Filipi Uram 1
1
Paulus ab Timotius ab aryi sun Filipi atei kuramnyi dib tenen nang asi, “Ni kwit yabwe,” eboka kibdobmarei uram
1:1-2
1Ni Paulus ab Timotius ab ara nun Du Yesus Kristus wa irmilin nang kununubci, sun Filipi atei kundarur dib tenen nang ati, “Teleb,” ebmasinim. Ara, sun nun Nai Imtamnyi mabwe nermabwe kurandum cok, nun Du Yesus Kristus dam kurandum nang nirya ati kibdobmasinim. Tonda, sun dib tenen nang asi kalingnandum nang babyi, ton sun utotoa kum nang asi bongkaren nang babyi ati kibdobmasinim. 2Nun Nai Imtamnyi ab nun Du Yesus Kristus ab aryi sunsi kisal dakoka antanibdeibsiringnyi uca, sun kanya teleb akwe kuna teleb.
Paulus biryi Er Imtamnyi si weik eramuryi, sun Filipi nang ati molormiliramwe uram
1:3-11
3Nun Nai Imtamnyi biryi karebmasou uca, sun Filipi nang aryi minob uca nun Du Yesus Kristus uram Teleb Uram dobdobmandau ura, nunda Teleb Uram eterebde ban nang asi milibmandau. Ani, ukuryok ababyi sunci nunsi tuba milibde baransurum. Ati, niryi a dinyi ati kanya teneibde basununci, nun Nai Imtamnyi bisi tuba-tuba, “Ei nun Nai,” eboka kinun. 4Ara, nirya kilkil kanya boboka abniryi, sun nirya ati darab-darab eboka tuba-tuba molormilisunun. 5Ati, niryi sunti ato tenesunun. “Teleb Uram yuma dobkalibmai uki tum aryi kuboka nunda Teleb Uram eterebde ban nang asi miliransei ani, ukuryok ababyi tuba miliransing.” Ato tenesunun cok, ni kanya kilkil kunurur. 6Ura, katabum eboka niryi sunti ato tenesunun, “Nun Nai Imtamnyi biryi deyok kouboka sun kanya dam yuk-yuk aryi teleb wa ibkalibmasou. Wa ibkalibmasou ani, Erci a wa asi ibmurubde baransici ani, tanglona kum uca kunubkwande. Sirya kunubmaci ura, nun Du Yesus Kristus tamuryankwande.”
7Nira sun Filipi nang ati boukwe weik kusunun deyok aryi, niryi sun nirya ati ato kuboka kilkil kanya bosunun ara kikib. Sun nirya ara nira Teleb Uram eterebde banunyi bisi miliranurum nang kurandum. Ara, nira tabwe deaneinyi kunun cok, Teleb Uram ati, “Dib en uram kurur,” eboka libde banun asi, sunci nisi milibde baranurum. Ara, nun Nai Imtamnyi biryi kisal dakoka teleb wa takubdeibnou uca, a wa asi inun asi sunci milibde baranurum ati ebman. 8Niryi sun nirya ati, “Sun ab tonkwa ebdatibyi se,” tenen boukwe weik bosunun. Nun Du Kristus Yesus bira sunsi boukwe weik kusurur to, nibabyi neiktoto sunsi boukwe weik kusunun. Tola kuma. Nun Nai Imtamnyi biryi ni tenen kanya bingnurur ati diboka ebmasin.
9Ura, niryi nun Nai Imtamnyi bisi molormiliransinci, sun Filipi nang ati ato eboka molormilisunun. “Nai Imtamnyi, Kanci bikdob dinyi karebminyi uca, sun boukwe kimdana ara tabakdongo-tabakdongo boukwe weik kimdana teleb. Tonda, dib en uram deyok diboka bikdobingiryi, sun boukwe kimdana ara langdeiboka kuna teleb,” eboka molormilisunun. 10Ba, sunci, “A dinyi ara bikdob dinyi kurur,” tenen ba, “O dinyi ara malyi dinyi kurur,” tenen bikwandum ati molormilisunun. Tonda, sunda kanya bintinin kum dinyi boboka tatab-tatab ebman to kum kuramunyi ura, nun Du Yesus Kristus tamuryangaci uki tum berekwande ati molormilisunun. 11Ara, nun Du Yesus Kristus biryi karebsici uca, sun langdeiboka du mouransir nang kuramunci, Er Imtamnyi urasintam aryi teleb dinyi kununa teleb. Ninyi nirya aryi nun Nai Imtamnyi si weik erebkwaming ati, ato eboka molormilisunun.
Paulus bira tabwe deaminyi kuramwe bok, Teleb Uram limnamwe uca, ninyi ilinto aryi Teleb Uram dobdobmai uram
1:12-30
12Ura, ni kwit yabwe, sunci a dinyi ara bingna teleb. Nira tabwe deaneinyi kunun cok, nun Du Yesus uram Teleb Uram lak eterena kum taklobmase ati ebman. Ninyi aryi nisi tabwe deanei uca, Teleb Uram eterena ara bisik kum sekminikanei. Eda, bublan kungdeirininto kuanei ba, Teleb Uram etereranse. 13Ninyi aryi nisi tabwe deanei uca, sun weik sienyi si Kaisar atei kalingna nang nirya aryi niti, “Kristus uram Teleb Uram lak eteresurur deyok aryi, tabwe deaminyi,” tenen bingnunung. Tonda, yuk nang nirya akatei kuraming nang ababyi neiktoto ato teneboka bingnunung. 14Ni Paulus bira tabwe deaneinyi kunun cok, ilil kum uca Teleb Uram ilil asa kum uca eterebmurubde banun. Tanglona kum uca eterebde banun deyok aryi, nun kwit yabwe nun Du Yesus bisi dib tenen nang yuk nang sun kanya ara katabum ebdeibmou. Katabum ebdeibmou uca, sunda ilil kanya tuba kum boraming. Eda, katabum kanya kibtabakoka Er Imtamnyi Uram lak etereraming.
15Ninyi ton nang ara nun Du Yesus Kristus uram Teleb Uram lak eterenung cok, sunci niti kitukna kanya boboka bisik sengminingnunung. Ba, yuk nang ara niti boukwe weik kiboka abningiryi, nun Du Yesus uram Teleb Uram lak etereraming. 16A nang ara boukwe weik kimdana deyok aryi, ato kunuraming. Ati, sunci niti ato teneraning. “Nun kwit Paulus bira tabwe deaminyi bira nun Du Yesus uram Teleb Uram asi libokabdiryi, ‘Dib en uram,’ ebkwande ati ato kurande,” tenenung. 17Ba, sun wingdana kanya bobingnyi nang ara nun Du Yesus Kristus uram Teleb Uram lak etereramingiryok, sunci, “Ni damnyi erebdeibdandobkwan,” tenen etereraming. A nang ara wingdana kanya boramingiryok, ni tabwe deaneinyi biti talyitam ati, “Dib tenen nang ilinto ara Paulus bisi taklobmai ura, nunsi milisunung. A deyok aryi, er kanya tabakoka mambul weik kurur,” tenenung. Ato teneboka kunung uca, ni tabwe deboka dongobneinyi bisi tabakoka mambul borminingnunung. 18Ni kanya ara a deyok ati kankana kubmanir tenebmarum do? Ato tenen kum. Ton nang ara kitukna kanya boboka nun Du Yesus Kristus bisi lak etereraming. Ba, yuk nang ara kitukna kanya bona kum uca nun Du Yesus Kristus Uram lak eraming. A nang nirya ara nun Du Yesus bisi lak eraming ati, ni kanya kilkil kuranir ani, aminda ababyi ni kanya kilkil kubkwanir. 19“Nun Nai Imtamnyi biryi nisi lebnici uca, tabwe lobdeibkwaning,” tenen deyok aryi, ni kanya kilkil kuranir ati ebman. Sun Filipi nang aryi niti nun Nai bisi molormiliranurum uca, nun Du Kristus biryi nisi Er Imtamnyi Kanya Roh Kudus karebnou ba, nisi milinurur.
A deyok aryi, ni, “Ur kubkwan,” tenen bingnun. 20Ni kanya katabum eranir ba, dibde bunun dinyi ara, “Teleb Uram lak eterena ati alyi kum kubkwanir,” tenen ni diboka dibde bunun. Ati, niryi alyi kuna kum uca nun Du Yesus Kristus si weik erebdeibkwan. Ara, kam tuba kuranyi ababyi, dibmanyi ababyi, niryi kubmanyi tok biriman nirya ara nun Du Yesus si weik erebdeibkwan ati tenenun. 21Tukwetam kam tuba kuranyi ba, niryi nun Du Yesus Kristus dam kunanyi kuboka Er si weik ebkwan. Ba, sirya dibmanyi ura, iya teleb dinyi dobdobkwan ati tenenun. 22Tukwetam tuba kam kuranyi ababyi niti teleb kuranir. Ara, niryi busul kuboka nun Du Yesus wa tuba irmiliraniryi, Teleb Uram eterebmurubnyi uca, du ilinto moubkwande. Ura, niryi, “Kam tuba kurantinyi do? Diboktinyi do?” tenenunci, niryi, “Dan dinyi asi u dikum deibtinyi do?” teneboka kanya kankana kuranir. 23Ni kanya ara kankana kuranir ara ton tenenun dinyi ara ato tenenun. Sirya dibmanyi uca, nun Du Yesus Kristus ab tonkwa iya kubkwanim. A dinyi ara niti iya teleb kubkwanir. 24Ba, kam tuba kuboka tukwetam kubnyi ura, sun Filipi nang asi kanya teleb kubkwansir. 25Niryi sun Filipi nang asi tuba eterebmurubkwan ati, ni kum dibkwan. Eda, kam tuba kubkwan. Ni kanya ara lulungna kum uca a dinyi tenen bikdanman ati ebman. Ara, sun Filipi nang aryi tabakdongo-tabakdongo nun Du Yesus bisi dib tenebkwandum uca, sun kanya ababyi tabakdongoboka kilkil kubkwansir ati, ni sun ab tonkwa tanglona kum uca kurmuruna teleb tenenun. 26Ara, nun Du Yesus Kristus biryi karebsici uca, ni sun ab tonkwa tubto kubkwayeb. A deyok aryi, sun kanya langdeiboka kilkil kubkwansir ati ebman.
27Ura, sunci bikdob dinyi dobdobmunci, nun Du Yesus Kristus uram Teleb Uram aryi eteresurur to teleb dinyi akwe kunubde bindarur. Ara, ni sun dam yandoka ebdanmabyi ababyi, ni sun dam kum yanmanyi ababyi, niryi kekenmasinyi uca, ninyi aryi sunsi kisal dangsina teleb. Ara, ninyi aryi kisal dakoka sunti ato ena teleb, “Sun Filipi nang ara neik kanya boboka, katabum eboka tingnamingci, sunci ‘Teleb Uram ati nun li,’ tenen nang urasintam aryi Teleb Uram limdoramingci, ‘A uram ara dib en uram enung.’” 28Tonda, sun dib tenen nang ati “Bisik sekminiktibyi,” tenesin nang ati sunci ilil kuna kum uca katabum eboka tingnamunyi ba, sun bisik sengminingnansing nang aryi asing eibsingiryi, sunci, “Er Imtamnyi biryi nunsi kum daneibkwansir,” tenen bikwaming. Ba, sun dib tenen nang aryi ilil kum kuboka tingnandum nang ara, “Er Imtamnyi biryi nunsi lebkwansir,” tenen bikdankwandum. 29Nun Nai Imtamnyi biryi kisal dakoka karebmasou uca, sunda nun Du Yesus Kristus bisi dib tenerandum. Tonda, nun Nai biryi kisal dakoka karebmasou uca, sunda nun Du Yesus Kristus milin nang kuboka Er si lak erandum deyok aryi, ninyi aryi, “Nun li,” tenen sunsi mambul weik kurdeiriransing. A mambul kurdeirisina ababyi nun Nai biryi kisal dakoka sunsi karebde baransir ati ebman. 30Ati, sunci minob uca asing eiranindau ani, ukuryok ababyi ni kunun dinyi asi kekeranurum ara, ninyi aryi ni Paulus bisi mambul weik dinyi kurdeiriraning bok, nira katabum eboka nun Du Yesus bisi milinun. Ati, sunbabyi neiktoto mambul weik dinyi kareransing bok, kanya katabum eboka nun Du Yesus bisi milirandum ati ato ebman.
Currently Selected:
Filipi Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
