mutuk dub asi doraming ato atei kibkwande. Akatei liktabakwande ara, yuma Benyamin lika bublan dam aryi deyok kuboka likde binanci asi akatei lumuntam kuboka botorkweten bisik lika bublan dam sirya lingdeirirbinkwande. Ara, yuma Hananeel dungna keil dam aryi deyok kouboka ani, weik sienyi co anggur du yung urun dam asi sirya lingdeirirbinkwande. 11Ba, mar ordana ababyi kum obdankwaming deyok aryi Yerusalem atei kubkwaming nang ur mangkau asa aryi iya kubmurubdobkwaming.#Why. 22:3

12Ba, Er Iya Erebdobnyi biryi sun Yerusalem atei asi mar boamingnyi atei nang asi wenebkwande ara ato dinyi aryi wenebkwande. Sun kam tuba kuboka lulungdamingnyi bok, sun nong ara luboka tub tokol dukoka-dukoka sakwande. Ani, asing lubsakoka si bisik luboka kibkwande. 13A talak aryi Er Iya Erebdobnyi biryi sun kankan aryi kanya dangubminikoka ilil kibsinikwande. Ba, sun mamun talyi er dam a tikmarinyi bisi taruk talebdongoboka kulaboka obdanin yibinkwaming. 14Ura, Yehuda nang ababyi a Yerusalem nang asi mar bobkwaming. Ba, yuk atei nang dinyi utoto bona talena nirya boboka bulubminikwaming. Ara, dengna weik keil si emas ab, perak ab, ongon aling yubwa ilinto ab boboka bulubminikwaming. 15A mambul don dinyi ara bisam kuda ababyi mambul dobkwaming ani, unta ababyi, keledai ababyi ani, winin bisam nirya sun ai winiraming dinyi nirya mambul dobkwaming.

16Ba, sun yuk atei nang-yuk atei nang nirya Yerusalem atei mar iramingnyi atei nang nirya yankwaming. Ara, o kwali-o kwali binkwaminga nirya Yerusalem atei dam yandoka Er Iya Weik Sienyi, Iya Erebdobnyi, imtam yin doun nang sienyi bisi moloboka si weik eryankwaming. Ani, sun Yahudi nang aryi Co Bok aryi Tiya ati Durubdeiboka Kun Ai tum ati kanya teneiboka kwalibkwaming ati yankwaming. 17Bok, sun im dangna nang tukwe dangna nang yala aryi Er Iya Weik Sienyi, Iya Erebdobnyi im ton tukwe ton kikniamunyi bisi moloboka si weik kum eryankwaming nang yala atei ara sunti mo kum cebdeibkwande. 18Ba, sun Mesir mutuk nang aryi Co Bok aryi Tiya Durubdeiboka Weik Kwalina Yin Tum ati, yandoka si weik kum eryankwaming. Ura, Er Iya Erebdobnyi biryi sunsi bum luna youn karebkwande. A mambul dinyi ara Co Bok aryi Tiya ati Durubdeiboka Kun Ai Kwalina Yin tum kum yiryankwaming atei nang asi wenebkwande mambul dinyi ara sun Mesir nang ababyi bobdeibkwande. 19A wenen dinyi ara sun Mesir mutuk nang ab sun yuk mutuk nang ab aryi malyi kuramingnyi deyok ati wenebkwande dinyi. Sun malyi kun dinyi ara Co Bok aryi Tiya ati Durubdeiboka Kun Ai Weik Kwalina yin tum asi, yandoka si weik eryangana kum kuramingnyi deyok aryi sunsi wenebkwande.

20Ura, a talak ara Er Imtamnyi biti yuk wimdeirina kum kuramingnyi dinyi ababyi yuk wibdeibkwaming. Ara, bisam kuda ngang dam ai tiltiling ena biribdongoamingnyi ai asi kerek sekdongobkwaming. A dinyi ara, “Er Iya Erebdobnyi biti yuk wibdeibdob dinyi,” eboka sekdongobkwaming. Ba, Er Iya Erebdobnyi ai umbura dam deiriramingnyi buna yun suwa ababyi, Er Imtamnyi biti dama deiboka uk dan keil dungna dub dingdongon bisam ining kweboka deirin meyok sangkol ato dinyi kibdeibkwaming. 21Ba, Yerusalem atei ab Yehuda mutuk atei ab deirinung buna yun suwa nirya ara wiboka Er Iya Erebdobnyi, imtam yin doun nang sienyi dinyi akwe kibkwande. Asi, ninyi nirya akatei dam sun dama uk daryankwaming nang ara a yun suwa doboka yubkwaming. A talak ara Er Iya Erebdobnyi ai dam ara dengdana ton kum kubkwaming.

Currently Selected:

Zakharia Uram 14: MTG

Highlight

Copy

Compare