Bilangan Uram 5
5
Susa talen nang ab, beterdongordan nang ab ati yan memebdeibmou ram deyok
5:1-4
1Er Iya Erebdobnyi biryi Musa bisi ato ebmou, 2“Sun Israel nang asi ato ebdum, ‘Sun susa taleanci nang ab, kwat bisik ab, den bisik ab asi yabung yangaranci ninyi ab, ninyi dibmangnyi dam kunmangnyi ninyi ab ara sun Israel nang keis ol ai atei doamunyi dam aryi baitam yakdonokwandarur. 3Ner kum, sal kum ababyi sun Israel nang kunmamunyi ai dam aryi kanci baitam yakdonokwandum. Ara, sun a nang akiryi Ni Imtamnyi sun dam yandoka kunun ai dam asi betebdongobingnyei,’ ebdum,” ebmou. 4“Sun susa talen nang ab, ninyi dibmangnyi ba, tukwe eibmangnyi nang ab, den bisik ab, kwat bisik ab asi yabung yangaranci ninyi ab ara baitam yakdonokwandarur,” ebdeiamwe to kuboka sun Israel nang aryi kunuramnyi.
Israel nang mamun malyi kubdanmangnyi dinyi ati yan memebdeibwe uram deyok
5:5-10
5Er Iya Erebdobnyi biryi Musa bisi ato ebdeibmou, 6“Israel ninyi asi ato ebdum, ‘Ner kum, sal kum aryi Ni Imtamnyi bisi ilil tenena kum uca sun kwit yabwe dam asi malyi kubdongoamingnyi ura, 7a ner kum, sal kum ara er malyi kuanci to kuboka lak ebkwandur. Lak ebci ura, er malyi kubdongoandinyi bisi dengna tabakdongoboka dekwandur. 8Bok, a malyi kibdongoandinyi diandiryi, er yala ab er mi ab ton kum kuramingnyi ura, a bona ara Ni Iya Erebdobnyi biti karebkwanurur. Ba, ni ai wa in nang si imam dinyi kibkwandur. Bok, er, “Malyi kun dinyi ati kilibnute,” tenen bisam domba yim bobinmaci ara nungna kum. 9Israel nang aryi Er Iya Erebdobnyi biti er malyi kubdongoandinyi bisi dengna dama deiryanmangnyi dinyi ara sun imam nang dinyi kibkwande. 10Ani, ninyi yuk-yuk Er Iya Erebdobnyi biti dama deirin dinyi bobinmaci ura, a bobinmarinyi er tentoknyi dinyi. Bok, imam tentok taruk dam karebmangnyi ura, a dama dinyi ara a imam tentoknyi dinyi kibkwandur,’ ebdum.” Er Iya Erebdobnyi biryi Musa dam asi ato ebdeibmou.
Sal aryi er ner asi tola ati, “Yuk nang ab kundarur,” eboka tatab-tatab ena ati yan memebdeibsou uram deyok
5:11-31
11Er Iya Erebdobnyi biryi Musa bisi ato ebdeibmou, 12“Israel ninyi asi ato ebdum, ‘Ner aryi er akenyi bisi kanya deina kum uca yuk nang kanya deirandiryi, 13yuk nang ab kurandingnyi bok, er akenyi bira bingna kum kubkwande. Ara, ner aryi lak ena kum uca inianci deyok aryi kum bikwande. 14Ura, er akenyi yu matan kanyitam wengyaci ba, er ner asi matan kibkwande. Bok, er ner ara yuknyi ab ton kuna kum kurandingnyi kum. Yuknyi ab tonkwa kurandingnyi kum ura er akenyi kanyatam yu matan wengkwande. 15Ato kurdarandingnyi ura, er akenyi biryi er ner boboka Er Iya Erebdobnyi ai wa in nang si imam nang dam boyankwandur. Ba, a matan kuranci dinyi dama deirina ati bobkwamaci dinyi ara tepung ikin 1 kilogram boyankwandur. Bok, a boyankwamaci tepung ara minyak zaitun ab, kemenyan ab a tepung deici asi lingdongona mem! Ara, er akenyi biryi er ner asi matan kuranci deyok aryi ukuna mem! 16Ura, Er Iya Erebdobnyi ai wa irandinyi si imam biryi a ner asi ato ebkwandur, “Urasin Er Iya Erebdobnyi biti dama deiboka uk danub tam urasin deibdum,” ebkwandur. 17Ebci ura, imam biryi tukwe aryi kikniamingnyi meyok bisik malyi kun dinyi kilin me dikdongobkwandur. Ura, Er Iya Erebdobnyi ai umbura kuanci dobtaleboka a me umbura dongobkwandur. 18Sirya kubci ura, a ner kisok kaluna ongobmaci dinyi langakwandur. Ura, “Matan dinyi ati kilibnute,” tenen bobmaci tepung te tang deici deibdongobkwandur. Ura, imam bira ninyi sumna me sik ilinto me kwebtaleboka doubkwandur. 19Ura, Er Iya Erebdobnyi ai wa inanyi imam biryi a ner asi ato ebkwandur, “Kan dib ati yuk nang ab tonkwa kum marandurumnyi ura, a me akiryi sumna dinyi kan dam kum yankwankir. 20Bok, kan akenyi doankici bok, deibloboka yuk nang ab kurandurumnyi ura, 21Er Iya Erebdobnyi biryi kan si siboka kan yala atei ninyi nirya subkwande. Ba, yuk nang yoramingnyi nerabwe ara mi kin aling weik kiboka mundu bobkwaming. Bok, mi deina kum uca yokabkwaming. 22A submakir sik me ara kan nong umbura nirya obdakiriryi, kan keil ab mundu ab ara bukam ililanun kibkwankir.” Ato ebci ura, a ner aryi ato ebkwandur, “Yo, Er Iya Erebdobnyi biryi dib a kunum ukubnurur,” ebkwandur.
23Ura, Er Imtamnyi ai wa inanyi imam biryi kerek sengdongon dinyi dobtaleboka sekdongobci ura, sik me aryi kilibkabkwandur. 24Ura, imam biryi, “A ner asi submaci sik me yibdum,” ebkwandur. A me mundu umbura wekci ura, sik aryi u yibkwande. 25Sirya yibci ura, Er Imtamnyi ai wa inanyi imam biryi, “Tola en dinyi ati kilibkwanir,” eboka bobmaci roti kwaning dobtaleboka Er Iya Erebdobnyi urasin dam amuboka dobkarebkwandur. Ura, imam biryi a roti kwaning boboka Er Imtamnyi biti dama deirin keil lamna dub bobindoka deibkwandur. 26Ura, imam biryi roti kwaning bum mitikanun toboka dama deirin keil lamna dub deibkwandur. Ato kubmaci ara, “A roti kwaning sirya dama deibmang,” tenena ati kubkwamarur. Ura, a roti kwaning toboka doubmaci ara dama deirin keil lamna dub deici aryi uk dabkwandur. Sirya kubci ura, a ner asi, “Sik me yibdum,” ebci ura, yibkwandur. 27Sirya yibci ura, a ner yuk nang ab kuramingiryok, kanyi danguboka er akenyi bisi kanyi kum deibci ura, a yibmaci me aryi nong nirya obliboka u yibkwande. Ani, er mundu ab keil ab buruk-buruk eboka bukam weik kibkwande. Ato kubci ura, er atei ninyi ara Er Iya Erebdobnyi biryi subwe tenebkwaming. 28Bok, yuk nang ab tonkwa kum kuramingnyi ura, sumna dinyi er dam yangana kum kubkwande. Ani, mi mundu bobdiryi mi yaldakde binkwande.
29Ura, matan ati yan memen uram ara sal aryi er ner asi, “Yuk nang ab tonkwa kunung,” tenen matan kuranci babyi, 30Yuk nang ab tonkwa kum kuramingnyi babyi, a matan kuboka yu wengnanci dinyi ara er ner boboka Er Iya Erebdobnyi urasin dam boyankwandur. Ba, Er Imtamnyi ai wa inanyi imam biryi yan memen uram a ner asi ebdeibkwandur kuboka a ner asi kunubkwandur. 31Ba, sal ara er ner malyi kun dinyi aryi ikin bona kum uca ur kubdobkwandur. Bok, ner ara er malyi kuranci to kuboka ikin takubdobkwande,’ ebdum.” Er Iya Erebdobnyi biryi Musa bisi ebdeibmou ba, Musa biryi Israel nang asi ato ebmou.
Currently Selected:
Bilangan Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
