Bilangan Uram 9
9
“Weik uki tum si Paskah tum ati ato kuboka kwalibkwandarur,” ebmou uram deyok
9:1-14
(Kel. 12:1-13)
1Israel ninyi Mesir mutuk aryi anabdobmai talak kwalina bitinyi kwaliamiryi, yuma wala wengbinmai ura, Er Iya Erebdobnyi biryi yini mutuk Sinai dam aryi Musa bisi ato ebdeibmou, 2“Sun Israel ninyi aryi weik kwalina si Paskah kwalibkwandarur. 3Ara, yuma wala bok uki 14 baryi kimbici tum aryi kiting wengbaci ura, kwalibkwandarur. Ara, ‘Ato kuboka kwalibkwandarur,’ ebdeibsise to kuboka kwalibkwandarur,” ebmou. 4Ura, Musa biryi Israel ninyi asi, “Weik kwalina si Paskah kwalibkwayeb,” ebmou. 5Ura, sun Israel ninyi aryi yuma wala bok, uki 14 baryi kimbinmouci, kiting wengdongorbau ura, yini mutuk Sinai dam weik kwalina si Paskah kwalibmai. Ara, Er Iya Erebdobnyi biryi Musa dam ebdeibmou to kuboka kunubmai. 6Bok, ton nang a tum ara weik kwalina si Paskah kum kwalibmai. Ara, ninyi dibmai ba, tukwi deiboka bukmai deyok aryi kum kwalibmai. Ato kubmai dinyi ara sunci Musa dam ab, Harun dam ab lak eryanmai. 7Ato ebmai, “Diba, nunda ninyi tukwi deibmab deyok aryi betebdongobdanmab. Bok, nunsi unatoa ati nun kwit yabwe ab tonkwa ton kum weik kwalina kwaliboka Er Iya Erebdobnyi bisi dama deiboka uk kum dabmab do?” eboka asibdenmai. 8Uca, Musa biryi ato kuboka uram dekeibmou, “Ukublobmandarur! Er Iya Erebdobnyi biryi sunti, ‘Ato kubdum,’ ebnir ba, uram dekeibkwansin” ebmou.
9Ura, Er Imtamnyi biryi Musa bisi ato ebmou, 10“Israel ninyi asi ato ebdum, ‘Sun Israel ninyi kum, sun deibdoba kum aryi ninyi tukwi deibmariryi, betebdongobdanmaci kum, yana mutuk do tuba yanganmaci kum ura, erbabyi Er Iya Erebdobnyi si weik eboka kwalina si Paskah kwalibkwandur. 11Bok, a weik kwalina Paskah kwalibkwamaci ura, wala tentok mabdiryi bitinyi wala wengbiriryi, uki 14 baryi kurbaci tum aryi kwalibkwandur. A uki tum weik kwalina si Paskah ati oboka yubmaci bisam domba ab, bungbung ena dongona kum roti kwaning ab, sik eranci buna ab yibkwanung. 12#Yoh. 19:36Bok, a yuboka yinmangnyi yina ara kwel deina mem! Ani, bisam yok ara tentok sirik ababyi bulangdena mem! Ni Imtamnyi biryi ebdeianyi to akwe kunubkwanung. 13Eda, ninyi tukwi eirina kum kubmariryi, atei bukmarinyi kum, yana mutuk do tuba kum yanganmariryi, atei bukmarinyi kum aryi weik kwalina si Paskah kwaliboka bisam Ni Iya Erebdobnyi biti dama deirinina kum kubmarinyi bira erbiramnyi obdanmariryi. 14Yuk atei nang sun ab tonkwa kuramunyi nang aryi, “Nunbabyi Er Iya Erebdobnyi biti dama deiboka weik kwalina kwalibkwayeb,” tenebingnyi ura, Niryi, “Ato kuboka weik kwalina kwalibkwandarur,” ebdeianyi to akwe kunuboka kwalibkwanung. Weik kwalina si Paskah uki tum ati, “Ato kubkwandarur,” ebdeianyi uram ara ninyi atei nang babyi, sun Israel yoka ninyi babyi ati ebdeibsise,’ Israel ninyi asi ebdum.” Ato eboka Er Iya Erebdobnyi biryi Musa bisi ebdeibmou.
Er Iya Erebdobnyi biryi duwa bum aryi sun Israel ninyi kitingtam lukunda kalingnamwe deyok
9:15-23
15Sun Israel ninyi Er Iya Erebdobnyi biryi, “Ukubdarur-ukuna mem,” en uram deirin keis ol ai Kemah Suci ai sirya dobmai. Dobmai ba, duwa aryi akai dam yuryanmouci, akai asi sikliboka libdobmou. A duwa ara inibman akiryi kuboka belekuna nirya ara Kemah Suci ai deici kurmururamwe. Ba, lukunda ara a duwa bol ara uk ato ongom-ongom eramwe. 16A duwa bum iya a kuramuryi, Er Imtamnyi ai nirya sikliboka limdoramwe. Ba, lukunda ara uk atoanun ongom-ongom eramwe. 17A duwa bum akatei aryi anabdobni ura, sun Israel ninyi ababyi sun keis ol ai dakoka bobni ura, anaroramnyi. Ani, a duwa bindoka tiklobni ai ara sunbabyi a bindoka sun man ai keis ol ai doboka maramnyi. 18Er Iya Erebdobnyi biryi, “Akai dakoka bobdarur,” ebne tok dangnamnyi. Ani, Erci, “Tubto dobdarur,” ebne ura, doramnyi. Ba, a duwa bum sun Er Iya Erebdobnyi ai dobman ai a kunman ura, sun Israel ninyi ababyi a kuramnyi. 19Ani, a duwa bum aryi uki weik akai dub kunman ura, sun Israel ninyi aryi Er Iya Erebdobnyi ebdeiamwe to asi dibliliboka kalingnamnyi ba, sunbabyi bana kum kuramnyi. 20A duwa bum Er Iya Erebdobnyi ai dub uki mitik kunmana ara Er Iya Erebdobnyi biryi ebman to kuboka kuramnyi. Ani, a duwa bum anaron ura, sunbabyi anaroramnyi. 21Duwa bum lukunda tentok kuramwe ani, belekuna im dub anabdobne ura, sunbabyi anaboka baramnyi. Ato akwe kuboka kitingtam lukunda ukurmururamnyi. 22A duwa bum aryi uki weikanun kum, uki bitinyi kum, wala tentok kum ababyi Er Imtamnyi ai Kemah Suci ai dub kubmaci ura, sun kum anaramnyi. Eda, a duwa bum anabdobne ura, sunbabyi anaroramnyi. 23Sun kubde baramnyi ara Er Iya Erebdobnyi biryi, “Keis ol ai dobdarur,” ebne tok Israel ninyi akatei dobnaryi kuramnyi. Ba, “Anabdobdarur,” ebne tok anaroramnyi. Ara, sun Israel ninyi aryi Er Iya Erebdobnyi biryi Musa dam ebdeiamwe to asi kunuboka kubde baramnyi.
Currently Selected:
Bilangan Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
