Yosua Uram 6
6
Weik atei Yerikho atei lika keil aryi doamnyi asi dalubsakmou deyok
6:1-27
1“Israel nang oryasingnyei,” tenen deyok aryi weik atei Yerikho lika keil aryi doamnyi lika bublan tirikdongoboka bisik bublan dam iya kalingnamnyi. Ba, Yerikho atei nang babyi, yuk atei nang babyi akatei dam wengbin-anamyan kibman kum kuramnyi.
2Asi, Er Iya Erebdobnyi biryi Yosua bisi ato ebmou, “Yerikho atei nang ab, akatei weik sienyi ab, akatei mar ordana bikdob nang ab asi kan taruk dam dobkarebkwinkin ati minob bikabdum! 3Ati, uki nabaryi asi liki tentok-tentok ara kan ab, sun Israel yin doun nang nirya ab deici deibdobmunci leleboka akatei aknabdongoboka boongobkirikwandarur! 4Ba, Niti ninyi dama deirin ai wa in nang imam nang tabaryi ara, ‘Ukubdarur-ukuna mem,’ en uram deirin co sangkol urasin dam tikoka domba bisam kisok yang aryi buu ebde tikwamanung. Imam nang tabaryi uki nabaryi liki tentok-tentok aryi ato kubde tikwamanung. Bok, uki tabaryi tum imam nang aryi buu engnyi ura, sun nirya liki tabaryi Yerikho atei boongobkirikwandarur! 5Ani, domba bisam yang aryi buu eramingnyi nang aryi buu ebdabokingnyi kekebmunyi ura, sun Israel nang nirya ara luna mumuboka sunukliknibkwandarur ba, akatei lika nirya ururuboka dalubsakwande. Ba, a talak akiryok sun Israel nang nirya kablibkaboka-kablibkaboka akatei wengdorbinkwandarur,” ebmou.
6Ninyi si Nun er mi si Yosua biryi imam nang yuk nang asi nabmouci, sunsi ato ebmou, “Sunci a co sangkol bobmunyi ura, imam nang tabaryi nang ara domba yang aryi buu enmangiryi sunsi menekwanung,” ebmou. 7Ba, sun Israel nang asi ato ebmou, “Sun nirya ara weik atei boongobkirikwandarur. Ba, yin doun nang ara a co sangkol urasin dam asi bomenekwanung,” ebmou. 8Yosua biryi sun Israel nang asi sirya ebdukeibmou ura, imam nang tabaryi ara domba yang doubtaleboka Er Iya Erebdobnyi co sangkol urasin dam buu ebde menengmai. Ba, a co sangkol boboka banmai imam nang ara aminda boongonmai. 9Yin doun nang yuma menekmai ura, sun imam nang tabaryi ara sun dongtam tikoka tuba-tuba buu ebmurubde banmai. Ba, sun a co sangkol bobmai imam nang dongtam ara ton yin doun aryi kalikoka banmai ba, sun Israel nang nirya ara sirya kobdob dakdobmaici, boongobkirikde banmai. 10Bok, Yosua biryi sun Israel nang asi ato ebmou, “Lunmaruma takmunci, uram kilikdarur! Niryi, ‘Ura, lubdarur,’ ebnyi tum asi lubkwandarur,” ebmou. 11Ura, yuma tum aryi sunci liki tentok Er Iya Erebdobnyi biryi, “Ukubdarur-ukuna mem,” en uram deirin co sangkol boboka ongorkiringmai ani, keis ol atei doamiryi kuramnyi ai yandoka mabmai.
12Mabmai ani, uki bitinyi berekmou ura, Yosua bira belekuna kobdob bukokmou. Ba, imam nang aryi Er Iya Erebdobnyi co sangkol ereboka bobdobmai. 13Ura, imam nang tabaryi nang ara buu ena tabaryi doubmaici, Er Iya Erebdobnyi co sangkol boboka menengmai nang dam buu ebnin banmai. Ba, yin doun nang ara sun minob menengmai. Ani, tonda co sangkol dongtam banmai. Ba, sirya kobdob ara sun Israel nang ur nang banmai. 14Uki bitinyi tum ababyi, a weik atei asi liki tentok boongobmai ura, sun atei keis ol atei bindobmai. Ani, uki tentok tum ara liki tentok-tentok boongorkiringnamnyi ani, uki nabaryi boongobkirikmai.
15Ani, uki tabaryi tum ara belekuna kobdob bukokmai. Ura, kiting tingyangau talak aryi liki tabaryi buu eboka boongobkirikmai. A tum demang liki tabaryi boongobkirikmai. 16Ura, imam nang aryi liki tabaryi dinyi buu eboka boongonmai talak aryi Yosua biryi Israel nang asi ato ebmou, “Er Iya Erebdobnyi biryi akatei sunti karebsir ati, lundarur!” ebmou. 17Ebmou ura, Yosua biryi tubto ato ebmou, “A weik atei ab utotoa dinyi nirya uk daboka kum dandeibibiryi, Er Iya Erebdobnyi dinyi akwe kubkur. Bok, talyi yortamni ner Rahab ab, er ai ninyi ab asi kam kubdobkwaming. Ara, meimyanmai nang asi du dongobdobmou deyok aryi sunda kam kubdobkwaming. 18Bok, sun Israel nang aryi, ‘Er Imtamnyi biti kareboka kum daneibkwayeb,’ tenen wibdeiboubwe bona talena ab, utotoa ab ara ton dorona mem. ‘Kum daneibkwayeb,’ teneboka wibdeiamibyi dinyi asi dobdobmunyi ura, sun Israel nang dam aryi sun kuron atei ab, sun nong ab nirya asi oboka walwalabminikdamunyei. 19Eda, dengna weik keil si emas ab, perak ab, tembaga ab, kat-kat dinyi nirya ara Er Iya Erebdobnyi biti wibdeibdarur. Wibdeibmunyi ura, a nirya Er Iya Erebdobnyi ai dam dengna weik dinyi deiriramnyi ai dikum dobdeibkwandarur,” ebmou. 20Ato ebmou ura, imam nang aryi buu ena lilim weikto ei ba, kekerdongoi talak akiryok sun Israel nang nirya uram weikanun eboka lubmai. Lubmai ura, Yerikho atei keil lika doamnya ururubkaboka bukmou asi, Israel nang sun nirya kablibkaboka-kablibkaboka akatei wengbinmai. 21Wengbinmai ura, akatei dam kuramwe dinyi nirya, “Er Imtamnyi biti obdeibkwayeb,” tenen obkiribmai. Wise nang babyi, kam nang babyi, nerabwe babyi, sal nang babyi, sun bisam sapi babyi, domba babyi, keledai babyi nirya ninyi on ya aryi obkiribmai. 22Obkiribde bai talak aryi Yosua biryi ninyi bitinyi meimyanandei nang asi ato ebdeibmou, “Sun bitinyi nang ara sun minob uram ebdeiandurumwe to kuboka talyi yortamni ner si Rahab ai wengbirurumnyi ura, Rahab er ab er ai kuramingnyi nirya ab, ‘Obingnyei,’ tenen iniboka boyibirurum!” eboka arukmou. 23Arukmou ura, a meimyanandei kabir nang bitinyi a ner ai wengbindoka Rahab ab, er nai ab, er kwin ab, er du weit yabwe ab, ton er ab tonkwa kuramnyi nang ab, ani er yala nang ab inibdobmarei ura, sun Israel nang atei doboka kuramnyi ai dongtam kuboka asi iniboka bobinmai. 24Ba, Israel nang aryi akatei ab, akatei nang bona talena nirya uk dabmai. Dabmaici, erda dengna weik keil si emas ab, perak ab, tembaga ab, kat-kat dinyi besi ab ara buluboka, “Er Iya Erebdobnyi dinyi,” tenen Er ai dengna weik dinyi deiriramnyi ai dikum deirirbinmai. 25Ura, ato kuboka Yosua biryi talyi yortamni ner si Rahab, er ai ninyi nirya ab, er ab tonkwa kuramnyi ninyi nirya ab ara kum obmouci, takdongobmou. Ara, Yosua biryi minob, “Yerikho dam meimbirurum,” eboka bokdonokamwe nang asi kunusa dokoka du dongobdamwe ati kum obmai. Ba, ukubabyi Rahab yala ninyi ara Israel nang kankan tuba kunung.
26A talak aryi Yosua biryi uram eboka, katabum uram ebdeibmou, “Unanyi biryi Yerikho atei asi tubto tamuboka dobkwandanyi bira Er Iya Erebdobnyi biryi ersi subkwande. Subkwanci ara ato kubkwande. Akatei yuma abyokomna ingwelena ati anyi biryi yuma ko deianci mi asi Er Imtamnyi biryi kisok dakwandur. Ba, akatei lika bisik bublan kiknibkwanci ura, er mi kelenyi asi Er Imtamnyi biryi kisok dakwandur,” ebmou. 27Er Iya Erebdobnyi biryi Yosua bisi miliramwe ba, Yerikho atei ninyi obkaboka arabdobwe en dinyi ara Kanaan mutuk dam kuramnyi nang nirya kekeboka nukdanin baramnyi.
Currently Selected:
Yosua Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
Yosua Uram 6
6
Weik atei Yerikho atei lika keil aryi doamnyi asi dalubsakmou deyok
6:1-27
1“Israel nang oryasingnyei,” tenen deyok aryi weik atei Yerikho lika keil aryi doamnyi lika bublan tirikdongoboka bisik bublan dam iya kalingnamnyi. Ba, Yerikho atei nang babyi, yuk atei nang babyi akatei dam wengbin-anamyan kibman kum kuramnyi.
2Asi, Er Iya Erebdobnyi biryi Yosua bisi ato ebmou, “Yerikho atei nang ab, akatei weik sienyi ab, akatei mar ordana bikdob nang ab asi kan taruk dam dobkarebkwinkin ati minob bikabdum! 3Ati, uki nabaryi asi liki tentok-tentok ara kan ab, sun Israel yin doun nang nirya ab deici deibdobmunci leleboka akatei aknabdongoboka boongobkirikwandarur! 4Ba, Niti ninyi dama deirin ai wa in nang imam nang tabaryi ara, ‘Ukubdarur-ukuna mem,’ en uram deirin co sangkol urasin dam tikoka domba bisam kisok yang aryi buu ebde tikwamanung. Imam nang tabaryi uki nabaryi liki tentok-tentok aryi ato kubde tikwamanung. Bok, uki tabaryi tum imam nang aryi buu engnyi ura, sun nirya liki tabaryi Yerikho atei boongobkirikwandarur! 5Ani, domba bisam yang aryi buu eramingnyi nang aryi buu ebdabokingnyi kekebmunyi ura, sun Israel nang nirya ara luna mumuboka sunukliknibkwandarur ba, akatei lika nirya ururuboka dalubsakwande. Ba, a talak akiryok sun Israel nang nirya kablibkaboka-kablibkaboka akatei wengdorbinkwandarur,” ebmou.
6Ninyi si Nun er mi si Yosua biryi imam nang yuk nang asi nabmouci, sunsi ato ebmou, “Sunci a co sangkol bobmunyi ura, imam nang tabaryi nang ara domba yang aryi buu enmangiryi sunsi menekwanung,” ebmou. 7Ba, sun Israel nang asi ato ebmou, “Sun nirya ara weik atei boongobkirikwandarur. Ba, yin doun nang ara a co sangkol urasin dam asi bomenekwanung,” ebmou. 8Yosua biryi sun Israel nang asi sirya ebdukeibmou ura, imam nang tabaryi ara domba yang doubtaleboka Er Iya Erebdobnyi co sangkol urasin dam buu ebde menengmai. Ba, a co sangkol boboka banmai imam nang ara aminda boongonmai. 9Yin doun nang yuma menekmai ura, sun imam nang tabaryi ara sun dongtam tikoka tuba-tuba buu ebmurubde banmai. Ba, sun a co sangkol bobmai imam nang dongtam ara ton yin doun aryi kalikoka banmai ba, sun Israel nang nirya ara sirya kobdob dakdobmaici, boongobkirikde banmai. 10Bok, Yosua biryi sun Israel nang asi ato ebmou, “Lunmaruma takmunci, uram kilikdarur! Niryi, ‘Ura, lubdarur,’ ebnyi tum asi lubkwandarur,” ebmou. 11Ura, yuma tum aryi sunci liki tentok Er Iya Erebdobnyi biryi, “Ukubdarur-ukuna mem,” en uram deirin co sangkol boboka ongorkiringmai ani, keis ol atei doamiryi kuramnyi ai yandoka mabmai.
12Mabmai ani, uki bitinyi berekmou ura, Yosua bira belekuna kobdob bukokmou. Ba, imam nang aryi Er Iya Erebdobnyi co sangkol ereboka bobdobmai. 13Ura, imam nang tabaryi nang ara buu ena tabaryi doubmaici, Er Iya Erebdobnyi co sangkol boboka menengmai nang dam buu ebnin banmai. Ba, yin doun nang ara sun minob menengmai. Ani, tonda co sangkol dongtam banmai. Ba, sirya kobdob ara sun Israel nang ur nang banmai. 14Uki bitinyi tum ababyi, a weik atei asi liki tentok boongobmai ura, sun atei keis ol atei bindobmai. Ani, uki tentok tum ara liki tentok-tentok boongorkiringnamnyi ani, uki nabaryi boongobkirikmai.
15Ani, uki tabaryi tum ara belekuna kobdob bukokmai. Ura, kiting tingyangau talak aryi liki tabaryi buu eboka boongobkirikmai. A tum demang liki tabaryi boongobkirikmai. 16Ura, imam nang aryi liki tabaryi dinyi buu eboka boongonmai talak aryi Yosua biryi Israel nang asi ato ebmou, “Er Iya Erebdobnyi biryi akatei sunti karebsir ati, lundarur!” ebmou. 17Ebmou ura, Yosua biryi tubto ato ebmou, “A weik atei ab utotoa dinyi nirya uk daboka kum dandeibibiryi, Er Iya Erebdobnyi dinyi akwe kubkur. Bok, talyi yortamni ner Rahab ab, er ai ninyi ab asi kam kubdobkwaming. Ara, meimyanmai nang asi du dongobdobmou deyok aryi sunda kam kubdobkwaming. 18Bok, sun Israel nang aryi, ‘Er Imtamnyi biti kareboka kum daneibkwayeb,’ tenen wibdeiboubwe bona talena ab, utotoa ab ara ton dorona mem. ‘Kum daneibkwayeb,’ teneboka wibdeiamibyi dinyi asi dobdobmunyi ura, sun Israel nang dam aryi sun kuron atei ab, sun nong ab nirya asi oboka walwalabminikdamunyei. 19Eda, dengna weik keil si emas ab, perak ab, tembaga ab, kat-kat dinyi nirya ara Er Iya Erebdobnyi biti wibdeibdarur. Wibdeibmunyi ura, a nirya Er Iya Erebdobnyi ai dam dengna weik dinyi deiriramnyi ai dikum dobdeibkwandarur,” ebmou. 20Ato ebmou ura, imam nang aryi buu ena lilim weikto ei ba, kekerdongoi talak akiryok sun Israel nang nirya uram weikanun eboka lubmai. Lubmai ura, Yerikho atei keil lika doamnya ururubkaboka bukmou asi, Israel nang sun nirya kablibkaboka-kablibkaboka akatei wengbinmai. 21Wengbinmai ura, akatei dam kuramwe dinyi nirya, “Er Imtamnyi biti obdeibkwayeb,” tenen obkiribmai. Wise nang babyi, kam nang babyi, nerabwe babyi, sal nang babyi, sun bisam sapi babyi, domba babyi, keledai babyi nirya ninyi on ya aryi obkiribmai. 22Obkiribde bai talak aryi Yosua biryi ninyi bitinyi meimyanandei nang asi ato ebdeibmou, “Sun bitinyi nang ara sun minob uram ebdeiandurumwe to kuboka talyi yortamni ner si Rahab ai wengbirurumnyi ura, Rahab er ab er ai kuramingnyi nirya ab, ‘Obingnyei,’ tenen iniboka boyibirurum!” eboka arukmou. 23Arukmou ura, a meimyanandei kabir nang bitinyi a ner ai wengbindoka Rahab ab, er nai ab, er kwin ab, er du weit yabwe ab, ton er ab tonkwa kuramnyi nang ab, ani er yala nang ab inibdobmarei ura, sun Israel nang atei doboka kuramnyi ai dongtam kuboka asi iniboka bobinmai. 24Ba, Israel nang aryi akatei ab, akatei nang bona talena nirya uk dabmai. Dabmaici, erda dengna weik keil si emas ab, perak ab, tembaga ab, kat-kat dinyi besi ab ara buluboka, “Er Iya Erebdobnyi dinyi,” tenen Er ai dengna weik dinyi deiriramnyi ai dikum deirirbinmai. 25Ura, ato kuboka Yosua biryi talyi yortamni ner si Rahab, er ai ninyi nirya ab, er ab tonkwa kuramnyi ninyi nirya ab ara kum obmouci, takdongobmou. Ara, Yosua biryi minob, “Yerikho dam meimbirurum,” eboka bokdonokamwe nang asi kunusa dokoka du dongobdamwe ati kum obmai. Ba, ukubabyi Rahab yala ninyi ara Israel nang kankan tuba kunung.
26A talak aryi Yosua biryi uram eboka, katabum uram ebdeibmou, “Unanyi biryi Yerikho atei asi tubto tamuboka dobkwandanyi bira Er Iya Erebdobnyi biryi ersi subkwande. Subkwanci ara ato kubkwande. Akatei yuma abyokomna ingwelena ati anyi biryi yuma ko deianci mi asi Er Imtamnyi biryi kisok dakwandur. Ba, akatei lika bisik bublan kiknibkwanci ura, er mi kelenyi asi Er Imtamnyi biryi kisok dakwandur,” ebmou. 27Er Iya Erebdobnyi biryi Yosua bisi miliramwe ba, Yerikho atei ninyi obkaboka arabdobwe en dinyi ara Kanaan mutuk dam kuramnyi nang nirya kekeboka nukdanin baramnyi.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)