Mikha Uram 3
3
Ninyi bobde menengna nang ab, tola uram ermurun nang ab aryi yu dinyi kuramnyi ati wenen uram ebmou deyok
3:1-12
1Ni Mikha biryi ato ebmasin, “Sun Yakub deibdoba nang kankan aryi si sin nang ara nisi diboka kekerandarur.
Ani, sun Israel yala nang asi bobde menengna nang ababyi kekeranindarur.
Sunda ninyi urasin meimna kum uca kikimanto dinyi asi kununa ara diboka bikwandarur.
2Sun teleb kun dinyi ara, ‘Nun li,’ tenebmunyi ura,
yu dinyi asi kanya deirirandum nang ati ebmasin.
A nang aryi ni atei nang kala asi sun nong ai aryi tarak-tarak erkarongnung.
Ani, sun tub ara yok deici aryi kwilik-kwilik erkarongnung.
3Ba, ni atei nang tub ara yinung.
Ura, sun kala ara sun nong deici longkarongnung.
Ba, sun yok ara bulak-bulak eboka keil teingnung.
Ura, sun nong asi mitik-mitik kalim-kalim eboka oraming ara
yina tub yun suwa deici kalibde deiraming ato kunung.
4Ato kuramingiryok, sunda aminda Er Iya Erebdobnyi bisi uram doboka moloramingnyi bok,
Erci sunsi dengna karena kum kubkwande.
A talak aryi Er urasin ara sun dam aryi inibdobkwande.
Ara, sun yu dinyi kuramingnyi deyok aryi ukubkwande.
5Er Iya Erebdobnyi biryi sun tola uram ermurun nang nabi nang ati ato ebdeibmou.
Ara, sun tola uram eboka ni atei nang asi boboka bisik waningminingnung nang ati ato ebdeibmou.
Sunci, ‘Ukutotoa karebsiting ba, yibdobtibyi,’ tenen tola uram eraming nang ati uram ebdeibmou.
Sunsi utotoa karebingnyi nang ara, ‘Tonkwa antaniboka kubdobkwayeb,’ eraming.
Bok, sun yin dinyi ati, utotoa ton karena kum atei nang ara, ‘Mar bobdankwayeb,’ eraming nang ati Erci uram ebdeibmou.
6Ara, ato ebdeibmou, ‘A deyok aryi a uki tum berekwande ara sunda asing kuna dakwansir tum berekwande.
Ani, a uki tum ara asing kerket kum lebkwansir.
Sun tola uram boban nang ati, kiting dukduk en bok kiting kwekdobkwande.
Ani, sunti berekwande uki ara iya kunuk tilib dobkwaming uki asi berekwande.
7Sun asing kerket nang ara alyi kubkwande.
Sun mirei bingna nang ara alyi aryi wimum-wamum ebdankwaming.
Er Nun Nai Imtamnyi biryi sunsi uram ton dengdeirina kum kubci
ba, sun nirya alyi aryi sun urasin libdandobkwaming,’ ebdeibmou.
8Sunda ato kubkwande bok, ni Mikha bira mikib dinyi langkareknou.
Ani, nira Er Imtamnyi Kanya Roh Kudus aryi langkareknou.
Tonda, kikimanto uram en dinyi ab ibarya kun dinyi langkareknou.
A dinyi langkareknou ara, niryi Yakub yaldangna nang aryi dangbisiramingnyi dinyi ati,
‘Sunda ato kuboka dangbisindarur,’ eboka lak ebkwan ati langkareknou.
Sun Israel nang sun malyi kun dinyi ati, ‘Sunda ato kuboka malyi kundarur,’ eboka lak ebkwan ati langkareknou.
9We, sun Yakub deibdoba nang si sin nang sun kekerandarur.
Israel nang sien nang ara sun kekerandarur.
We, sun kikimanto kun dinyi ara sun li kusurur nang ab,
u dikum dinyi asi tingkwanirminingdarur nang ab ara diboka kekerandarur.
10Sunda ninyi kalingna nang kundarur bok, sunci Sion atei dobkwamamunyi ura, ninyi obmamunyi ining sakmaci deici asi ai dorandum nang ara diboka kekerandarur.
Sun Yerusalem atei dobkwamamunyi ura, yu dinyi deici aryi dorandum nang ara diboka kekerandarur.
11Sun weik sien nang ab, ninyi dama deirin nang imam nang ab, uram boboka ermurun nang nabi nang ab ara
Er Iya Erebdobnyi si liknibdongoboka ato enung.
‘Er Iya Erebdobnyi bira diba ati, nun kankan kurur.
Ati, mambul weik dinyi nun dam kum karebsurur,’ enung.
Ato enung cok, sun weik nang ara utotoa si tunibdongobmangnyi deyok aryi wenen uram ara diboka kum liliboka sengkwetena kum kunung.
Ba, ninyi dama deirin nang ara dekwamangnyi atikwe eterenung.
Uram boban nang ara co bok dengna moloryina atikwe uram eboka kunurminingnung.
12Sunci ato kunung deyok aryi, mar ordana nang yandoka Sion mutuk ara wa in dam mutuk tukwe kurukoka iraming ato mutuk kibdeibkwaming.
Ba, Yerusalem atei ara daklobdob atei ato olong dem kibkwande.
Ba, Er Imtamnyi biti dama deirin ai dobyi mutuk kon ara bai kankan ato kibkwande,” eboka Mikha biryi ato ebmou.
Currently Selected:
Mikha Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
