Obaja Uram 1

Er Iya Erebdobnyi biryi, “Sun Edom mutuk atei nang asi wenen dinyi karebkwan,” eboka uram ebdeibmou uram deyok

1-16

1Er Imtamnyi uram ermurunanyi si nabi Obaja biryi sun Edom mutuk atei nang ati kunumna ton asing eibmou. Ura, Obaja biryi ato eboka nukmou, “Er Iya Erebdobnyi, Imtamnyi biryi ato ebmar, ‘Niryi sun Esau yala nang Edom nang ati weik wenen dinyi karebkwan,’ ebmar,” ebmou. Ato ebmou cok, Er Iya Erebdobnyi, Imtamnyi biryi ato en uram lak ebdeibmou, “Nira Imtamnyi biryi arukmase uca, yuk yala nang mar ordan sien nang aryi, ‘Sun Edom nang asi mar bobkwayeb,’ tenen sun uram bobinkwamai nang asi sirya bokdonokmai. Sirya bokdonokmai ba, sunci ninyi yuk atei nang-yuk atei nang kankan asi sirya ebmurubde binmai. Ara, ‘Edom mutuk bindoka mar ibinkwayeb ati, sunci yin doboka mar milibsindarur!’ eboka erbinmai,” ato en uram Er Imtam Erebdobnyi biryi ni Obaja bisi lak ebdeibnou. 2Tonda, Imtamnyi biryi ato ebmou, “Sun Edom nang aryi Nisi kekebnindarur. Diba ati, Ni Imtamnyi biryi sunsi oboka mitik kibkwansin. Ara, sun yuk atei nang-yuk atei nang kankan aryi mitik kibsinibkwansin. Ba, sun yuk atei nang-yuk atei nang aryi sunsi iya malyi kiboka ina ngilikwansing. 3Sunda wingdan kanya borandum aryi sun damnyi bowaningminingdarandum, se. Ya, sun Edom nang kurandum atei ara mikib atei keil um dam dobdau atei asi kurandum. Sun atei ara erebdob mutuk kon dub dobdau asi kurandum. Sun damnyi sun kanyatam aryi ato erdarandum, ‘Nunda, unanyi mikib aryi dobtaleboka tukwetam dobkwetebkwamasute do? Nun atei ara mikib weik atei kurur ati, mar ordana nang aryi wengyanman kumto dikum kunub,’ ato eboka dub ererdarandum. 4Ato tenen kurandum bok, Nira Iya Erebdobnyi biryi ato ebmasin: Sunda maka bib kuna langlang eboka imtam yibaramunyi ababyi, tukwetam dobkwetebkwansinca. Kurya imtam tordarande kankan kuramunyi ababyi, eikiryi kuboka dobkwetebkwansinca. 5Diba ati, mambul weik dinyi sun dam douryankwamasir. Ara lukunda ukula don nang kum, ukutotoa arabde don nang kum ninyi atei dam yangnyi ura, sunci ukula bona doboka bobkwabmangnyi tok, bona bon dinyi dorsengdoraming. Ara, ton dinyi takdongobokingnyi ura, yuk dinyi ara dorsengdoraming. Ba, anggur du dangmangnyi nang ara ton du dakmangnyi ura, ton yuk dinyi ara tangdongoraming. Bok, sunda Edom mutuk atei yankwansing mar ordana nang ara iya mitika ababyi ton kum takdongobkwansing. Eda, sun dinyi nirya dobsekwansing. 6We, sun Esau deibdoba nang bona bon dinyi nirya ara arabde bon nang aryi doboka sunga we ebdeibkwaming. Sun Edom mutuk nang iniboka deiamunyi bona talena nirya ara yuk atei nang aryi yanlilib-lilib eboka dobsekwaming. 7Sun Edom yala nang ara, ‘Lebdandobtibyi,’ tenen binsekwamunyi nang ara sun mar milin nang atei mutuk lemdarbinkwandum. Lemdarorbinmamunyi bok, akatei nang ara sun ab tonkwa antaniboka kuramunyi atei nang aryi sunsi kum lebdeibkwansing. Eda, a nang ara, ‘Nun ninyi bun,’ tenena kum uca, ‘Nun mutuk wiliba aryi kuboka bindobdarur,’ eboka yakdonokwansing. Sun uruna ebde kurandum nang ara tola uram eboka kikibkwansing. Sunda bingna kum bok, sun ab tonkwa yina yibde kuramunyi nang aryi mar moun yibdongobkwansing. 8Diba ati ebman. A talak aryi Nira Iya Erebdobnyi biryi sun Edom atei nang kankan aryi deyok yuk-yuk bikoka bingna nang asi kum daneibkwan. Ba, Esau mutuk dub ai kankan ara, ‘Ato ati ara bikdob dinyi,’ teneboka bingna nang ara tuba kum kubkwaming. 9Bohoi. Sunda Teman atei aryi Esau yala nang ara yin doun nang mikib nang kuramunyi bok, sunbabyi lukdandoka ilil weik kubkwande. Ba, Nira Imtamnyi biryi sun mar ordana nang yuk atei nang milibnyi ba, sun Teman atei nang ab, sun Esau yala yuk nang erebdob mutuk kon dub ai doboka kurdanung nang ab asi nirya oboka iya kum daneibkwaming. 10Sunda Edom nang ara minob ura malyi dinyi kurandau deyok aryi, Ni Imtamnyi biryi sunsi tamuboka dekeibkwansin. Ara, sun kwit yabwe Yakub deibdoba nang aryi minob mambul dinyi doamnyi ba, sunci, ‘Nun ining aca, nun du weit yabwe aca, se,’ tenen boukwe kum kurandau. Eda, sun Yehuda nang mambul dinyi doamnyi asi sunci yu boboka malyi kurandau, se. A deyok aryi sun mar ordana nang aryi sun nirya asi obminiksingnyi ba, urabsekwandum. Sun damnyi malyito kubmandau deyok aryi sun deibdoba ababyi iya ton tuba kum kubde binkwaming. 11Minob ura yuk suksuk atei nang aryi yandoka Yerusalem atei ibinmaici, atei lika bublan akdonokoka Yerusalem atei wengbinmai ara luba kibdau do? Sirya wengbinmai ura, a era atei nang aryi Yerusalem atei kuramwe bona bon dinyi ilinto asi yamin deibdeboka dobde boronmai. Ba, a talak ara sun Edom nang ara yuk ai kisibdobmandauci dirongmandau, se. Ani, sunbabyi wengbindoka Yerusalem atei kuramwe bona bon dinyi arabdobmandau, se. 12Sun Yehuda yala nang ara sun du weit yabwe nang kunung. Ati, sun du weit yabwe mambul bonmangnyi tum ara sunda Edom nang aryi, ‘Malyi,’ tenen tanglona mem! Ani, Yehuda deibdoba nang asi orminingmangnyi tum ara sun kanya teleb kusina mem! Sun kwit yabwe mambul kanya bobmangnyi tum asi uram dem atikwe bi du betengna mem. 13Bok, sunci bico tenena kum uca, Yerusalem atei lika bublan wengbinmandauci, sunbabyi Yerusalem atei kuramwe bona bon dinyi arabdobmandau, se. Ara, sun era atei nang aryi iyandoka Yerusalem atei kuramwe bona bon dinyi arabdobmai ba, sunbabyi miliboka arabdobmandau, se. A talak ara sun Yehuda nang aryi mambul dinyi dobdobmai bok, sunci sunsi kum milibmandau, se. Sun du weit yabwe Niryi wibdeibse nang sun kanya ara etetek eboka mikib dobdobman kum kubmou ba, sunci, ‘Malyi,’ tenen sunsi ina ngilingmandau, se. 14Ba, sun Yerusalem atei nang ara, ‘Lebdandobtibyi,’ tenen sun du weit yabwe nang Edom yala nang mutuk lemdarorbanmai bok, sunda Edom nang aryi bisik dandanya tikmandauci, sun du weit yabwe wengdoryanmai asi obmandau, se. Tonda, sunci sun du weit yabwe ‘Lebdandobtibyi,’ tenen wengdoryanmai nang asi taleboka sun ordana nang taruk dam karebmandau, se. 15Er Iya Erebdobnyi biryi im dangna tukwe dangna nang nirya wenebkwande tum ara sirya dam kubmar. Sun Edom nang ara sun ukuboka malyi kuramunyi to kuboka Ni Imtamnyi biryi sunbabyi tamuboka dekeibkwansin. Sunci yuk nang asi ikin dinyi bobdeibmandau to kuboka sunbabyi neiktoto ikin dinyi dobdobkwandum. 16Sun Edom nang ara yan yaniboka Ni Imtamnyi biryi wibdeibse mutuk kon weleyanmandau ani, sunci teleb kanya boboka anggur me moyok taleboka yibmandau, se. A deyok aryi, Niryi sun moyok langdiboka weik wenen dinyi karebkwansin. Sun Edom yala nang akwe ati kum ebman. Eda, sun im dangna tukwe dangna yala nang yuk yala nang nirya ababyi Niryi diba ati weik wenen dinyi karebkwan. Sunda Niryi wibdeibse atei betebdongobmandau nang ara Niryi sunsi iya yu wenen dinyi me karebsinyi ba, doyibkwandum. Ati, sunda me tula kirikoka yirmururandum nang ara mambul dinyi iya dobmurubkwandum. Ba, a nang yala nirya urabsekamunyi ba, yuk nang aryi, ‘Ninyi a nang yala ton kum kuramnyi do?’ ebkwaming,” ebmou.

Lemdorban ai ara Yerusalem atei kuboka Sion mutuk dub ai akwe kurur uram deyok

17-21

17Nabi Obaja ato ebmou, “Ato kuboka kunubkwande bok, sun, ‘Lebdandobtibyi,’ tenen nang ara Sion mutuk dub ai aryi ninyi lemna dinyi dobdobkwaming. Ba, a mutuk kon ai ara iya teleb ai kubde ba, talyi beterdongona kum aitam uboka kibkwande. Ba, sun Yakub uruma si Israel yaldangna ara lemna dinyi dobdobkwaming. Er Imtamnyi biryi sunsi ebdeiamwe mutuk asi wanikmai bok, sunci tamuboka iya talebkwaming. 18Yakub yaldangna aryi deibdoba nang ara uk sirika ato nang kubingiryi, sunci gandum du yabla yirande uk ato kuboka yibingiryok, yuk atei-yuk atei nang asi kum daneibkwaming. Tonda, Yakub mi Yusuf biryi deibdoba nang ara uk buk angnande ato nang kubingiryi, sunbabyi neiktoto alingkweia yirande uk ato kuboka yibingiryok, yuk atei-yuk atei nang asi kum daneibkwaming. Ba, Esau biryi deibdoba nang asi gandum du yabla uk yalibde yirande to dinyi kubkwaming ba, mambul dinyi dobdobkwaming. Ato kuboka sun Yehuda yala nang aryi sun Esau yala nang asi weneboka kum daneibkwaming. Ba, Esau biryi deibdoba yaldangna nang ara ninyi tentok sirik ababyi ton tangdongona kum uca nirya bunbunse ebdeibkwaming. Ara, Ni Imtam Erebdobnyi biryi ato ebdeibman. 19Ba, dabura mutuk Negeb mutuk nang ara welebindoka Esau deibdoba nang kuraming mutuk kon dub atei asi olong unubdongoboka talebkwaming. Ba, mutuk kon kuraming nang ara mutuk yim yuryandoka Filistin nang mutuk olong unubdongoboka talebkwaming. Ani, Efraim nang mutuk ab, Samaria nang mutuk ababyi ara sun dinyi akwe kibkwande. Ba, Yakub er mi kele mi si Benyamin deibdoba nang ara bindoka Gilead mutuk olong unubdongoboka talebkwaming. 20Sun Israel nang asi era atei nang aryi boboka yuk mutuk deibloamingnyi bok, sun mutuk tamuryankwaming. Sirya tamuryangnyi ura, sunci sun mutuk Kanaan mutuk nirya talebkwamingnyi ba, Sarfat mutuk ababyi sun mutuk kibkwande. Sun Yerusalem nang ara era mutuk Sefarad mutuk boboka deiblobmai nang ara sun mutuk Yerusalem mutuk tamuryandoka dabura mutuk si Negeb ababyi talebkwaming. 21Ba, ninyi lemna nang ilinto aryi yandoka Sion mutuk dub asi tingbinkwaming. A nang ara Esau mutuk kon dub atei nang asi wenen dinyi karebkwaming. Ba, Ni Iya Erebdobnyi bira iya weik Sienyi kuboka im dangna tukwe dangna nang nirya talenunyi kunun ati lak kibdeibkwan.” Er Imtamnyi biryi er uram ermururamunyi si Obaja deici aryi ato ebdeibmou.

Currently Selected:

Obaja Uram 1: MTG

Highlight

Copy

Compare