Imamat Uram 20

Mem en dinyi talebnuruboka kununa kum ninyi asi ikin karen deyok

20:1-27

1Ura, Er Iya Erebdobnyi biryi Musa bisi ato ebmou. 2“Sun Israel ninyi asi ato ebdum! ‘Sun Israel nang yoka babyi, sun kankan dam tingyangan nang babyi aryi sun nermabwe mabwe asi kwemdeina si Molokh dama deiboka molona ati karebmunyi ura, sun Israel nang nirya aryi a karebmarinyi bisi keil donokoka obkwanung ba, dibkwandur. 3Ato kuboka sun mabwe nermabwe asi Molokh kwemdeina dama ati kareamingnyi nang ara Niryi a nang asi wenebkwan. Ara, a nang aryi Ni si iya lek dinyi ab, Ni ai Kemah Suci ai ab asi nining ato tenen dinyi kibdongobmangnyi deyok aryi sunsi obkabokwan. Ani, Ni lek dinyi asi yan yanin deyok aryi sunsi ato kubkwan. 4Bok, sun mabwe nermabwe asi kwemdeina si Molokh asi dama ati uk daboka moloraming bok, sun Israel ninyi aryi eianaryok kum eiana ato kublobokamunci, sun ato kuramingnyi nang asi kum obkabmunyi ura, 5Ni Imtamnyi biryi sunsi obkabokwan. Ani, sun ai ninyi nirya ab Nisi takloboka Molokh kwemdeina asi moloramingnyi ninyi nirya ab ara Niryi obkabokwan. 6Ani, sunci, Ni sun molonindarurnyi bisi taklobnumunci, yuk kwemdeina asi moloboka din nang kanya naboka moloraming nang nirya ara Ni Imtamnyi biryi obkabokwansin. 7Ni Iya Erebdobnyi sun molonindarurnyi bira Ni a kunum kununci, tukwe dangna mutuk ninyi nirya kankan dam aryi, sunda yuk wiboka Ni mabwe nermabwe kibdeibsise. Ati sunci, “Ukubdarur,” ebdeibsise uram asi diboka talebnurubmunci, kunubde bindarur!

8Nira Iya Erebdobnyi sun molonindarurnyi biryi sunsi yuk wibokabsisiryi, sunsi lek kibdeibsisinyi kunun. Ati, Ni sun molonindarurnyi biryi, “Ukubdarur!” ebdeibsise uram asi diboka talebnurubmunci, kunubde bindarur! 9#Kel. 21:17; Mat. 15:4; Mrk. 7:10Sun kankan dam aryi sangkuna sun nai sun kwin asi subingnyi nang ara obkabokwanung. Ba, sun a ninyi sumna nang sun malyi kun dinyi ara sunbiramnyi ikin takubdobkwanung. 10Sunci yuk nang ner yukuta yobmamunyi ura, a yobdanmamunyi ner ab sal ab nirya asi ikin dinyi kareboka obkwandarur ba, dibkwandurung! 11Ani, sun sal nang aryi sun nai yabwe nerabwe asi yona mem! Ara, sun nai yabwe nerabwe kunkwanung. Asi sun a yobdanmaringnyi ner ab sal ab ara obkwandarur ba, dibkwandurung! Ara, sunbiramnyi malyi kun dinyi aryi ato kuboka obkwandarur! 12Ani, sun mabwe nerabwe asi yobmamunyi nang ara obkwandarur ba, dibkwandurung! Ara, sun mining damnyi malyi kun dinyi aryi duknasito dinyi kubmangnyi deyok ati sunsi obkwandarur! 13Ani, sangkuna sun sal mamun yordaramingnyi ura, ninyi kum kuramingnyi to iya malyito kubmangnyi deyok aryi sunci obkabkwandarur! Ara, sun mining malyi kun dinyi aryi ato kuboka obkwandarur ba, dibkwanung! 14Ani, sunci sangkuna er nebnyi doamuncok, tubto er kwin dobmunyi ura, sun a kuamunyi nang ab sun nangamse ab nirya oboka uk dabkwandarur! Ara, sun a malyi kun nang kun dinyi asi, sun Israel ninyi kankan aryi kum dandeibkwandarur! 15Sun sal nang aryi sangkuna yuk kamyoa asi yobmangnyi nang ara a kamyoa ab anyi ab asi obkwandarur! Ato kuboka sun mining malyi kun dinyi aryi obmunyi ba, dibkwandurung. 16Ani, nerabwe aryi sangkuna yuk kamyoa ab yobdanmaringnyi ura, a kamyoa ab a ner ab ara obkwandarur! Ato kuboka sun mining malyi kun dinyi ati obmunyi ba, dibkwandurung. 17Ani, sun sal nang aryi sangkuna er malner nong kobdoba ab tonkwa mana mem! Ato kuna ara iya malyito dinyi kurur. Ato kubmunyi ninyi ara Ni Imtamnyi biryi sunsi Ni mabwe nermabwe kum kibdeibkwansin. Ato kuboka a ninyi ara sun mining malyi kun dinyi aryi ato kuboka obkwandarur ba, dibkwanung! 18Ani, sun sal nang aryi bunga yibanmaci nerabwe ab tonkwa mabmunyi ura, sunda Ni Imtamnyi biryi sun Ni nermabwe mabwe kum tenebkwansin, eda kum daneibkwansin. 19Ani, sun sal nang aryi sun nai malnerabwe kum, sun kwin malnerabwe kum tonkwa mana mem! Asi, sun ab tonkwa mabmunyi ura, sun bitinyi malyi kun dinyi ara sunbiramnyi ikin takubdobkwandurung. Ara, sun nai yabwe sun kwin kum, sun kwin yabwe sun kwin kum nirya ara sun ab tonkwa mana mem! 20Ani, sun sal nang aryi sun nai yabwe sun du weit nang nerabwe ab tonkwa mana mem! Ara, sun nai yabwe sun weit nerabwe kunkwanung. Ato kubmunyi ura, sun malyi kun dinyi ara sunbiramnyi ikin dinyi takubdobkwandarur. Ato kuna ara sun ninyi yal kum dakdobkwanung. 21Ani, sunci sangkuna sun kwit yabwe kam tuba kuramingnyi bok asi sun nerabwe araboka dorona mem! Ato kuna ara iya malyito kubkwandarur. Ato kubmamunyi ara sun kwit yabwe nerabwe arabkwandarur ati ato kuna mem! Ato kuboka dobdamunyi ninyi ara ninyi yal kum dakdobkwandarur,’ ebdum,” ebmou.

22Ura, Er Iya Erebdobnyi biryi sun Israel nang asi ato ebmou. “Ni Imtamnyi biryi, ‘Ukubdarur!’ ebdeibsise uram asi sunci talebnuruboka kunubde bindarur! Ato kubmunyi ba, Ni Imtamnyi biryi bobinkwansin mutuk si Kanaan dam aryi sunsi kum yakdonokwansin. Eda, iya sun mutuk kibdobmunci kubdobkwandum. 23Ani, sun minob Kanaan mutuk kunung ninyi ara sun urasintam aryi Ni Imtamnyi biryi yakdonokwan ninyi kunung. A ninyi aryi kunung malyi dinyi ara iya li kunurur. Ati, sunci milibmunci, sun kun dinyi diliboka kununa mem! 24Bok, sunda Ni Imtamnyi biryi sirya ato ebdeibsise, ‘Sulsul eboka kwising me babyi kwiryi me babyi ilila kurur mutuk si Kanaan ara sunti karebsinyi ba, sunci bindoka sun mutuk kibdobmunci, iya kubdobkwandum,’ eansise to kuboka karebkwansin. Nira Iya Erebdobnyi sun molonindarurnyi bira Ni a kunum kunun. Akiryi, sun tukwe dangna nang nirya kankan dam aryi sunsi yuk wiboka Ni Imtamnyi nermabwe mabwe kibdeibsise. 25A deyok aryi duknasito kamyoa ab, duknasito kum kamyoa ab ara sunci diboka bikwandarur! Ani, duknasito maka ab, duknasito kum maka ab ara sunci diboka bikwandarur! Ba, sun anda tukwe dangna kunung yan dumbaryi kamyoa ab, maka mer ab taram deib yibaraming kamyoa ab asi yibmunyi ba, duknasito ninyi kibdeibsicei! 26Tukwe dangna ninyi kankan dam aryi, ‘Ni Imtamnyi mabwe kibkwaming,’ tenen ati sunsi wiboka yuk kibdeibsise. Nira Imtamnyi, Ni Iya Erebdobnyi bira iya leknyi kunun. Ati, sunbabyi lek ninyi kibdandobkwandarur!

27Sangkuna nerabwe kum, sal kum aryi din nang kanya asi naboka moloramingnyi ninyi ara sunci obkabkwandarur! Sun ato naboka moloramingnyi ninyi ara sunci keil aryi sun deici donokoka obmunyi ba, dibkwanung. Sun mining malyi kun dinyi aryi a ukuramingnyi ninyi asi ato kuboka obmunyi ba, dibkwanung, ebdum,” ebmou.

Currently Selected:

Imamat Uram 20: MTG

Highlight

Copy

Compare